To Kehe Lahi Kia e Mahina a Aokuso?
1 Ko e tau 1963 e tau kehe lahi ma e tau tagata a Iehova. Iloa nakai e koe ko e ha? Ha ko e magaaho ia ne hokotia e numera he tau tagata fakailoa he lalolagi katoa ke he taha e miliona. Kaeke ko koe he kupu moli he magahala ia, to liga manatu e koe e fiafia ha tautolu ha kua tokologa lahi ne fakamatala e fekau he Kautu! Mogonei, ko e 13,292 he tau tagata fakailoa i Niu Silani. Pete ia, he tau mahina takitaha, ko e avelesi, 826 ia tautolu ne nakai hokotaki e gahua he fekafekauaga.
2 Talia e Paleko: Ia Aokuso kua amanaki a mautolu ke hokotia ke he foliaga he 13,250 e tagata fakailoa i Niu Silani. Kaeke ke kautu e tau laliaga ha tautolu, to kehe lahi moli e mahina a Aokuso! Maeke ia tautolu ke taute e mena nei kaeke ke taute e tautolu oti e vala ha tautolu.
3 Ko lautolu kua amanaki fenoga okioki ka fakaaoga falu magaaho ke he fekafekauaga to fano. Uta e tau tuleke loga, tau porosua, po ke tau mekasini mo koe ke maeke ia koe ke fakamatala ke he tau tagata ka feleveia mo koe. Maeke foki ia koe ke fakalataha fiafia mo e falu he matakavi ia ke he fonua mo e tau tagata fakailoa.
4 Kaeke ke nakai fai malolo a koe, maeke agaia ni a koe ke fakalataha ke he fekafekauaga. Liga ke maeke ia koe ke fakamatala ke he tau ekekafo, tau nosi, po ke falu kua aahi atu. Liga ke fakamatala a koe ke he puhala tohitohi po ke he telefoni.
5 Nakai fakauaua to manako lagomatai e falu ke gahua he fonua ia Aokuso. Kua lata he tau motua, tau fekafekau lagomatai, mo e tau leveki fakaako ke fakatokatoka ke foaki e lagomatai. He tau mena oti ia, ua nimo ke tuku fakamafiti e hokotaki he fekafekauaga hau he matahiku he mahina ke maeke ke totou a koe ko e tagata fakailoa ia Aokuso.
6 Tokiofa e Kotofaaga: Ko e fekafekauaga ko e “mena mitaki.” (2 Timo. 1:14) Kua fakaaue a tautolu ke he kotofaaga kua foaki mai ki a tautolu ke fakamatala e tala mitaki. (1 Tesa. 2:4) Ka manamanatu a tautolu ke he tau mena oti ne taute e Iehova ma tautolu, kua lata ia tautolu ke omoi ke fakalataha tumau ke he gahua aoga lahi ke he tau tau loga. Nakai fai mena kua lata ke fakaata ke fakalavelave a tautolu mai he fakamatala tumau. Kia eke a Aokuso mo mahina kehe lahi he fekafekauaga a Iehova mo e fifili ke fakamatala hagaao ki a ia he tau mahina takitaha ka hau!—Sala. 34:1.