Tau Fuata—Kia Fakaako e Mahani ha Mutolu!
“Ko e tau mena kakano, kua lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.”—HEPERU 5:14.
1, 2. (a) Fakatatai fefe e tuaga ha tautolu he vaha nei ke he tuaga he tau Kerisiano he vaha i tuai i Efeso? (e) Ko e heigoa e tau fakalotomatala ka puipui a koe mai he haofia kelea, mo e feaki fefe e koe?
“HANAI, a mutolu kia o fakalaulau a mutolu; nakai tuga ne tau tagata goagoa ka kia tuga e tau tagata iloilo. Kia fakaaoga e mutolu e tau aho he mouiaga nai, ha kua kelea e tau aho ainei.” (Efeso 5:15, 16) Tali mai he tohi he aposetolo ko Paulo e tau kupu ia he ua afe tau ne mole, ‘ko e tau tagata mahani kelea mo e tau tagata kua fakavai, kua tolomaki atu a lautolu ke au atu he kelea.’ Kua nonofo a tautolu he “tau aho uka,” po ke he talahau he taha fakaliliuaga, ko e magaaho “pukeina he haofia kelea.”—2 Timoteo 3:1-5, 13; Phillips.
2 Ka kua maeke ia koe ke kalo mai he haofia kelea ka fakatalitali he puhala hau, he feaki e “loto matala, . . . iloilo mo e loto manamanatu.” (Tau Fakatai 1:4) Ne talahau he Tau Fakatai 2:10-12: “Ha ko e mena hoko atu e iloilo ke he loto hāu; ti mitaki foki kia koe e pulotu. To leveki a koe he loto manamanatu; to leoleo a koe he pulotu. Kia laveaki a koe mai he puhala he tagata mahani kelea; mai he tau tagata kua vagahau ke he tau mena fakavai.” Ka e maeke fefe ia koe ke feaki e tau fua ia? Ne pehe e Heperu 5:14: “Ko e tau mena kakano, kua lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.” Ke tuga ni taha feua, ke fakaaoga fakamitaki e mahani kua lata ke fakaako. Ko e kupu Heleni ne fakaaoga e Paulo kua kakano moli ke ‘fakaako tuga e tagata fakaako faofao.’ Maeke fefe a koe ke kamata e fakaakoaga pihia?
Fakaako Hau a Mahani
3. Maeke fefe ia koe ke fakaaoga e mahani hau ka ui ke taute e fifiliaga?
3 Mailoga ko e hau a mahani—ko e lotomatala ke mailoga e mitaki mai he kelea—kua fakaako ai he “ako mua.” He magaaho ka taute e koe e fifiliaga, tali manatu, taute mena ne manatu, po ke muitua ni ke he moto tagata ka lavea ni ke fua mai e fifiliaga pulotu. Ke taute e tau fifiliaga pulotu, lata ia koe ke fakaaoga e mahani hau. Fefe? Fakamua, he kumikumi fakamakutu ki ai mo e moua e tau tala moli. Huhu e tau huhu ka lata ai. Manamanatu ko e heigoa e tau fifiliaga hau. Ne talahau he Tau Fakatai 13:16: “Ko e tau tagata lotomatala oti, kua takitaha a lautolu mo e eke mena mo e iloilo.” Ka oti ti manamanatu ko e matafakatufono po ke matapatu fakaakoaga fe he Tohi Tapu ne talahau e matakupu ia. (Tau Fakatai 3:5) Ke taute e mena nei, moli, kua lata ia koe ke fai iloilo ke he Tohi Tapu. Ko e mena haia ne fakamalolo e Paulo a tautolu ke kai e “tau mena kakano”—ke ako “e laulahi, mo e loa, mo e hokulo, mo e tokoluga” he kupu moli.—Efeso 3:18.
4. Ko e ha ne latatonu ai ke iloilo ke he tau matapatu fakaakoaga he Atua?
4 Kua latatonu ai ke taute pihia, ha ko e tau tagata nakai katoatoa a tautolu, mo e fohifo ke he hala. (Kenese 8:21; Roma 5:12) “Kua mua ke he tau mena oti e loto he fakavai, ti gagao lahi ni a ia,” he talahau he Ieremia 17:9. Ka noa mo e tau matapatu fakaakoaga he Atua ke takitaki a tautolu, maeke ia tautolu ke fakavaia ni e tautolu a tautolu he manamanatu kua mitaki e mena kelea—kakano kua manako lahi a tautolu ki ai. (Fakatatai Isaia 5:20.) Ne tohia he salamo: “To eke ha kia e fuata ke fakamea hana tau mahani? Kia leoleo ki ai ke lata mo e hāu a tau kupu. Ko e hāu a tau fekau kua moua ai e au e lotomatala; ko e mena ia kua vihiatia ai e au e tau mahani pikopiko oti.”—Salamo 119:9, 104.
5. (a) Ko e ha e falu fuata ne muitua ke he mahani pikopiko? (e) Taute fefe he taha fuata e kupu moli ma hana ni?
5 Ko e ha falu fuata ne feaki hake he tau kaina Kerisiano ne muitua ke he mahani pikopiko? Pihia kia ha kua nakai la ‘kumikumi e lautolu ki a lautolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa’? (Roma 12:2) Falu kua liga fakatauo mo e tau matua ha lautolu ke he tau feleveiaaga ti maeke ke talahau foki falu he tau matapatu fakaakoaga he Tohi Tapu. Ka e, ka huhu ke fakamoli ha lautolu a taofiaga po ke fakamaama falu mena hokulo he Kupu he Atua, kua temotemoai e iloilo ha lautolu. Ko e tau fuata pihia kua mukamuka ke fakahehe. (Efeso 4:14) Ka moli e mena nei ki a koe, ko e ha he taute e tau hikihikiaga? Taha e matakainaga fifine fuata ne liu manatu: “Ne taute e au e kumikumiaga. Huhu hifo au ki a au ni, ‘Iloa fefe e au ko e lotu hako anei? Iloa fefe e au na fai Atua ne higoa ko Iehova?’”a He faala fakaeneene e tau kupu Tohi Tapu ne fakamoli ki a ia e tau mena ne fakaako he tau matua hana kua moli lahi!—Fakatatai Gahua 17:11.
6. Maeke fefe ia koe ke ‘kumikumi e tau mena kua fiafia e Iki,’ ko Iehova?
6 Kua mautali mo e iloilo ke he tau matapatu fakaakoaga a Iehova, to mukamuka lahi ia koe ke ‘kumikumi e tau mena kua fiafia e Iki ki ai.’ (Efeso 5:10) Ka e kua ka nakai iloa moli e koe e mena ke taute ka tupu taha mena? Liogi ki a Iehova ma e hatakiaga. (Salamo 119:144) Lali ke tutala ke he tau matua po ke taha Kerisiano motua ke he lekua ia. (Tau Fakatai 15:22; 27:17) Moua foki e tau hatakiaga he kumikumi ke he Tohi Tapu mo e ke he tau tohi he Kolo Toko. (Tau Fakatai 2:3-5) Ka lahi e fakaaoga e koe hau a mahani, to matila lahi ai.
Fakakite e Manamanatuaga ke he Fakafiafiaaga
7, 8. (a) Fakaaoga fefe e koe e mahani hau ke fifili ke finatu ke he fiafiaaga po ke nakai? (e) Ko e heigoa e onoonoaga he Tohi Tapu ke he fakafiafiaaga?
7 Kia onoono atu a tautolu he mogonei ke he puhala ka fakaaoga e koe e mahani hau ke he falu tutuaga pauaki. Manatu la, ke fakatai ki ai, kua uiina a koe ke he fiafiaaga. Liga moua foki e koe e laupepa ne fakatata e fiafiaaga ia. Tala atu ki a koe to tokologa e tau fuata Fakamoli ka ha ha ai. Ka kua fai totogi ma e tau mena fakaaoga i ai. To fano nakai a koe?
8 E, kua lata ke fakaaoga e mahani hau. Fakamua, kumikumi ke iloa mitaki. Ko e lahi fefe e fiafia nei? Ko hai ka o atu ki ai? To kamata he mogo fe? Ti oti he mogo fe? Ko e heigoa e tau mena ka taute? To leveki fefe? Oti, ti kumikumi ke he tau vala taha “Tau Fiafiaaga Auloa,” mo e “Fakafiafiaaga” i loto he Watch Tower Publications Index.b Liga ko e heigoa ka kitia he kumikumiaga hau? Taha mena, kua nakai vihia e Iehova e fakalataha ke fiafia. Ha kua pehe e Fakamatalaaga 8:15 “kua nakai fai mitaki ke he tagata i lalo he la, ka kia kai a ia, mo e inu, mo e fiafia,” katoa mo e gahua lahi. Ti kua finatu foki a Iesu Keriso ke he tau kaiaga mo e ke he taha mauhoana. (Luka 5:27-29; Ioane 2:1-10) Ka fakalaulau, to aoga e lafi auloa ke fiafia.
9, 10. (a) Ko e heigoa e tau haofia kelea ka tupu mai he falu fiafiaaga? (e) Ko e heigoa e tau huhu ka huhu e koe ki a koe ni fakamua to fifili ke finatu ke he fiafiaaga po ke nakai?
9 Pete ia, ka kelea e puhala fakatokatoka he fiafiaaga to lafi ki ai e tau lekua. He 1 Korinito 10:8, kua totou e tautolu hagaao ke he tau fakalatahaaga goagoa ne takitaki ke he feuaki mo e mahaikava ha lautolu “ke he aho taha ne uafulu e afe, ti tolu e afe [tau Isaraela nakai fakamoli].” Taha hatakiaga mao ne ha ha ia Roma 13:13: “Kia mahani fakamitaki a tautolu kua lata mo e aho; aua neke tafeauhi mo e konahia, aua neke feuaki mo e matahavala, aua neke taufetoko mo e mahekeheke.” (Fakatatai 1 Peteru 4:3.) Moli, kua nakai fai fakatokaaga ko e fiha ka o mai ke he fiafiaaga. Ka kua fakakite mai he tau mena ne tutupu fakamua ka lahi e fiafiaaga, to uka he leveki. Ko e tau fiafiaaga ikiiki, mo e mitaki e fakaholoaga to nakai hoko ke tuga e “tau fiafiaaga kolokolovao.”—Kalatia 5:21, Byington.
10 Ko e kumikumiaga hau ka fakatupu mai falu a huhu, tuga anei: To ha ha ai nakai ha tagata Kerisiano motua he fiafiaaga? Ti ko hai ne lagomatai? Ko e kakano kia he fiafiaaga ke fakamalolo e lafiaga lilifu po ke tuli tupe ma e taha tagata? Fai kaupaaga nakai po ko hai ka o? Kaeke ko e fiafiaaga he matahiku fahitapu, to oti nakai he magaaho kua lata ke maeke ia lautolu i ai ke fakalataha ke he fekafekauaga Kerisiano he aho hake? Kaeke fai leo kofe mo e koli, to taute nakai hagaao ke he tau tutuaga faka-Kerisiano? (2 Korinito 6:3) Ke huhu pihia kua nakai mukamuka. Ka kua hataki mai e Tau Fakatai 22:3: “Kua kitia he tagata lotomatala e kelea, mo e fakamumuli ai a ia; ka ko e tau tagata goagoa, kua o age ai a lautolu, ti fakahala ai a lautolu.” E, kua maeke ia koe ke kalo mai he tau tutuaga haofia kelea he fakaaoga e mahani hau.
Manamanatu he Pulega e Fakaakoaga Hau
11. Maeke fefe he tau fuata ke fakaaoga e mahani ha lautolu he pulega ma e vaha anoiha?
11 Talahau he Tohi Tapu kua pulotu ke pulega ma e vaha anoiha. (Tau Fakatai 21:5) Kua tutala nakai a koe mo e tau matua hau hagaao ke he vaha hau anoiha? Liga pulega a koe ke hu atu ke he fekafekauaga mau ko e paionia. Moli, kua nakai fai feua pauaki ka ta mai e makona lahi. Kaeke kua feaki e koe e puhala kumikumi mitaki mo e ati hake e tau makaka pauaki he fekafekauaga, kua mautauteute a koe ma e feua fiafia nei. Kua manamanatu nakai a koe to moua fefe e koe e lagomatai ke he fekafekauaga? Kaeke, fifili a koe ke fai magafaoa anoiha, to maeke nakai a koe ke leveki e matagahua lafi mai ia? Ke taute e tau fifiliaga lagotatai mo e moli hagaao ke he tau mena pihia kua lata ke fakaaoga e mahani hau.
12. (a) Kua fifili fefe he falu magafaoa ke fehagai ke he tuaga hikihiki fakatupe? (e) Kua nakai kia lata ke moua e fakaakoaga lafi ki luga ne ha ha ai e foliaga ke gahua paionia? Fakamaama.
12 He falu motu kua maeke agaia ke moua e gahua fakamahani ke he feua ka moua e fai lagomatai. Ha ha ai e tau fuata ne kua ako e pisinisi he magafaoa po ke moua e fakamahani mai he tau kapitiga motua ne fai pisinisi. Falu kua uta e tau fakaakoaga he aoga, ka aoga mitaki ma e moui he vaha i mua. Ka nakai fai mena pihia, liga lata he tau matua ka oti e manamanatu ki ai ke fakatoka ma e fanau ha lautolu ke moua taha fakaakoaga foki ka oti mai he aoga tokoluga. Ke pulega pehenei ke moua e levekiaga ke he tau matagahua ka lalahi hake mo e mua atu ke fakalataha ke he gahua paionia ke leva kua nakai totoko ke he tuku fakamua e Kautu he Atua. (Mataio 6:33) Mo e fakaakoaga lafi ki luga kua nakai pehe ke tiaki e gahua paionia. Taha e Fakamoli fuata, ke fakatai ki ai, ne kua leva e manako ke paionia. He oti e aoga tokoluga hana, ne fakatokatoka he tau matua hana—ko e tau paionia mau foki a laua—ke moua foki e ia taha fakaakoaga. Ati maeke ai a ia ke paionia ka e fakaako agaia, mogonei moua e ia e gahua pauaki ne kua lagomatai aki a ia ni he fakatumau ke he gahua paionia.
13. Lata fefe e magafaoa ke manamanatu ke he fua he fakaakoaga lafi ki luga?
13 Ko e fakaakoaga lafi ki luga, kua ha ha he tau magafaoa takitaha e tonuhia mo e matagahua ke taute ni ha lalu fifiliaga. Ka fifili fakamitaki e fakaakoaga pihia, to lagomatai lahi. Ka kua maeke foki ke eke mo matahele. Kaeke ke manamanatu a koe ke he fakaakoaga pihia, ko e heigoa e foliaga hau? Ke tauteute kia a koe ke fehagai mo e tau matagahua ko e tagata lahi ke he puhala lilifu? Po kua “kumi kia e koe e tau mena lalahi māu?” (Ieremia 45:5; 2 Tesalonia 3:10; 1 Timoteo 5:8; 6:9) Ka e kua ka kumi e fakaakoaga lafi ki luga ne mamao mo e kaina, ti liga nofo he taha fale aoga? Kua pulotu kia e mena ia ka lauia mo e hatakiaga a Paulo “ko e feoaki mo lautolu kua mahani kelea kua kelea ai e tau mahani mitaki”? (1 Korinito 15:33; 2 Timoteo 2:22) Manatu foki, “kua gahoa e tau aho kua toe.” (1 Korinito 7:29) To liga lahi fefe e magaaho ka fakamole e koe ke he fakaakoaga pihia? To lahi mahaki kia e vaha fuata hau ka fakamole ki ai? Ka pihia, to fakagahuahua fefe e koe e fakamaloloaga ke “manatu a a koe ke he hāu a vaha fuata kia ia ne eke a koe”? (Fakamatalaaga 12:1) Taha mena foki, to fakaata nakai he tau fakaakoaga hau taha magaaho ma e tau gahua aoga faka-Kerisiano tuga e o atu ke he feleveiaaga, gahua he fonua, mo e fakaako fakatagata? (Mataio 24:14; Heperu 10:24, 25) Kaeke kua malolo e mahani hau, to nakai galo ia koe e tau foliaga fakaagaga he pulega e koe mo e tau matua hau e vaha hau anoiha.
Kia Fakalilifu e Fakamahaniaga
14. (a) Ko e matapatu fakaakoaga fe ka hataki e hoa he fakakite e laua e fefakameameaaki? (e) Fakakite fefe he falu hoa e fifiliaga kelea ke he mena nei?
14 Taha fahi foki ne kua lata mo e mahani hau ko e fakamahaniaga he tagata tane mo e fifine. Ko e manako pauaki ke fakameamea ke he taha ne manako a koe ki ai. Ko e hoa mahani mea i loto he Lologo a Solomona kua kitia moli ke fehikitaki falu a fakatataaga he fakameamea ato mau a laua. (Lologo a Solomona 1:2; 2:6; 8:5) He vaha nei, kua manatu pihia falu hoa fakamahani ko e tautuilima, taufigita, mo e taufepekaaki kua lata, mua atu ka tata lahi ke mau. Ka e manatu: “Ko ia kua tua ke he hana loto, ko e tagata goagoa a ia.” (Tau Fakatai 28:26) Kua matulituli ai, ha kua fakakite he falu hoa e fifiliaga kelea he tuku ne lautolu a lautolu he tau tutuaga haofia kelea. Ko e tau fakatataaga he fakameamea kua hokulo lahi mo e nakai fai fakauka; kua fua ai e tau gahua kiva ti fakaholo atu foki ke he mahani kelea he fakatane mo e fifine.
15, 16. Ko e heigoa e tau puipuiaga mitaki ka taute he hoa ke iloa tonu to lilifu tumau e fakamahaniaga ha laua?
15 Kaeke kua fakamahani a koe, kua pulotu ia koe ke kalo mai he nonofo tokoua ni mo e hoa hau ke he tau tutuaga nakai lata. Ti kua mitaki ni ke olioli auloa e feoakiaga ha mua mo e falu tagata foki po ke he tau mena ne kitia ai e tau tagata. Falu hoa ne fai tagata mo laua. Kia mailoga foki e tau kupu ia Hosea 4:11: “[Ko e] uaina fou kua uta kehe ai e loto.” Fakagoagoa he kava e fifiliaga mitaki ti tataki e hoa ke taute taha mena ka tokihala he magaaho fakamui.
16 Ne talahau he Tau Fakatai 13:10: “Ko e taufetoko hokoia ni kua tupu mai he mahani fakatokoluga; ka kua iloilo a lautolu kua omaoma ke he pule.” E, kia ‘iloilo a mutolu’ mo e tutala ke he puhala ka takitaki e mutolu a mutolu. Fakakaupa e tau fakatataaga he fakameamea, he fefakalilifuaki ke he tau manako mo e manamanatuaga. (1 Korinito 13:5; 1 Tesalonia 4:3-7; 1 Peteru 3:16) Ke tutala hagaao ke he matakupu fakataputapu nei kua liga uka he magaaho fakapa, ka kua lata ni ke puipui mai he tau lekua lalahi ka tutupu he magaaho fakamui.
Kua Fakaako “Tali Mai he Vaha Tote”
17. Taute fefe e Tavita a Iehova ke ‘tua ki ai tali mai he vaha tote,’ mo e ko e heigoa e lesoni ma e tau fuata he vaha nei?
17 Ke kalo mai he tau matahele a Satani kua lata ke mataala tumau a koe—mo e falu magaaho, fakamalolo lahi. Ha ko e falu magaaho kua kehe lahi a koe, nakai ni ke he atu hau, ka e pihia foki ke he lalolagi katoa. Ne liogi e salamo ko Tavita: “Ko koe kua amaamanaki au ki ai, ma Iki na e, ko Iehova, ne tua ki ai au tali mai he vaha tote. Ko e Atua na e, kua fakaako e koe au tali mai he vaha tote; kua hoko mai foki ke he vaha nai kua fakakite gaia au hāu a tau mana.” (Salamo 71:5, 17)c Kua talahaua a Tavita ha ko e hana malolo. Ka e feaki e ia ne fe? He vaha tote! Ti fakamua ke he fehagaiaga mahuiga hana mo Koliato, ne fakakite e Tavita e hana malolo ne mua he puipui e tau mamoe he hana matua tane—he kelipopo e leona katoa mo e urosa. (1 Samuela 17:34-37) Pete ia, ne tuku e Tavita ki a Iehova e lilifu katoa ke he malolo ne fakatata e ia, ati talahau ke ‘tua a ia ki a Iehova tali mai he vaha tote.’ Ko e lotomatala ha Tavita ke falanaki ki a Iehova ne taute pihia foki a ia ke he ha kamatamata ne fehagai mo ia. To fioia foki e koe ka falanaki a koe ki a Iehova, to foaki e ia ki a koe e malolo mo e mauokafua ke ‘kautu ke he lalolagi.’—1 Ioane 5:4.
18. Ko e heigoa e tomatomaaga ne foaki ke he tau fuata mahani Atua he vaha nei?
18 Totou afe e tau fuata tuga a koe hane taute e tuaga malolo mo e kua fekafekau he mogonei mo tau tagata fakailoa he tala mitaki. Fakaaue a mautolu ke he Atua ha ko e tua mo e malolo ha mutolu ma tau fuata! Kia fakamalolo ke fehola kehe he kelea he lalolagi. (2 Peteru 1:4) Kia fakatumau ke fakaaoga hau a mahani ne fakaako he Tohi Tapu. He taute pihia ka puipui mai a koe he matematekelea he mogonei mo e to fakahiku ke fakamoli e fakamouiaga hau. E, tuga ni ka fakakite he vala tala fakahiku ha tautolu, to fakakautu e koe e moui hau.
[Tau Matahui Tala]
a Kikite e vala tala “Huhu e Tau Tagata Fuata . . . Maeke Fefe Au ke Taute e Kupu Moli Ma Haku Ni?” he Oketopa 22, 1998, fufuta he Awake!
b Ko e vala tala “Fakafiafiaaga Auloa—Olioli e Tau Fua Mitaki, Kalo Mai he Tau Matahele” ne kitia he Aokuso 15, 1992, fufuta he The Watchtower ne ha ha i ai e tau fakailoaaga mahuiga ke he matakupu nei.
c Kua tuga e matutaki mai e Salamo 71 he Salamo 70, ne kua fakakite he puhala ne tohia ai ko e salamo a Tavita.
Tau Huhu ke Fakamanatu
◻ Fakaako fefe he fuata hana mahani?
◻ Maeke fefe he fuata ke fakaaoga hana mahani ka finatu ke he tau fiafiaaga Kerisiano?
◻ Ko e heigoa e tau mena ka mailoga he pulega e fakaakoaga he taha tagata?
◻ Maeke fefe e hoa ne hane fakamahani ke kalo mai he matahele he mahani kelea he fakatane mo e fifine?
[Fakatino he lau 23]
He ako ke taute e kumikumiaga ka lagomatai a koe ke fakaako e mahani hau
[Fakatino he lau 24]
Kua mukamuka e tau fiafiaaga ikiiki ke leveki mo e nakai tupu e tafeauhi
[Fakatino he lau 24]
Lata he tau matua ke lagomatai ha lautolu a fanau ke pulega e fakaakoaga ha lautolu
[Fakatino he lau 25]
Ke fakamahani e tagata tane mo e fifine fakalataha mo e matakau tagata ko e puipuiaga