Puipui Haau a Loto Manamanatu
1. Ko e heigoa e matakupu he aho toloaga pauaki ma e fekafekauaga he tau 2013, ti ko e heigoa e kakano he fakaholoaga?
1 He tau aho takitaha, kua fakatapakupaku a tautolu ke he tau tuaga ka fakatupu a tautolu ke fakakelea e loto manamanatu ha tautolu. Ko e mena ia ko e fakaholoaga he aho toloaga pauaki ma e fekafekauaga he tau 2013, kua kamata ia Sepetema 1, 2012, ne ha ha i ai e matakupu “Puipui Haau a Loto Manamanatu.” (1 Timo. 1:19) Kua talaga e fakaholoaga ke lagomatai a tautolu takitaha ke onoono fakahokulo ke he fakaaogaaga he mena fakaalofa nei mai he ha tautolu a Tufuga.
2. Ko e heigoa e tau hūhū aoga ka tali he fakaholoaga?
2 Kumi e Tau Manatu Nei: To tali he fakaholoaga fitu e hūhū aoga lahi hagaao ke he loto manamanatu:
• Ko e heigoa kua hagahaga kelea ke he loto manamanatu?
• Maeke fēfē ia tautolu ke fakamahani ha tautolu a loto manamanatu?
• Ko e puhala fe kua maeke ke fakatumau e tuaga meā mai he toto he tau tagata oti kana?
• Ko e heigoa kua fakakite he ha tautolu a tau manamanatuaga mo e tau gahua ke he tau matapatu fakaakoaga he Tohi Tapu hagaao ki a tautolu?
• Maeke fēfē a tautolu ke kalo kehe mai he fakahukia falu ha ko e tau mena he loto manamanatu?
• Tau fuata, maeke fēfē a mutolu ke fakamanavalahi ka fakaohooho ke fakahui?
• Ko e heigoa e tau monuina ka hoko ki a lautolu ne mumuitua ke he ha lautolu a tau loto manamanatu ne takitaki he agaaga?
3. Maeke fēfē e fakaholoaga ke aoga ai a tautolu?
3 Ha ko e lagomatai a Iehova maeke ia tautolu ke kautū ke he tau laliaga ha Satani ke fakahehē e tau loto manamanatu ha tautolu. Puhala he Kupu mo e fakatokatokaaga he Atua, ko e ha tautolu a Matua fakahele he lagi kua pehē ki a tautolu: “Ko e puhala hanai ke o ai a mutolu.” (Isaia 30:21) Ko e fakaholoaga nei ko e taha puhala kua foaki e Iehova e takitakiaga pihia. Ko e mena ia, taute e tau fakatokaaga ke o atu he fakaholoaga katoa. Fanogonogo fakamitaki, ti manamanatu ke he puhala ke fakagahua ki a koe ni e vala tala. Tutala hagaao ke he fakaholoaga ko e magafaoa. Ko e fakagahua e fakatonuaga kua moua ai e tautolu ka fakamalolō a tautolu ke fakatumau ke “ha ha . . . e loto manamanatu hifo mitaki” mo e lagomatai a tautolu ke kalo mai he tafea kehe he puhala he fakafiafiaaga kū he lalolagi ha Satani.—1 Pete. 3:16.