Kupu he Atua kua Aoga ke Fakaako Ai

1. Ko e heigoa e matapatu he toloaga takaiaga ma e tau he fekafekauaga he 2014, ti ko e heigoa e hūhū ka tali he fakaholoaga ia?

¹ Ko Iehova, ko e ha tautolu a Faiaoga Mua Ue Atu he lagi mo e lalolagi katoatoa. (Isaia 30:20, 21) Ti kua fakaako fēfē e Iehova a tautolu? Kua foaki mai e ia e tohi kua mua atu e mitaki ke he tau tohi oti kana​—ko e Kupu haana ne omoomoi he agaaga, ko e Tohi Tapu. Puhala fe he fakaakoaga fakaagaaga kua aoga ai a tautolu ke he puhala fakatino, he manamanatuaga, he tau logonaaga, mo e fakaagaaga? Ko e tali ke he hūhū nei to fakatutala ai he fakaholoaga he toloaga takaiaga ha tautolu ma e tau he fekafekauaga he 2014. Ko e matapatu he fakaholoaga, “Kupu he Atua kua Aoga ke Fakaako Ai,” ne fakavē ke he 2 Timoteo 3:16.

2. Ko e tau matapatu manatu to fakamaama he tau tali ke he tau hūhū fe?

² Kumi e Tau Matapatu Manatu Nei: Ko e tau matapatu manatu he fakaholoaga to fakamaama he tau tali ke he tau hūhū ne mumui mai:

• Lauia fēfē e tau momoui ha tautolu ha ko e tau fakaakoaga he Atua? (Isaia 48:17, 18)

• Ka eketaha a tautolu ke hiki e tau tuaga ha tautolu ke maeke ke fekafekau mau ki a Iehova, ko e heigoa kua mauokafua a tautolu ki ai? (Mala. 3:10)

• Lata ke tali fēfē a tautolu ka feleveia mo e “tau [fakaakoaga] kehekehe”? (Hepe. 13:9)

• Fifitaki fēfē e tautolu e puhala fakaako ha Iesu? (Mata. 7:28, 29)

• Ko e ha kua lata e tau faiaoga i loto he fakapotopotoaga ke fakaako e lautolu a lautolu ni? (Roma 2:21)

• Ko e heigoa kua aoga ai e Kupu he Atua? (2 Timo. 3:16)

• Lauia fēfē e tau tagata he “luelue” e tau motu? (Hakai 2:6, 7)

• Ko e heigoa kua mauokafua a Iehova ki a tautolu? (Efeso 5:1)

• Ko e ha kua latatonu ia tautolu ke gahua fakamakamaka ke taofi mau ke he tau fakaakoaga ha Iehova? (Luka 13:24)

3. Ko e ha kua aoga ma tautolu ke fakalataha atu mo e fanogonogo fakamitaki ke he fakaholoaga nei kua latatonu?

³ He kamataaga he 2 Timoteo veveheaga 3, ato tohi e tau kupu ne fakavē e matapatu he fakaholoaga nei ki ai, ne fakamaama e Paulo e tau aho uka ka fakamailoga aki e tau aho fakamui. Ne tohi e ia: “Ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea, kua fakahehe atu ti fakaheheina foki a lautolu.” (2 Timo. 3:13) Ke nakai fakahehē a tautolu, kua aoga mooli ma tautolu ke fanogonogo mo e fakagahua e tau fakaakoaga faka-Atua! Kia eketaha a tautolu mogoia ke fakalataha atu mo e fanogonogo fakamitaki ke he fakaholoaga nei kua latatonu.