Fakatokaaga Fou ke Liu Fakamanatu e Tau Fakaholoaga he Toloaga

He tolomaki e lalolagi ha Satani mai he kelea ke he kelea muitui, kua fakamalolo e Iehova “kia tiaki e tautolu e tau mahani hepehepe, katoa mo e tau manako lahi he lalolagi, ka kia nonofo fakalatalata a tautolu mo e tututonu katoa mo e mahani Atua.” (Tito 2:12) Falu he tau foakiaga ne taute e ia kua puhala mai he “fekafekau fakamoli mo e loto matala” he tau fakaholoaga he toloaga he takaiaga mo e aho toloaga pauaki lagataha he tau. (Mata. 24:45) Ko e fakamaloloaga ha ia ka moua e tautolu mai he tau fakapotopoto fakaagaga pehenei!

Ke lagomatai a tautolu ke taofi mau mo e fakagahuahua e tau fakaakoaga nukua foaki mai, kua ha ha e fakatokaaga fou ke liu fakamanatu e tau fakaholoaga toloaga ka fakaaoga ai he tau he fekafekauaga he 2005. Kua ha ha he lau 5-6 he uho nei e tau vala kua foaki mai ke kitekite tuai ke he tau mena ka fakatoka mai pihia mo e tau huhu liu fakamanatu ma e fakaholoaga he tau toloaga takitaha. Ko e tau fakapotopotoaga to fakatutala e vala nei he Feleveiaaga Fekafekau he nakai leva ato o atu mo e nakai leva he mole e o mai ha lautolu he tau toloaga. To fakatokatoka fefe e mena nei?

He taha po ke ua e fahi tapu ato o atu e fakapotopotoaga ke he toloaga he takaiaga, ko e lauga hogofulu minuti ne fakave ke he vala tala “Fakaholoaga Fou he Toloaga he Takaiaga” to taute ai he Feleveiaaga Fekafekau ke fakalagalaga e amaamanaki ke he fakaholoaga. Ko e tagata lauga to kitekite foki ke he tau huhu liu fakamanatu mo e fakamalolo e tau tagata oti ke fakamaumau e tau manatu he tauteute ma e liu fakamanatu ka mui mai he tau fahi tapu gahoa ka mole e toloaga.

He gahoa e fahi tapu he mole e toloaga, to ha ha e liu fakamanatu 15 minuti hagaao ke he aho fakamua he fakaholoaga he toloaga ka putoia ai he Feleveiaaga Fekafekau. He fahi tapu hake, to 15 e minuti ka fakaaoga katoa ke liu fakamanatu e aho ke uaaki he fakaholoaga. Ko e tau huhu liu fakamanatu kua foaki mai i loto he uho nei ka fakaaoga ke fakamatapatu aki e tau fakatutalaaga ia. Kua lata e liu fakamanatu ke onoono fakatonutonu ke he aoga he tau vala tala. Ko e tau motua to liga fakatokatoka ke taute fakaku, nakai taute, po ke liu setulu falu vala he Feleveiaaga Fekafekau ka e fakaata ke taute e tau fakaholoaga liu fakamanatu nei.

Ko e fakatokatokaaga taha nei ni ka taute ke lata mo e fakaholoaga he aho toloaga pauaki, ka e taha ni e vala 15 minuti ke liu fakamanatu e fakaholoaga katoa. To manako oti a tautolu ke toka e uho nei mo fakaaoga ke aoga katoatoa mai he tau fakaakoaga mitaki kua foaki mai e Iehova.​—Isaia 48:17, 18.