Ko e Toloaga he Takaiaga ka Lagomatai a Tautolu ke Puipui ha Tautolu a Tuaga Fakaagaaga
1. Ko e heigoa taha foakiaga mai ia Iehova ke lagomatai a tautolu ke fakamooli e poakiaga ha tautolu ke folafola e tala mitaki?
1 Ne foaki fakamokoi e Iehova e tau vala tala, fakamahani, mo e fakamalolōaga kua lata mo tautolu ke maeke ke fai vala he poakiaga faka-Atua ke folafola e tala mitaki. (Mata. 24:14; 2 Timo. 4:17) Ko e toloaga he takaiaga lagataha he tau e taha foakiaga pihia. Ko e fakaholoaga foou ma e tau he fekafekauaga he 2010 ka fakalaulahi e matakupu “Puipui Haau a Tuaga Fakaagaaga,” ne fakavē ke he Roma 8:5 mo e Iuta 17-19. Kua fakatoka ai ke kamata he faahi tapu ha Aokuso 31, 2009.
2. (a) Tau puhala fe ka aoga e toloaga he takaiaga ki a tautolu? (e) Lagomatai fēfē he tau toloaga he takaiaga kua mole a koe ke he gahua he fonua?
2 Kakano ne Aoga: To fakamataala he fakaholoaga a tautolu ke he tau hagahaga kelea, tuga e tau mena fakatauhele ke fofō e tau magaaho ha tautolu mo e hiki kehe e onoonoaga ha tautolu mai he tau mena ne aoga mooli. To fakaako e tautolu e puhala ke fehagai mo e agaaga nakai fai fakavēaga, mo e to fakatutala a tautolu ke he tau mahani he tagata fakaagaaga. To fakakite he tau fufuta lauga e puhala ka taute he tagata tokotaha mo e tau tagata he magafaoa e tau lakaaga ke fakamalolō e tuaga fakaagaaga ha lautolu he fehagai mo e holo ki mua he tau peehiaga mo e tau kamatamata hagahaga kelea ke he tua. To lagomatai he fakaholoaga a tautolu ke puipui ha tautolu a tau loto, fakatumau ha tautolu a malolō fakaagaaga, mo e tokaloto tumau e tau monuina ue atu hane fakatoka ma lautolu kua puipui ha lautolu a tuaga fakaagaaga.
3. A fe ha mutolu a toloaga he takaiaga i mua, ti ko e heigoa haau kua lata ke taute?
3 Ka iloa agataha e koe e magaaho mo e matakavi ka fakahoko ai ha mutolu a toloaga he takaiaga, kia taute e tau fakatokaaga ke fakalataha atu mo e fanogonogo e tau fakaholoaga oti he aho ia. Kia mafanatia, kua fakamonuina e Iehova e tau lima he tagata malolō he gahua.—Fakatai 21:5.
4. Ko e heigoa ha tautolu ka moua mooli mai he ha tautolu a toloaga he takaiaga i mua?
4 Mooli, ko Iehova ko e Foaki he mena fakaalofa mitaki nei. Ne tauteute he matakau fekafekau fakamooli e fakaholoaga ke latatonu ni mo tautolu ke fakatumau ko e tau fekafekau Kerisiano. Kua fiafia a tautolu ki a Iehova ma e tau foakiaga oti haana he lagomatai a tautolu ke ‘taofi mau ha tautolu a amaamanaki kua talahau atu e tautolu mo e nakai hikihikifano.’—Hepe. 10:23-25; Iako. 1:17.