Foakiaga ma e Tau Fekafekau Kerisiano
1. Ko e heigoa e fakaholoaga foou ne kamata he 1938, ti ko e heigoa e kakano?
1 He 1938, ne kamata he fakatokatokaaga a Iehova e fakaholoaga foou. Ne uiina e tau matakau he tau fakapotopotoaga ke o atu ke he tau toloaga he matakavi, mogonei kua fakahigoa ko e tau toloaga takaiaga. Ko e fufuta ia Ianuari 1939 he Informant (mogonei Ha Tautolu a Fekafekauaga he Kautu) ne tali: “Ko e tau toloaga nei ko e vala he Fakatokatokaaga Fakateokarasi a Iehova ma e tau puhala he fekafekauaga he Kautu haana. Ko e fakaakoaga ne foaki i ai kua latatonu ma e tau tagata takitaha ke maeke ke taute fakamitaki aki e gahua ne kotofa.” Ka manamanatu a tautolu ke he tupu lahi he tau tagata fakapuloa he Kautu mai he 58,000 ni he 1938 ke molea e 7,000,000 he 2009, kua maaliali ko e tau toloaga takaiaga kua fakamooli ai e kakano ke lagomatai e tau fekafekau ‘ke taute aki e gahua ne kotofa’!
2. Ko e heigoa e vala tala ka foaki he toloaga takaiaga ha tautolu ma e tau he fekafekauaga foou?
2 Matakupu ma e Tau ka Hau: Onoono lahi atu a tautolu ke he fakaholoaga ka kamata ia Sepetema mo e fakamalolōaga ka foaki mai ai. Ko e matakupu “Nakai ko e Tau Tagata he Lalolagi a Mutolu” kua moua mai ia Ioane 15:19. Ko e heigoa falu lauga ka aoga mooli ke he tau fekafekau Kerisiano? He Aho Faiumu to logona e tautolu e lauga “Puipui he Fekafekau Mau a Tautolu—Fēfē?” To olioli foki e tautolu e fufuta lauga ne tolu e vala “Aua Neke Kiva ha ko e . . . ” “Ko e Manu Favale,” “Ko e Fifine Fakataka Lahi,” mo e “Ko e Tau Tagata Fakafua Koloa.” He Aho Tapu to fanogonogo a tautolu ke he fufuta lauga mo e matakupu “Fakaalofa ki a Iehova Ka e Nakai ke he Lalolagi.” Putoia falu lauga “Fakatumau ko e ‘Tau Tagata Paea mo e Tau Tagata Kehe’” mo e “Kia Fakamanavalahi! Maeke ia Koe ke Kautu ke he Lalolagi.”
3. Ko e heigoa e tau monuina ka moua e tautolu mai he o atu ke he toloaga takaiaga?
3 He mole e o atu ke he taha he tau toloaga takaiaga ne mole laia, kua tohi he taha matakainaga fifine kua lolelole he gahua he fonua na fakatupu he fakaholoaga ia a ia ke liu onoono ke he tau tuaga haana ti eketaha ke “fano he fonua ti oti e fai mena ke piu ki ai!” To lagomatai mooli he fakaholoaga he toloaga takaiaga he tau he fekafekauaga foou a tautolu oti ke fakaalofa ki a Iehova ka e nakai ke he lalolagi. (1 Ioa. 2:15-17) Mauokafua ke ha ha i ai a koe ti mataala ke aoga katoa mai he foakiaga fakaalofa nai ma e tau fekafekau Kerisiano!