Fakaholoaga Fou he Toloaga he Takaiaga

“Kia Omaoma ke he Tau Poaki he Atua ti Moui Ai” ko e mataulu anei he fakaholoaga ma e toloaga ua e aho he takaiaga ke kamata ia Sepetema. (Fakatai 4:4) A to peehi ko e ha kua nakai mamafa e omaoma ke he tau poaki he Atua. Ke lafi atu, to fakakite fefe e tauteaga he finagalo he Atua ke tamai e hauhau mo e fiafia moli pihia foki e amaamanakiaga ma anoiha.​—Mata. 11:28-30; Ioane 13:17.

Ko lautolu ne omaoma ke he poakiaga a Keriso ne manako ke papatiso he toloaga kua lata ke vagahau ke he fekafekau leveki, to taute e ia e tau fakatokatokaaga ne kua lata.​—Mata. 28:19, 20.

Ko e tau lauga fakavahega to fakamaama e tau puhala aoga ne kua maeke ia tautolu ke fakakite e fakaalofa ma e Atua mo e tau matakainaga ha tautolu. (Ioane 13:34, 35; 1 Ioa. 5:3) Ko e tau fakatonuaga fakalagalaga loto ka fakaaoga he fakaholoaga mai ia Salamo 19 mo e 119. Pete ni ne tohia he afe tau tau ne mole e tau fakatonuaga he tau salamo nei, to kitia e tautolu e puhala ke aoga fakatagata ai a tautolu he vaha nei.

Ko e lauga ka fakaaoga he leveki maaga motu to fakahigoa “Kia Matakutaku A ke he Atua, mo e Omaoma ke he Hana Tau Fakatufono.” (Fakama. 12:13) Ko e lauga fakahiku he fekafekau leveki he takaiaga to fakatutala ke he tau puhala kua aoga ke moua ai e moui mitaki ma e tau fuata he magaaho nei mo e ko e ha ne lata ke mauokafua a lautolu ke he anoiha tukulagi. To fakaoti he leveki maaga motu e fakaholoaga mai he talahau ai ke he tau puhala loga ne aoga ai e mahani fakaalofa he “fakatufono kua mua ue atu” ke momoui ki ai. (Iako. 2:8) Moli ni, ko e fakaholoaga he toloaga nei kua nakai lata ha taha ke toe!