Fakaholoaga Fou he Toloaga he Takaiaga

Na iloa e tautolu a Iehova ko e Atua kua aoga lahi mo e fakaalofa ha tautolu mo e tukulele katoatoa ha tautolu. Ka e, ne kumi e lalolagi ke fakataki kehe a tautolu mai he fakafetuiaga tata ne ha ha ia tautolu mo ia. (Ioane 17:14) Ma tautolu ke fakamalolo e fakaalofa ha tautolu ma Iehova mo e fakamalolo foki a tautolu ke totoko atu e tau mena he lalolagi ne fakahagahaga kelea aki e mahani fakaagaga ha tautolu, ko e fakaholoaga fou he toloaga he takaiaga ke he tau he fekafekauaga 2001 ka fakatoka e mataulu “Fakaalofa ke he Atua​—Nakai ke he tau Mena he Lalolagi.”​—1 Ioane 2:15-17.

Ko e fakaalofa hokulo ma Iehova ka omoomoi ai a tautolu ke fakamatala hagaao ki a ia. Pete ia, nakai ko e mena mukamuka e gahua he fekafekauaga ke he tokologa he tau tagata he Atua. He lauga “Fakaalofa ke he Atua ne Omoomoi a Tautolu he Fekafekauaga ha Tautolu,” kia ako e puhala kua maeke he tokologa ke kaumahala mai he mahani ma mo e falu he tau fakalavelave ke fakalataha fakalahi mo e fiafia ke he gahua nai.

Kua lauia fefe a tautolu ke he tau tuaga kelea he lalolagi? Ko e tau mahani ne totoku kelea he vaha tuai kua pehe anei kua mitaki. Ko e lauga “Tau Tagata Fakaalofa ki a Iehova ne Fakavihia e tau Mena Kelea” mo e lauga ne tutaki ai “Tau Mena he Lalolagi​—Fefe e Onoonoaga ha Tautolu ki Ai?” ka ati hake e fifiliaga ha tautolu ke pehe nakai ke he tau manako hepehepe.

Putoia ke he fakaholoaga e fakafifitakiaga he Aoga Fekafekau Fakateokarasi mo e Feleveiaaga Fekafekau, fakalataha mo e fakaakoaga he Kolo Toko he fahitapu. Ko e lauga ke he papiliki, “Puhala he Fakaalofa mo e Tua ke Kautu Mai he Lalolagi,” ka fakamalolo a tautolu ke fifitaki a Iesu ke totoko atu e tau pehia fakalalolagi. (Ioane 16:33) Kia uiina e tau tagata ne fakaako Tohi Tapu mo koe ke fakalataha. Ko e tagata ne manako ke papatiso kua lata ke tutala tuai ke he fekafekau leveki ke tauteute e tau fakatokaaga ne lata ki ai.

He toloaga he takaiaga nai, kia fakateliga fakamahao ai a tautolu ke he mena moli ne tonuhia e fakaalofa ha tautolu ki ai ke moua mai e fiafia he tau fakamonuinaaga uho a Iehova. Aua fakamole ha mena nei!