Kia Feaki Hake e Manamanatu Hau

¹ He tau aho matematekelea fakahikuhiku nei ne ha ha i ai a tautolu, kua tolomaki atu ki mua e tau pehiaaga mo e loga e tau kamatamata uka kehekehe ne fehagai e tau tagata he Atua ke he lalolagi katoa. (2 Timo. 3:1-5) Kua lata oti ia tautolu mo e fakamafanaaga ke tumau ke he tua. (1 Kori. 16:13) Kua maeke ia tautolu ha ko e lagomatai ha Iehova he fagafagai tumau a tautolu ke he Kupu hana, he falanaki ke he agaga hana, mo e piki tata atu ke he hana a fakatokatokaaga.​—Sala. 37:28; Roma 8:38, 39; Fakakite. 2:10.

² Mo e kakano mitaki ia, ko e matapatu tala “Kia Eke mo Tau Tagata Lalahi ke he Manamanatu” ne fakapapahi ke he fakaholoaga he aho toloaga pauaki he tau kua mole. Fakave ai ke he 1 Korinito 4:20, totou i ai e tautolu e tau kupu he aposetolo ko Paulo: “Ko e tau matakainaga na e, ua eke a mutolu mo tau tama iki ke he manamanatu; ka e eke a mutolu mo tau tama mukemuke ke he kelea, ka kia eke mo tau tagata lalahi ke he manamanatu.” Fefe hau a manatu ke he fakaholoaga?

³ “Mafanatia ha ia!” “Kua lata lahi mo mautolu!” Ko e falu tali a ia ne logona mai. Manatu pihia e taha tagata i tua ne hau ke he aho toloaga pauaki ke kitekite e papatisoaga he hana tama fifine 12 e tau tau mo e pehe ne nava lahi e ia e fakaholoaga mo e kitia e ia e puhala kua maeke hana magafaoa ke aoga mai. Pihia foki nakai e logonaaga hau? Liliu la tautolu ke fatiaki mai e falu matapatu manatu he fakaholoaga.

⁴ Ko e Maama Mitaki ke Feaki Hake e Manamanatu: Kamata ai mo e lauga, “Feaki Hake Hau a Manamanatu Mogonei,” heigoa ne peehi he tagata lauga ne lata ke taute ka fehagai mo e tau paleko he vaha nei? Nakai ni ko e iloilo ne lata. Ka e lata ke feaki hake mo e fakahokulo e manamanatu faka-Tohi Tapu ha tautolu, neke kaumahala a tautolu he tau mahani kelea ne fakatapakupaku ki ai a tautolu. Ko e manamanatuaga anei kua lata mo e takitakiaga he Atua. Tuga e Salamo, kia fakamahani a tautolu ke liogi ki a Iehova ke fakamaama mai a tautolu he tau fakatufono mo e tau talahau hana ke maeke ia tautolu ke fekafekau mo e loto katoatoa ki a ia.​—Sala. 119:1, 2, 34.

⁵ He vala ne mui mai, ne fakakite he leveki he takaiaga kua foaki mai e Iehova, puhala he Kupu mo e he fakatokatokaaga hana, e “Tau Lagomatai ke Eke mo Tau Tagata Lalahi ke he Manamanatu he Tohi Tapu.” Ko e kakano he manamanatu ko e “iloilo ke kikite e manatu ke iloa e kakano he tau fahi kehekehe i ai mo e katoaaga hana, ke moua mai e maama mitaki katoatoa.” Ko hai ka lagomatai a tautolu ke feaki hake e iloilo nei? Kua foaki e Iehova e tau mena fakaalofa ke he tau tagata ke lagomatai a tautolu ke tolomaki atu fakaagaga. (Efeso 4:11, 12) Kua tomatoma tumau he hana fakatokatokaaga he lalolagi a tautolu ke totou he tau aho takitaha e Kupu he Atua mo e fakalataha tumau he tau fakapotopotoaga oti. (Sala. 1:2) Kua fakaako a tautolu ke fakaaoga e Tohi Tapu mo e tau tohi faka-Kerisiano kaeke ke ako fakatagata po ke auloa mo e magafaoa, pihia foki ka tauteute ma e tau feleveiaaga mo e ka o atu he fonua. Fakaaoga nakai e koe e tau puhala nei? Kua taute nakai e fakaholoaga ke totou tumau hau a Tohi Tapu? Ko e mena lata lahi anei kaeke ke puipui a tautolu neke lautaki he tau fakahehe, tau aga, tau pulotu nakai aoga, mo e tau fakavaia he lalolagi.​—Kolo. 2:6-8.

⁶ Kia Fakaako e Manamanatu ha Tautolu: He lauga fakapa hana, kia “Leveki e Aga Fakaagaga Hau he Fakamahani ke Ako Mua Ai,” ne fakamaama e ia ne aahi mai nakai fakaai ia lautolu he lalolagi ke mailoga e mena hako ke he mena hepe. (Isa 5:20, 21) Kakano anei nukua nakai talia mo e omaoma a lautolu ke he tau fakatufono tututonu he Atua. Ka e nakai pihia a tautolu, ha kua fakaako ke he tau mahani fakaagaga he fakatokatokaaga a Iehova kua mailoga e tau fakatufono he Atua, ke eke mo puhala ke takitaki e tau gahua mo e tau mahani ha tautolu. Ko e mena ia, ha ia tautolu e puhala ke kumikumi e tautolu ma tautolu ni po ke heigoa e mena mitaki mo e taliaaga ke he fofoga a Iehova mo e fakalata ke he finagalo hana.​—Roma 12:2.

⁷ Ke kalo kehe mo e tau manamanatuaga keukeu he lalolagi ne tupu mai e tau fua kelea, aoga ia tautolu he fakaako tumau e manamanatuaga ha tautolu. Maeke fefe e mena nei? He fakamau hifo he Heperu 5:12-14, ne peehi he aposetolo ko Paulo e aogaaga ke fagafagai he tau mena mua atu ke he “huhu” he kupu. Aoga lahi ia tautolu ke he tau mena kai fakaagaga kakano, tuga ne moua e tautolu ke he tau porosua he tau Fakaakoaga Tohi he Fakapotopotoaga. Ati fakagahuahua agataha ke he tau momoui ha tautolu e tau mena ne ako e tautolu. Ka taute pihia, to iloa tonuhia e tautolu e hakoaga he tau matapatu fakaakoaga mo e tau fakatufono ha Iehova. Fakaako he mena nei e manamanatu ha tautolu ke mailoga maali e mena hako mai he mena hepe.

⁸ Ka e momoko, ha kua fakalolelole fakaagaga e falu. Ko e ha? Nukua nakai onoono fakamahao a lautolu ke he mena mitaki mo e tutonu ke he fofoga a Iehova. Ko e fua, kua auhia ke he tau letio mo e tau ata fakatutalaaga televisoni mo e tau kupu kelea ke he Tohi Tapu a lautolu, tau leo kofe kelea, po ke lauia kelea he tau poko tututala he komopiuta. He taute e mahani fakailoilo, kia kalo kehe a tautolu neke putoia ai ke he tau tagata mahani faivao, goagoa, po ke mahani kelea.​—Fakatai 13:20; Kala. 5:7; 1 Timo. 6:20, 21.

⁹ Kia Eke e Tau Fuata “Mo Tau Tama Mukemuke Ke He Kelea”: Ne ua e maga he fakaholoaga ne taute pauaki ke fakamalolo e tau fuata ke feaki hake e manamanatu ha lautolu. Fakakite mai he tagata lauga ke eke “mo tau tama mukemuke ke he kelea” ko e kakano ke nonofo fakatotonu, tuga ia, e mukemuke goagoa, hagaao ke he tau mena nakai mea ki mua a Iehova. (1 Kori. 14:20) Kua fakamalolo oti a tautolu ke fakalaulau e tau puhala ha tautolu ne fakaaoga e tau taimi ha tautolu ti aua haga atu kaeke fakatapakupaku ke he tau puhala kelea mo e kalo kehe neke pikitia ki ai. (Efeso 5:15-17) Ne fakamafana ke fuafua e tau magaaho kua fakaaoga e tautolu he totou e tau tohi ne nakai fakatolomaki e tupuaga ha tautolu ke maama e tau mena fakaagaga. Taute nakai e koe e mena ia? Heigoa e mena ne fua mai? Lafi atu ke he totouaga he Tohi Tapu he tau aho takitaha, kia fakamakutu ke fakatumau e totouaga he tau tohi ne foaki mai he fakatokatokaaga. Ka taute e mena nei, pihia mo e tau tama ikiiki, to lagomatai a tautolu oti ke ‘moua mai ai e pulotu.’​—Fakatai 4:7-9.

¹⁰ “Aoga ne Mai he Fakagahuahua e Tau Matapatu Fakaakoaga Tohi Tapu mo e Maamaaga”: Ko e mataulu tala ia he lauga fakahiku ke he fakaholoaga he toloaga he aho pauaki. Fakamaama mai e ia ne ati mai pauaki ko Iehova ko e Punaaga he tau manamanatu foaki-moui, ne mua atu ke he tau tagata katoa. Manamanatu la kaeke moua e puhala ke hafagi aki e maamaaga a Iehova! Ne foaki fakamokoi e ia ki a lautolu ne kumi mo e loto fakamoli mo e ole atu ha kua tua. (Fakatai 2:3-5, 9; 28:5) Fakaaoga fakalahi nakai e koe e tau foakiaga hana?

¹¹ Ne mafanatia ia tautolu he mailoga e puhala ke ako e tau matapatu fakaakoaga ne totou e tautolu he Tohi Tapu. (2 Timo. 3:16, 17) Ako fakatekiteki e puhala ke maama mitaki e tau talahauaga ha Iehova. Fakaaoga e magaaho ke manamanatu hifo ke he tau matapatu fakaakoaga nei ti fakamau hifo ke he loto mo e manamanatu hau. To fakaako he mena nei e manamanatuaga hau ke kautu a koe kaeke fifili e tau mena hagaao ke he mouiaga. (Iosua 1:8) O mai la tautolu ke kikite falu magaaho ne fehagai ai e tokologa mo e kitia e puhala ke kautu ai a tautolu ha kua fakagahuahua e tau matapatu fakaakoaga.

¹² ‘Lata kia ke muitua atu a au ke he taha faga tauteuteaga po ke tapulu?’ Na kua mahani ke kitia e aga fakateaga he lalolagi ke he tau tapulu mo e tau tauteuteaga fou. Tau aga pihia ne fakaohooho e tau tagata ke tui e tau taute fulufagu mo e nakai gali po ke tau tui fakataki. Heigoa e tau matapatu fakaakoaga he Tohi Tapu kua aoga ke lagomatai a tautolu ke fakahako e tau mahani pihia? Ha kua fakaako e tau manamanatu ha tautolu, kia kikite e tautolu e matapatu fakaakoaga ha ha he 1 Timoteo 2:9, 10, ke tui “mo e maimaina mo e mahani fakalatalata . . . , ko e mena haia kua lata mo e [tagata] tua kua talahaua e lautolu a lautolu kua mahani Atua.” Falu matapatu fakaakoaga ne aoga foki kua totoku he 2 Korinito 6:3 mo e Kolose 3:18, 20.

¹³ ‘Heigoa e puhala ke pipi fakamalolo e au e magafaoa haku?’ Ko e matutakiaga fakamitaki ke he vahaloto he magafaoa kua aoga lahi. Tala mai e Iakopo 1:19 ki a tautolu: “Kia takitokotaha e tau tagata mo e alumaki ke fanogonogo, kia fakatuai ke vagahau atu, kia fakatuai ke he ita.” Lata e magafaoa ke fefanogonogoaki mo e fetutalaaki katoa ha ko e matutakiaga he magafaoa ko e puhala fahi ua. Pete ni kua mooli e mena ne talahau e tautolu, kaeke talahau ke he puhala vale, fakatokoluga, po ke mahani fakateaga, ligaliga ni to fua mai e kelea nakai e mitaki. Ti, pete ko e matua tane po ke matua fifine, e matua po ke tama tote, kua lata e tau kupu ha tautolu “mo e fakaalofa, kia fakamasima ke he masima.”​—Kolo. 4:6.

¹⁴ ‘Lauia kia a au mo e mahani velevelemena?’ Ko e mahani velevelemena ko e peehiaga he lalolagi ne fakavihi aki e mouiaga he tagata. Nakai kua maeke ke fakamahafagi aki e gutuhala he fiafia. (Fakama. 5:10; Luka 12:15; 1 Timo. 6:9, 10) Ke lagomatai a tautolu ke kalo mai he heletia he mahani velevelemena, ne fakaako e Iesu a tautolu ke he matapatu fakaakoaga nei: Kia nonofo atu fakatekiteki. Ke moui e moui fakalaulau, ne nakai vihivihi, kua lata ia tautolu he ono tonu e tau mata ke he gahua he Kautu, mo e tuku uaaki e tau mena oti kana.​—Mata. 6:22, 23, 33.

¹⁵ Ko e Foliaga ma Tautolu: Ha ha ia tautolu e Kupu he Atua ko e punaaga tonu he tau matapatu fakaakoaga tututonu ke takitaki e tau fifiliaga ha tautolu. Lata ia tautolu ke ako e tau matapatu fakaakoaga nei, ke manamanatu hifo ki ai, mo e manamanatu ke he puhala ke fakagahuahua ai ke he tau momoui ha tautolu. He taute pihia kua ‘ako mua ai ke mailoga e tau mena mitaki mo e tau mena kelea,’ ke aoga ai ni ki a tautolu mo e fakalilifu ki a Iehova.​—Hepe. 5:14.