Gahua Malolō e Kupu he Atua
1. Ko e heigoa e matapatu he aho toloaga pauaki ma e tau he fekafekauaga he 2014?
1 Nakai tuga e tau mena ne fakatū he tau tagata nakai mitaki katoatoa, ko e Tohi Tapu kua ha ha e malolō ke hiki a tautolu ke lautatai e tau manatu mo e tau puhala ke he finagalo ha Iehova. Ka e malolō fēfē e Kupu he Atua? Fakaaoga katoatoa fēfē e tautolu e malolō i ai he tau momoui ha tautolu? Fakaaoga fakamitaki fēfē ai e tautolu ke lagomatai falu? Mauokafua a mautolu to atihake fakaagaaga e tau tagata oti ka fakatutala ke he tau manatu nei he fakaholoaga he aho toloaga pauaki ne tauteute ma e tau he fekafekauaga he 2014. Ko e matapatu “Gahua Malolō e Kupu he Atua,” ne moua mai he Heperu 4:12.
2. Lata ia tautolu ke fanogonogo ke he tau tali he tau hūhū fe?
2 Kumi e Tau Tali ke he Tau Hūhū Nei: He fanogonogo a koe ke he fakaholoaga, fanogonogo ke he tau tali ke he tau hūhū ne mumui mai.
• Ko e ha kua lata ia tautolu ke mauokafua ke he Kupu ha Iehova? (Sala. 29:4)
• Maeke fēfē ia tautolu ke iloa e malolō he Kupu he Atua he tau momoui ha tautolu ni? (Sala. 34:8)
• Maeke fēfē ia koe ke fakaaoga e malolō he Kupu he Atua he haau a fekafekauaga? (2 Timo. 3:16, 17)
• Maeke fēfē ia tautolu ke mataala neke mokulu ke he fakavaia he lalolagi ha Satani? (1 Ioa. 5:19)
• Maeke fēfē a koe ko e fuata ke kautū fakaagaaga? (Iere. 17:7)
• Maeke fēfē ia tautolu ke malolō pete foki ka lolelole a tautolu? (2 Kori. 12:10)
• Ko e heigoa e matapatu omoomoiaga he matutaki ke hiki, pete foki ka leva e kelea he tau aga mo e tau mahani? (Efeso 4:23)
3. Lafi ke he fanogonogo ke he fakaholoaga, maeke fēfē foki ia tautolu ke aoga mai he aho toloaga pauaki?
3 To aoga mooli ki a tautolu he fanogonogo ke he tau vala tala aoga nei! Lafi ki ai, ko e aho toloaga pauaki, tuga e toloaga takaiaga mo e fonoaga faahimotu, to moua e tautolu e magaaho ke fakalaulahi atu ai mo e ke fiafia e lafiaga mo e tau matakainaga he falu fakapotopotoaga. (Sala. 133:1-3; 2 Kori. 6:11-13) Fakaatā taha magaaho ke feleveia mo e tau kapitiga kua leva mo e moua foki e tau kapitiga foou. Kaeke ko e matakainaga ahiahi, tuga e leveki faahimotu po ke matakainaga he Peteli kua kotofa ke lauga he aho toloaga pauaki ha mutolu, ko e ha nakai fakafeleveia atu ai ki a ia mo e haana hoana? Kua loga mooli e tau kakano mitaki ke amaamanaki atu a tautolu ke he aho toloaga pauaki i mua!