Fakaholoaga Fou he Toloaga he Aho Pauaki

Ko e matapatu he fakaholoaga he toloaga he aho pauaki ma e tau he fekafekauaga fou nukua ha ha i ai e fakaveaga malolo faka-Tohi Tapu: “Kia Omaoma a Mutolu ke he Atua​—Totoko ke he Tiapolo.” (Iako. 4:7) Ko e takitakiaga mitaki anei ma e tau magaaho uka nei! Ko e omaoma ha tautolu ke he tau poakiaga he Atua kua tuku a tautolu ke fetoko fakahako mo Satani. To fakaako he fakaholoaga a tautolu ke he puhala ke tutu mau he totoko ke he tau lagatau kelea mo e moumou tua he Tiapolo. Ko e heigoa falu tanakiaga fakaagaga ka moua e tautolu he toloaga nei?

To fakakite he leveki he takaiaga e puhala ka fakamalolo he “Fakakite e Omaoma Faka-Atua e Lautolu he Magafaoa” ke totoko ke he tau pehiaaga he lalolagi. Ko e lauga fakamua he tagata ahiahi he aho, “Kakano ke Totoko e Tiapolo,” ka fakamaama e kakano mo e puhala kua lata ia tautolu ke fakamalolo ke totoko e tau foliaga ha Satani ke moumou e tuaga fakaagaga ha tautolu. Ua e vala kua tauteute pauaki ma e tau fuata, nukua lata foki ke mataala ke he tau lagatau he Tiapolo. Tokologa e tau Kerisiano kua fuata mogonei ne matauka ke fakatauo mo e tau manako he lalolagi he magaaho ne ikiiki a lautolu. To fiafia a tautolu he logona e tau talahauaga fakatagata ha lautolu.

Ko e omaoma ke he tau tui kua lata mai ia lautolu oti ne ha ha he fakalatahaaga tagata. Ti, ko e lauga fakahiku he tagata ahiahi ka fakamaama mai fa la e fahi kua lata ke fakakite ha tautolu a omaoma faka-Atua: (1) ke he tau fakatufono, (2) i loto he fakapotopotoaga, (3) i loto he tau gahua tupe, mo e (4) i loto he magafaoa. Ko e fakaholoaga aoga ha a ia!

Ko lautolu kua manako ke papatiso he aho toloaga pauaki nei kua lata ke fakailoa fakamafiti ke he fekafekau leveki he fakapotopotoaga. Kua lata ke fakamailoga e tautolu oti e aho he tau kalena ha tautolu mo e pulega ke fakalataha atu ke he fakaholoaga katoa he toloaga. To tukulagi e tau monuina ka moua e tautolu he muitua tukumalagi a tautolu ki a Iehova.