Fakaholoaga he Aho Toloaga Pauaki ma e 2010
1. (a) Ko e heigoa e tau mataulu faka-Tohi Tapu he aho toloaga pauaki ne fakamaama he tau tau e kua mole? (e) Fai fakamaamaaga mooli nakai a koe mai he tau aho toloaga pauaki kua mole ne lagomatai a koe ke he haau a gahua he fonua?
1 “Kia Mailoga e Tau Mena ne Mua e Aoga,” “Tumau Fakalataha ke he Taha e Fuifui,” “Fakatumau ke Talahau e Kupu Mooli,” mo e “Ko Tautolu ko e Kelekele—Ko Iehova ha Tautolu a Eke Kapiniu Kelekele.” (Filipi 1:9, 10, 27; Ioane 18:37; Isaia 64:8, NW) Ko e falu ni anei he tau mataulu loga ne fakatutala he tau aho toloaga pauaki kua mole ki tua. Makai nakai a koe ke fina atu ke he aho toloaga pauaki ma e tau he fekafekauaga he 2010? To fakalaulahi ai e matakupu: “Kua Gahoa e Tau Aho kua Toe,” ne moua mai he 1 Korinito 7:29.
2. Liga moua fēfē e makai ma e toloaga nei?
2 Kamata ke atihake e makai ma e aho toloaga pauaki ka fakailoa agataha e aho he fakapotopotoaga haau. Kua lagomatai he falu matua e tau tama ha lautolu ke amaamanaki atu ke he toloaga he tohi e aho he kalena he magafaoa, fakalataha mo e tau mena kua lata ke uta he tau tagata takitaha, ti kamata totou hifo e tau aho ke hoko ke he aho ia. Ke he Tapuakiaga he Magafaoa he afiafi, kua liga manako a koe ke liu fakamanatu e tau mena ne tohi hifo mai he tau aho fonoaga pauaki he mogo kua mole. Kua maeke ia koe ke tauteute foki e loto haau ke lata ma e fakaholoaga nei he liu kumikumi e Benefit From Theocratic Ministry School Education, lau 13-16, ke lagomatai a koe mo e magafaoa haau ‘ke mataala ke he ha mutolu a fanogonogo.’—Luka 8:18.
3. Maeke fēfē ia tautolu ke aoga katoatoa he mena ka fakatoka mai he toloaga?
3 Fakagahua e Mena ne Fakaako e Koe: Ko e talahauaga logona mau ka oti e fonoaga, “Ko e fakaholoaga homo ue atu mooli a ia!” Tonu tumau e mena ia, ha ko e taha anei he tau foakiaga loga mai ia Iehova. (Fakatai 10:22) Ke maeke e vala tala ke fua mitaki, kua lata ia koe ke manamanatu fakahokulo ki ai mo e taofi mau ki ai. (Luka 8:15) Fakaaoga taha magaaho haau he liu atu ki kaina ka hili e toloaga ke fakatutala ke he fakaholoaga mo e magafaoa po ke mo lautolu he motokā haau. Fetutalaaki ke he tau foliaga mo e tau manatu ka lagomatai a koe he haau a gahua he fonua. He taute pihia to lafi ke he aoga haau mai he tau vala tala he toloaga ne kua leva e mole.—Iako. 1:25.
4. To uho pauaki he ha e toloaga nei ma tautolu?
4 Kua logona hifo e tautolu e uho lahi tumau ka moua e tautolu e mena fakaalofa aoga nukua lagomatai ai ki a tautolu. Nakai kia manamanatu fakamakai a tautolu ke he aho toloaga pauaki hane fakatoka mai e Iehova i mua? Maeke ia tautolu ke iloa mooli to aoga ai ke he tau puhala kehekehe. Kua amanaki a tautolu ke moua mai he ha tautolu a Matua he lagi, ko Iehova e mena fakaalofa kua hako, he puhala he fakamalolō mo e fakamahani he fakatumau ke he gahua ne kotofa mai e ia ki a tautolu ke taute.—2 Timo. 4:2; Iako. 1:17.