Fakaholoaga Fou he Toloaga he Takaiaga
1 Taha fakamaamaaga he matakutaku ko e “fakalilifu mua atu mo e maimaina ke he Atua.” Ti fakamaama he mena nei e matakutaku mitaki ne talahau he Tohi Tapu “ko e kamataaga ia he iloilo.” (Sala. 111:10) Ka he taha fahi, ha i ai e matakutaku ne totoko lahi ke he lalolagi ha Satani ne nonofo i ai a tautolu. Maeke fefe ia tautolu ke kalo kehe he logonaaga fakalolelole ia ka e muitua atu ke he matakutaku fakalilifu a Iehova? Tali e huhu nai he fakaholoaga fou he toloaga he takaiaga 2002. Ko e matapatu “Kia Matakutaku a Mutolu ke he Atua, mo e Ta Age Kia Ia e Fakahekeaga.” (Fakakite. 14:7) To maama mo e fakaaue e tautolu e tau puhala kehekehe he matakutaku a Iehova ke aoga ai takitokotaha a tautolu mo e he fakatokatokaaga.
2 Pete kua lauia e matakutaku mo e loto fakaatukehe po ke loto lolelole ti nakai mahalo ke fehagai mo e tau mena uka, ne pehe mai e Tohi Tapu: “Uhoaki a lautolu oti kua matakutaku kia Iehova.” (Sala. 128:1) Fakakite mai he fakaholoaga he toloaga e puhala ma tautolu ke fahia ti kautu ke he tau paleko he tapuakiaga moli. To kitia e tautolu e puhala ke lagomatai a lautolu ne fou ke feaki e matakutaku fakalilifu ke he Atua, ati omoomoi aki a lautolu ke fekafekau mo e loto, solu, manatu, mo e malolo katoa ki a ia. (Mareko 12:30) Fakahiku aki e aho fakamua e lauga he leveki fahi motu “Kia Fakatata Atu ki a Lautolu ne Fakaalofa e Koe.” Lauga a ia he tau puhala ke mataala a tautolu ke he tau lagatau he tiapolo ke fakamafoki mai a tautolu ia Iehova, he magafaoa ha tautolu, mo e tau matakainaga Kerisiano ha tautolu.
3 “Matakutaku kia Iehova, Nakai ke he Tau Tagata” e matapatu he tau fufuta lauga ne fa he aho ke uaaki. To fakamaama ko e ha mo e puhala fe ma tautolu ke aua matakutaku ke he ha mena ke taofi aki a tautolu he fekafekauaga po ke fakatumau e mahani fakamoli mo e manamanatuaga mea he tau aoga mo e he gahuaaga. Ko e lauga fakapapiliki “Kia Matakutaku ke he Atua mo e Fakatumau ke he Hana Poakiaga” ne fakave ke he tau mena tutupu ne talahau he Fakakiteaga veveheaga 14. Fakahiku aki e toloaga he takaiaga mo e lauga ke fakamalolo mo e “Kia O Fano Tumau he Matakutaku a Iehova.”
4 Ko e Aoga Fekafekau Fakateokarasi, Feleveiaaga Fekafekau fakatai, lauga he papatisoaga, mo e Fakaakoaga he Kolo Toko fakaku ko e falu he tau vala lafi ki luga he fakaholoaga ne nakai lata ia koe ke galo i ai. Uiina e tau tagata ako mena mo koe ke o atu. Kia lautolu ne manako ke papatiso, kia fakaave mo e fakailoa ke he fekafekau leveki. Manako oti a tautolu ke fakakite e matakutaku fakalilifu ha tautolu ki a Iehova mo e ta age ki a ia e fakahekeaga he nakai galo ke he ha vala he fakaholoaga homo ue atu nei!