Ko e Tagata Mahani Ma Kia a Koe?
1 Nakai ofo a tautolu he kitia e tama tote ne kiakia mai he tua he hana a matua fifine po ke matua tane. Kua mahani ma pauaki e tagata he vaha tote. Tatai ni he lahi e tagata, tokologa ne fa mahani ma pauaki. Kaeke kua lauia a koe he mahani ma ka fakalataha he fekafekauaga, ko e heigoa ne lata ia koe ke taute?
2 Fahia ke he Mahani Ma: Kua aoga lahi ke fakateliga ke he “tagata galo he loto.” (1 Pete. 3:4) Kia ati hake e fakaalofa hau ma Iehova mo e katofia hau. Kia talitonu e fakamoliaga ko e gahua he fakamatalaaga ko e taha puhala mitaki ai ke fakakite e fakaalofa noa he tagata. Kia kumi fakamakutu e fakaholoaga mitaki he fakaako fakatagata mo e feoaki ke he tau feleveiaaga. Liogi tumau mo e tonu ni ma e lagomataiaga a Iehova. Ko e tua malolo mo e falanaki atu ki a ia ka ati hake e loto malolo mo e “au atu ai he fakamalolo ke talahau atu e kupu mo e nakai matakutaku.”—Filipi 1:14.
3 Totoko e tau manatu loto matakutaku. Na tuga ko e mena anei ha Timoteo ne kau ke taute. Ne fakamafana age e Paulo a Timoteo ke “aua neke fakalialia e taha ke he [hana] a fuata,” he fakamanatu age ki a ia “nakai foaki mai he atua kia tautolu e Agaga ke matakutaku ai, ka kia fakamalolo ai.” (1 Timo. 4:12; 2 Timo. 1:7) Ne fakaaoga fakalahi e Iehova a Timoteo, ti to fakaaoga pihia foki a koe ka holo ki mua a koe mo e loto malolo katoatoa ki a Ia.—Sala. 56:11.
4 He manamanatu ke he kupu Tohi Tapu, tuga ia Mataio 10:37, kua lagomatai ai e matakainaga fifine ne kua vivivivi he matakutaku ke he hana tane ne nakai talitonu. He fakauka a ia, ne mukamuka fakahaga e fekafekauaga ki a ia, ati fakahiku ai, ne talia he hana tane, matua fifine, mo e tau lafu tugaane oti e kupu moli!
5 Aoga Lahi ke Tauteute: Ko e malolo he loto hau ka holo atu ki mua ka tauteute fakamakutu a koe ma e fekafekauaga. Fifili e fakataiaga ne mukamuka mai he tohi Reasoning po ke tau fufuta tuai he Ha Tautolu a Fekafekauaga he Kautu, tokaloto ki ai, ti liu fakataitai ai. Aua neke fakaatukehe ke he tau mena nakai aoga, ka e manamanatu ke he tau mena fakamalolo. Kumi e fakamalolo he gahua fakalataha mo e falu. Ua nimo na tokologa e tau tagata ka feleveia mo koe he tau gutuhala ne fa fakaumiumi, tuga ni a koe. Na lata e fekau he Kautu ma e tau tagata oti.
6 Kaeke ko e tagata mahani ma a koe, aua fakaatukehe. He gahuahua e koe ni a koe, to lagomatai e Iehova a koe ke eke mo tagata fakamatala he tala mitaki kua lauia mitaki. Ati moua e koe e olioli he fekafekauaga hau.—Fakatai 10:22.