Fakaholoaga Fou he Aho Toloaga Pauaki
“Kia Eke mo tau Tagata Lalahi ke he Manamanatu” ko e mataulu a ia he fakaholoaga he aho toloaga pauaki ka kamata ia Sepetema 2000. (1 Kori. 14:20) Ko e ha kua lata ia tautolu ke o ki ai? He nonofo a tautolu he lalolagi ne puke he tau mahani kelea. Ke kalo kehe he tau mena nai, kua lata ke ati hake e manamanatu lotomatala ha tautolu ke he tau mena fakaagaga ke maeke ia tautolu ke mahala e kelea ke he mitaki. Haia e puhala he aho toloaga pauaki ka lagomatai a tautolu ke taute.
He kamataaga he fakaholoaga, to fakatutala e leveki he takaiaga ke he “Tau Lagomatai ke Eke mo tau Tagata Lalahi ke he Manamanatu he Tohi Tapu.” To fakakite mai e ia e tau puhala ke fakatumau e tua faka-Kerisiano. Ko e gutuvagahau ka aahi mai ka fakatonutonu e aoga he fakagahuahua e tau fakaakoaga he Tohi Tapu kua mitaki lahi ke ati hake e maamaaga, he lauga “Leveki e Aga Fakaagaga Hau he Fakamahani ke Ako Mua Ai.”
Ko e tau fuata ne lata foki ke ati hake e tau manamanatu lotomatala. To fakatutala e mena nei he tau vala “Kua Ha ne Eke mo tau Tama Mukemuke ke he Kelea” mo e “Tau Fuata ne Kumi e Maama he Mogonei.” Fanogonogo he talahau he tau fuata e tau puhala kua taute e lautolu ke fakamalolo fakaagaga aki a lautolu ke maeke ke fakalatalata he ha matakuene ha lautolu ke he tau gahua kelea he lalolagi ti kalo kehe mai he ha malaia.
Maeke fefe ia tautolu ke moua e fiafia lahi he moui? To fakamaama he gutuvagahau ka aahi e mena nai he lauga fakahiku “Aoga ne Mai he Fakagahuahua e tau Matapatu Fakaakoaga Tohi Tapu mo e Maamaaga.” To fakakite e ia e tau fakataiaga he fakagahuahua e Kupu he Atua ke lagomatai a tautolu ka lauia mo e tau fakalavelave, ke taute e tau fifiliaga, mo e moua moli e aoga he tau mena ne fakaako mai e Iehova ki a tautolu.
Ko lautolu ne manako ke tukulele atu ke he Atua he papatiso he toloaga kua lata ke fakailoa fakamafiti ke he fekafekau leveki. Kia makaukau ke fakamailoga hifo e aho he kalena hau ka fakailoa e aho he toloaga pauaki, ti kaki ke fakatoka e tau puhala ke moua e aoga mai he fakaholoaga uhoaki nai. Aua fakateaga ha vala he aho toloaga pauaki nai! Kia fakamalolo ai a koe ke fakauka e fakatokaaga kelea nei mo e fakatumau ke tua fakamoli ki a Iehova.