Puipui Haau a Manamanatuaga
1. Ko e heigoa e mataulu he toloaga takaiaga he tau he fekafekauaga ma e 2013, ti ko e heigoa e kakano he fakaholoaga?
1 Ne fakaako e Iesu e tau tutaki haana ke fakaalofa ki a Iehova mo e ha lautolu a tau loto, agaaga, mo e manatu katoa. (Mata. 22:37, 38) Ko e tau fonoaga mo e tau toloaga he tau nei kua talaga ke lagomatai a tautolu ke fakamalolō e tau loto ni ha tautolu. He manatu e koe e mataulu he fonoaga faahimotu ha tautolu ko e “Puipui Haau a Loto!” Ko e fakaholoaga he aho toloaga pauaki ma e 2013 ne mataulu “Puipui Haau a Loto Manamanatu.” Ko e tau fufuta he tau toloaga takaiaga kua kamata he mahina kahau to fakakite e mataulu “Puipui Haau a Manamanatuaga,” ne fakavē ke he Mataio 22:37. Ko e fakaholoaga nei kua talaga ke lagomatai a tautolu takitaha ke hakahaka ni ha tautolu a tau manatu mo e onoonoaga ke fakafiafia ai ki a Iehova.
2. Kua lata a tautolu ke kumi e tau tali ke he tau hūhū fe he fakaholoaga?
2 Tau Mena Ka Fakatoka Mai: He fanogonogo a tautolu ke he toloaga takaiaga, kua lata a tautolu ke kumi e tau tali ke he tau hūhū nei, kua fakakite e tau matapatu manatu:
• Maeke fēfē a tautolu ke kalo he manamanatu ke he ‘tau mena he tagata’?
• Maeke fēfē a tautolu ke lagomatai ke utakehe e ie puipui ne fakapouli e tau manatu he tau tagata nakai tua?
• Ko e heigoa e aga he manamanatuaga kua manako a tautolu ke moua?
• Ko e heigoa e tau aoga he manamanatu fakahokulo kua tonu?
• Maeke fēfē a tautolu ke fakaatā a Iehova ke fakahakohako e tau manamanatuaga ha tautolu?
• Maeke fēfē he tau taane, tau hoana, tau matua, mo e tau fanau ke lafi ke he fiafia he magafaoa?
• Maeke fēfē a tautolu ke mautali ma e aho a Iehova?
• Ko e heigoa e kakano ke fakamalolō e tau loto ha tautolu ma e matagahua?
• Ko e heigoa e aoga kua moua e lautolu kua fakagahua e tau mena ne fakaako e lautolu?
3. Ko e ha kua aoga ke hoko atu a tautolu ke he tau aho ua nei, fanogonogo fakamitaki, mo e fakagahua e tau mena ne fakaako e tautolu?
3 Kua tau a Satani ke moua e tau manatu ha tautolu ti eketaha ke fakahēhē ai. (2 Kori. 11:3) Ko e mena ia, kua lata a tautolu ke puipui e tau manamanatuaga mo e tautaofi e tau logonaaga ha tautolu. Kua lata a tautolu ke fakatumau ke fakakite e finagalo a Keriso mo e totoko e tau fakaohoohoaga he lalolagi kelea nei. (1 Kori. 2:16) Ti taute e tau fakatokaaga ke hoko atu ke he tau aho ua nei he toloaga takaiaga. Fanogonogo fakamitaki. He fakagahua e vala tala aoga ne fakatoka mai, ka lagomatai a tautolu ke fakamalolō e tau manamanatuaga ha tautolu ke he fekafekauaga fakamakutu he Kautu.—1 Pete. 1:13.