Fakaholoaga Fou he Toloaga he Takaiaga

He “tau aho uka” nei, kua manako a tautolu ke he pulotu mahani Atua ke moua aki mo e tumau e taliaaga ha Iehova. (2 Timo. 3:1) Ko e fakaholoaga he toloaga he takaiaga ma e tau he fekafekauaga he 2005 to foaki mai ki a tautolu falu tomatomaaga aoga mo e fakamaloloaga he fakalaulahi atu e mataulu “Kia Takitaki he ‘Pulotu Mai Luga’”​—Iako. 3:17.

Ko e fufuta lauga fakamua, “Fakakite e ‘Pulotu Mai Luga’ ke he Moui ha Tautolu,” ka lagomatai a tautolu ke kitia e mena kua putoia ke he mahani mea, mafola, fakalatalata, mo e mautali ke omaoma. Ti to fakatutala mai e leveki takaiaga ke he tolu e vala he pulotu mai he lagi. Ko e leveki fahimotu ka fakaoti e aho fakamua he fakakite e puhala he tau fekafekau Kerisiano, pete he onoono e falu kua ‘nakai ako mo e ko e tau tagata noa,’ ne kua mautali ke talahau e pulotu he Atua.​—Gahua 4:13.

He aho ke uaaki, ko e fufuta lauga ne mataulu “Tutuli e Tau Mena kua Atihake” ka lagomatai a tautolu ke kitia mo e kalo mai he tau mena ne maeke ke moumou a tautolu fakaagaga. To fakakite foki e puhala kua maeke ia tautolu ke atihake e falu he tau feleveiaaga fakapotopotoaga, he gahua ke he fonua, mo e i loto he magafaoa. Ko e lauga ma e toloaga, “Puhala kua Lagomatai he Pulotu Mahani Atua a Tautolu,” ka fakahokulo atu e loto fakaaue ha tautolu ma e tau mena aoga kua moua e tautolu he fakagahuahua e tau matapatu fakaakoaga ke he tau momoui ha tautolu. Ko e lauga fakahiku, “Puipui a Tautolu he Fakagahua e Pulotu Faka-Atua,” to fakamalolo e mauokafua ha tautolu ke fuluhi ke he pulotu he Atua he tau aho fakahiku nei.

Ko e vala kua mua atu he tau toloaga oti ko e papatisoaga he tau tutaki fou. Ko e Aoga Fekafekau Fakateokarasi mo e Fakaakoaga Kolo Toko ma e fahi tapu ia e taha vala ka taute he fakaholoaga. Kua manako a Iehova ke aoga oti a tautolu mai he pulotu ne foaki e ia. To monuina fakaagaga a tautolu he tomatomaaga mo e fakamaloloaga hane tatali mai ia tautolu he ha tautolu a toloaga he takaiaga.​—Fakatai 3:13-18.