Matakutaku ki a Iehova mo e Fakalilifu Hana Higoa Tapu
“Ko hai ka nakai matakutaku moli ki a koe, ma Iehova, mo e fakaheke hau a higoa, ha ko koe tokotaha kua fakamoli?”—FAKAKITEAGA 15:4, NW.
1, 2. (a) Ne hafagi mai fefe e Iehova e tau pa pukenamo mai he lagi he vaha he tau 1991? (e) Ko e heigoa ne tupu moli he moui ne omoi aki e taha tagata feua pauaki fakamoli ke foaki mai e tomatoma: “Matakutaku kia Iehova”? (Kikite foki 1991 Yearbook, tau lau tohi 187-9.)
KO Iehova ‘ne hafagi e tau pa pukenamo he lagi mo e liligi ai ni e fakamonuinaaga ato nakai ha ha i ai e manako mena.’ Kua maeke e tau kupu ia ke fakahagaao atu foki ti liu foki ke he Tau Fakamoli a Iehova he tau vaha ku kua mole. (Malaki 3:10, NW) Ke tuga a nei, he vaha he tau he fekafekauaga he tau 1991, ko e fiafia he Tau Fakamoli o fenoga mo e tau tagata he matakavi ne o ke he fono kua puke lahi he feoaki Kerisiano he tau fonoaga pauaki ne taute takai he lalolagi—mai he tau Fonoaga “Vagahau Mea” i Buenos Aires i Amerika Toga; mo Manila, Taipei, mo Bangkok he Fahi Uta; ke he tau Fonoaga he “Tau Tagata ne Ofania e Ataina” i Budapest, Prague, mo Zagreb (Aokuso 16-18, 1991) i Europa Uta.
2 Ko e olioli ha e tau loto he tau hukui mai ne o he tau motu kehe ke feleveia mo e Tau Fakamoli kua leva e fakamoli lahi he tau nonofoaga ia! Ke tuga a nei, i Bangkok, ko Frank Dewar—he taha magaaho i tuai ko e tagata fakailoa tokotaha maka he Kautu i Tailani—ne tala mai hana a tau tau kua 58 ke he fekafekau uta fekau pauaki. Ne hoko atu hana tau gahua mai he tau atu motu he Pasifika ke he Fahi Toga ki Uta a Asia, mo e pihia foki ki Saina. Ne fehagai a ia mo e tau mena hagahaga kelea he pe e toga, tau manu huifa vale i loto he tau vaouhi, tau gagao he matakavi mafana, mo e pule vale fakatufono he tau iki felakutaki a Sapani. He magaaho ne huhu atu ki a ia ko e heigoa e tomatoma kua maeke a ia ke age ke he tau tagata ne o ke he fono, kua mukamuka hana a talikupu: “Matakutaku ki a Iehova!”
3. Ko e ha kua lata a tautolu ke fakakitekite e matakutaku he mahani atua?
3 “Matakutaku kia Iehova!” Kua aoga lahi ha ma tautolu oti kana ke fakagahuahua e matakutaku lago mitaki ia! “Ko e matakutaku kia Iehova, ko e kamataaga ia he iloilo.” (Salamo 111:10) Nakai ko e matakutaku hopoate neke malaia mai ia Iehova a nai. Ka e kehe, ha ko e fakalilifu ue atu ke he hana lilifu lahi ue atu fakaofoofogia mo e tau fua he mahani atua, ne matapatu mai he loto matala kua moua e tautolu ne puhala mai he fakaako e Kupu he Atua. Ia Fakakiteaga 15:3, 4 (NW) ne tukuogo mai he lologo a Mose mo e he Punua Mamoe: “Kua lahi mahaki mo e ofoofogia e tau gahua hau, ma Iehova ko e Atua, ko e Malolo Lahi Mahaki Katoatoa. Kua Tututonu mo e moli hau a tau puhala, Patuiki he tukulagi tukumuitea. Ko hai ka nakai matakutaku moli ki a koe, ma Iehova, mo e fakaheke hau a higoa, ha ko koe tokotaha kua fakamoli?” He hana fakamoliaga ke he hana tau tagata tapuaki, kua ha ha ia Iehova “ti tohi ai e tohi ke fakamanatu ai ki mua hana, ma lautolu ne matakutaku kia Iehova, mo e manamanatu ai ke he hana higoa.” Ne age ki a lautolu e palepale he moui tukulagi.—Malaki 3:16; Fakakiteaga 20:12, 15.
Kautu Lahi e Matakutaku he Mahani Atua
4. Ko e heigoa e laveakiaga i tuai kua lata ke fakamalolo aki a tautolu ke matakutaku ki a Iehova?
4 He magaaho ne o kehe mai e tau Isaraela i Aikupito ha Farao, ne fakakite age fakamaliali e Mose ko e matakutaku ni a ia ki a Iehova. Nakai leva, ne ponotia e tau Isaraela he vaha loto he Tahi Kula mo e matakau kautau malolo lahi ha Aikupito. Ti ko e heigoa ha lautolu kua maeke ke taute? “Ti pehe mai a Mose ke he motu, Ua matakutaku a mutolu, ka e tutu a mutolu mo e kitekite ke he fakamouiaga mai ia Iehova, ko e eke ne fai e ia ma mutolu ke he aho nai; ha ko e tau tagata Aikupito kua kitekite a mutolu ki ai ke he aho nai, nakai tuai kitia foki a lautolu tukulagi. To tau a Iehova ma mutolu, ka e nonofo fakalogologo a mutolu.” Ko e mana, ne vevehe ua e Iehova e tau vai. Ne foleni e tau Isaraela i luga he toka momo ke he taha fahi. Ti papihi e tau vai he liu mai. Ne fakaoti pitopito ai e matakau kautau ha Farao. Ne fakahao e Iehova e motu kua matakutaku Atua ia, ka e he magaaho taha ne fakahoko e fakafiliaga ki luga he tau Aikupito nakai fakalilifu faka-Atua. Ti pihia foki ni he vaha nei, to fakakitekite e ia hana fakamoliaga he laveaki mai hana Tau Fakamoli matakutaku faka-Atua he lalolagi a Satani.—Esoto 14:13, 14; Roma 15:4.
5, 6. Ko e heigoa e tau mena tutupu he vaha a Iosua kua fakakite kua lata a tautolu ke matakutaku ki a Iehova ka e nakai ke he tagata?
5 He mole mai e Esoto (o keheaga) mai i Aikupito, ne fakafano atu e Mose e tau toko 12 ki loto he Motu he Maveheaga. Ne hopoate lahi e hogofulu he kitia e tau tagata he motu ia ne tuga e tau tagata makimaki mo e lali ke fakaohooho a Isaraela ke nakai huhu atu ke he motu. Ka ko e kau tokoua, ko Iosua mo Kalepa, ne hokotaki atu: “Ko e motu mitaki lahi ue atu ni a ia. Kaeke ke fiafia mai a Iehova kia tautolu, to fakahoko atu e ia a tautolu ke he motu na, mo e foaki mai ia kia tautolu; ko e motu ni kua tafe ai e puke huhu mo e meli. Ka e aua neke fakafualoto a mutolu kia Iehova, ti aua neke matakutaku a mutolu ke he tau tagata he motu; ha ko e mena eke ni a lautolu mo mena kai ma tautolu; ha kua to tuai ha lautolu a taue, kua fakalataha ni a tautolu mo Iehova, ua matakutaku a mutolu kia lautolu.”—Numera 14:7-9.
6 Ka e pete ni, ne kaumahala e tau Isaraela ia ke he matakutaku tagata. Ti ko e mena ne tupu, ne nakai hohoko atu a lautolu ke he motu he maveheaga. Ka ko Iosua mo Kalepa, fakalataha mo e atu hau fou ha Isaraela, ne monuina ke huhu atu ke he motu mitaki lahi mo e fakagahua hana tau ulu vine mo e tau ulu olive. I loto he hana tau kupu fakamavehe ke he tau tagata ne fakapotopoto a Isaraela, kua age e Iosua e tomatoma nei: “Kia matakutaku a mutolu kia Iehova, ti fekafekau atu a mutolu kia ia mo e loto katoa mo e fakamoli.” Mo e lafi atu foki e Iosua: “Ka ko au mo e haku a magafaoa, to fekafekau a mautolu kia Iehova.” (Iosua 24:14, 15) Ko e tau kupu fakamalolo ha a nai ke he tau ulu he tau magafaoa mo e falu oti kana ke matakutaku atu ki a Iehova he tauteute a tautolu ke huhu atu ke he lalolagi fou tututonu he Atua!
7. Ne pehi fefe e Tavita e mena aoga lahi he matakutaku ke he Atua?
7 Ko e tama tane leveki mamoe ko Tavita ne fakakite foki e matakutaku mitaki ue atu ki a Iehova he magaaho ne paleko atu a ia ki a Koriato ke he higoa he Atua. (1 Samuela 17:45, 47) I luga he potu mate hana, kua maeke ai a Tavita ke tukuogo: “Kua vagahau age ai ia au e Agaga a Iehova; ha ha he alelo haku foki hana finagalo. Ne vagahau mai kia au e Atua a Isarela; ko e maka tumau a Isaraela, kua vagahau mai a ia, Ko ia kua pule ke he tau tagata kua eke ai mo e tututonu; kua pule ai a ia mo e matakutaku ke he Atua; Kua tuga ne maama ke he magaaho pogipogi a ia ka kua hake e la, ko e pogipogi nakai malumalu ai e lagi.” (2 Samuela 23:2-4) Ko e matakutaku nei ke he Atua kua nakai ha ha i ai he vaha loto he tau pule he lalolagi nei, mo e kua matematekelea ha e taui! Fefe la e kehe ka pule a Iesu, ko e “tama a Tavita,” ke he lalolagi mai he matakutaku ki a Iehova!—Mataio 21:9.
Gahua he Matakutaku ki a Iehova
8. Ko e ha kua muhu koloa ai a Iuta i lalo ia Iehosafata, ti kua fakakite mai e heigoa ke he vaha nei?
8 Hagaao ke teau e tau tau he mole atu e mate a Tavita, kua taute a Iehosafata mo patuiki a Iuta. Ko e patuiki foki hanai ne fekafekau mai he matakutaku ki a Iehova. Ne liuaki mai e ia e maopoopoaga he pule fakaatua i Iuta, ne fakatutu hake e tau ikifakafili ke he motu katoa, mo e age ki a lautolu e tau fakatonutonuaga nei: “Ha ko e mena nakai fakafili a mutolu mo e tau tagata ka ko Iehova, kua fakalataha a ia mo mutolu ke he tau mena kua fakafili ai. Hanai, kia ha ha ia mutolu e matakutaku kia Iehova; kia fakaeneene ā mutolu mo e eke ai e mutolu; ha ko e mena nakai fai mahani hepehepe a Atua, ti nakai fakamailoga tagata a ia, po ke talia e ia e tau mena fakaalofa. . . . Kia eke pehe a mutolu mo e matakutaku kia Iehova, mo e fakamoli, mo e loto katoa.” (2 Nofoaga he Tau Patuiki 19:6-9) Ti kua, muhu koloa lahi a Iuta he matakutaku ki a Iehova, kua tuga ni e tau tagata he Atua ne lahi e aoga ki a lautolu mai he fekafekau he tau leveki loto hohofi noa he vaha nei.
9, 10. Ne kautu lahi fefe a Iehosafata ke he matakutaku ki a Iehova?
9 Ka e pete ni, kua fai fi a Iuta. Ne mauokafua e fifiliaga ha lautolu nei ke holoholo kehe e motu he Atua. Ko e tau kau malolo fakakautau lafilafi ha Amoni, Moapi, mo e Mouga ko Seira ne mumumumu atu ki loto he fahi motu i Iuta mo e fakamatakutaku atu a Ierusalema. Ko e matakau kautu malolo lahi. Ne fuluhi a Iehosafata ki a Iehova he liogi he magaaho ne “tutu a Iuta oti ki mua a Iehova, mo e tau tama ikiiiki ha lautolu, ko e tau hoana ha lautolu, mo e fanau ha lautolu.” Ke tali atu ke he liogi ia, kua hifo mai e agaga a Iehova ki luga he Levi ko Iahasielu, kua pehe atu: “Kua pehe mai e vagahau a Iehova kia mutolu, Aua neke matakutaku a mutolu, ti ua fakaatukehe a mutolu, ha ko e motu o tagata tokologa na, he nakai ko e mena ha mutolu e tau, ka ko e mena he Atua. Kia hifo atu a mutolu kia lautolu a pogipogi; . . . Nakai tau a mutolu ke he tau nai; kia tutu a a mutolu, kia tutu a mutolu, mo e kitekite atu a mutolu ke he fakamouiaga mai ia Iehova ko ia ha ha ia mutolu; Iuta mo Ierusalema na e, aua neke matakutaku a mutolu, ti ua fakaatukehe a mutolu; kia o atu a mutolu kia lautolu a pogipogi; ha ko e mena ha ha ia mutolu a Iehova.”—2 Nofoaga he Tau Patuiki 20:5-17.
10 He pogipogi hake, ne mamatike tuai e tau tagata tane a Iuta. He omaoma a lautolu ti o atu ke feleveia mo e fi, ne tu hake a Iehosafata mo e pehe: “Iuta na e katoa mo mutolu kua nonofo i Ierusalema, kia fanogonogo mai a a mutolu kia au; Kia tua a mutolu kia Iehova ha mutolu a Atua, ti fakatumau ai a mutolu; kia tua a mutolu ke he hana tau perofeta, ti monuina ai a mutolu.” Kua o atu i mua he tau tagata tane fakakanavaakau tau, kua lologo tali e tau tagata lologo ki a Iehova: “Kia fakaaue atu kia Iehova, ha ko e mena tukulagi hana fakaalofa.” Ne fakailoa mai e Iehova e fakaalofa-totonu ia he taute e tau matakau fi ke feloto kehekehe aki ti kua fefakaotioti ni e lautolu a lautolu. He o atu e tau tagata tane Iuta ke he kolo takahao he tutakale, ko e gati tino ni he tau fi mamate ne toka i ai.—2 Nofoaga he Tau Patuiki 20:20-24.
11. Mo e hagaao ke he matakutaku, kua kehe mai fefe e tau motu mai he tau tagata he Atua?
11 He magaaho ne logona ai he tau motu ne katofia ki ai e laveakiaga mana nei, kua ha ha i ai “e matakutaku ke he Atua” ia lautolu. Ka e he taha fahi, ko e motu ne omaoma he matakutaku ki a Iehova he magaaho nei ne “okioki ai a ia ke he tau fahi oti.” (2 Nofoaga he Tau Patuiki 20:29, 30) Ti pihia foki, he magaaho ka fakahoko e Iehova e fakafiliaga i Amaketo, to ha ha ai he tau motu e matakutaku ke he Atua mo e hana Tama Tane ko e he Fakahokoaga, ko Iesu Keriso, mo e to nakai maeke a lautolu ke tutu he aho lahi mahaki he ita fakaatua.—Fakakiteaga 6:15-17.
12. Kua palepale fefe e matakutaku ki a Iehova he tau magaaho fakamua?
12 Ko e matakutaku lago mitaki ki a Iehova kua tamai e tau palepale muhu koloa. Ha “ko e tua ne taute ai” e Noa “e vaka mo e matakutaku, kia momoui ai hana faoa.” (Heperu 11:7) Mo e ma e tau Kerisiano he senetenari fakamua, ne fakamau ai, he mole atu e magaaho he favaleaga, “ne huhu atu ke he magaaho mafola, kua ati hake; mo e ne o fano ai ke he matakutaku ki a Iehova mo e mafanatia he agaga tapu kua fakatumau ai ke tupu” e fakapotopotoaga—kua lahi tuga ni ne fa e taute i Europa Uta he vaha nei.—Gahua 9:31, NW.
Fakaalofa ke he Mitaki, Vihiatia ke he Kelea
13. To fakamahani fefe hokoia a tautolu mo e fakamonuinaaga a Iehova?
13 Katoatoa e mitaki a Iehova. Ha kua pihia, “ko e matakutaku kia Iehova ko e fakavihia ke he mahani kelea haia.” (Fakatai 8:13) Ha kua tohia hagaao ki a Iesu: “Kua fiafia a koe ke he mahani tututonu, ka e vihiatia e mahani hepehepe; ko e mena ia, kua fakauku ai a koe he Atua, ko e hau a Atua ni, ke he lolo he fiafia ke mua.” (Heperu 1:9) Kaeke kua tuga a Iesu a tautolu, he manako ke moua e fakamonuinaga a Iehova, kua lata a tautolu ke vihiatia e mahani kelea, e mahani feuaki, e mahani vale, mo e lotokai he lalolagi fakatokoluga ha Satani. (Fakatatai Fakatai 6:16-19.) Kua lata a tautolu ke ofania e tau mena ne ofania e Iehova mo e vihiatia e tau mena ne vihiatia e ia. Kua lata a tautolu ke matakutaku ke taute ha mena kua taute ke nakai fakafiafia a Iehova. “Ko e matakutaku foki kia Iehova kua kalo kehe ai e tau tagata mo e mahani kelea.”—Fakatai 16:6.
14. Kua foaki mai fefe e Iesu ki a tautolu e fakafifitakiaga?
14 Kua toka hifo e Iesu e fakafifitakiaga ki a tautolu ti kua lata a tautolu ke muitua fakatata lahi ke he hana tau tuaga hui. “Ko ia ne amuamu ki ai, ka e nakai amuamu atu ke taui atu, ne fakamamahi a ia ka e nakai fakamatakutaku atu, ka e tuku atu a lautolu kia ia kua fakafili fakatonu.” (1 Peteru 2:21-23) I loto he matakutaku ki a Iehova, kua maeke a tautolu ke fakauka ke he tau ekefakakelea, tau fakafiufiu, tau favaleaga, kua aku hake he lalolagi a Satani ki luga ia tautolu.
15. Ko e ha kua lata a tautolu ke matakutaku ki a Iehova ka e nakai ki a lautolu kua maeke ke kelipopo e tino?
15 Ia Mataio 10:28 (NW) kua akonaki mai a Iesu ki a tautolu: “Kia nakai eke ke matakutaku lahi ia lautolu kua kelipopo e tino ka e nakai maeke ke kelipopo e solu; ka e kia kehe mai he matakutaku ki a ia kua maeke ke fakaotioti tokoua e solu mo e tino i Kehena.” Pihia foki ni kaeke kua ha ha i ai taha kua matakutaku ki a Iehova kua kelipopo mai he fi, ti ko e mamahi he mate ko e mena fakaku. (Hosea 13:14) He magaaho ka fakaliu tu mai ai, to maeke ai a ia ke pehe: “Mate, ko fe hau a kautu? Mate, ko fe hau a huhuki mania?”—1 Korinito 15:55, NW.
16. Ne fakakite fefe e Iesu e matakutaku ki a Iehova mo e fakalilifu a ia?
16 Kua foaki mai ni e ia ko Iesu e fakataiaga kua homo ue atu ma lautolu oti kana kua ofania e tututonu a Iehova mo e vihiatia ke he mena kelea. Ne fakaataata mai hana matakutaku ki a Iehova i loto he tau kupu fakahiku hana ke he tau tutaki hana, tuga kua moua mai ia Ioane 16:33: “Kua tala age e au e tau mena nei kia mutolu, kia moua ai e mutolu e monuina ia au, to moua foki e mutolu e matematekelea ke he lalolagi, kia fakamanavalahi a mutolu, kua kautu au ke he lalolagi.” Ne tutaki atu e fakamauaga a Ioane: “Kua tala age e Iesu e tau kupu ia, ati haga hake ai hana tau fofoga ke he lagi, kua pehe atu, Ma Matua na e, kua hoko mai e aho. Tuku mai a e fakahekeaga ke he hau a Tama, kia tuku atu foki he hau a Tama e fakahekeaga kia koe. . . . Kua fakakite atu e au hau a higoa ke he tau tagata ne foaki mai e koe kia au mai he lalolagi.”—Ioane 17:1-6.
Matakutaku ki a Iehova mo e Fakaheke a Ia
17. Ko e heigoa e tau puhala kua maeke a tautolu ke fifitaki atu ke he fakafifitakiaga a Iesu?
17 Kua maeke nakai a tautolu he vaha nei ke fifitaki e fakataiaga loto toa a Iesu? Kua moli ai ni kua maeke a tautolu ke matakutaku ki a Iehova! Kua taute e Iesu e fakailoa ki a tautolu ke he higoa mo e tau fua lilifu ue atu a Iehova. Ha kua matakutaku ki a Iehova ko e ha tautolu a Iki ne Pule Katoatoa, kua fakatokoluga e tautolu a ia ki luga ue atu he falu atua, ne fakalataha ki ai e Tolu Taha fakagalogalo nakai fai higoa ha Kerisitenitome. Ne fekafekau a Iesu ki a Iehova mo e matakutaku kua malolo mitaki, he nakai talia ke hele he matahele he matakutaku tagata ne maeke ke mate. “He tau aho he hana kakano Keriso ne foaki hake e tau olelalo fakalahi mo e tau ole ke he Taha ni kua maeke ke fakamoui mai a ia he mate, fakalataha mo e tau tagi fakalahi mo e tau hihina mata, mo e kua logona mo e fiafia ki a ia ma e hana matakutaku mahani fakaatua.” Ke tuga a Iesu, kia taute foki a tautolu ke matakutaku ki a Iehova tuga he fakatumau a tautolu ke fakaako ke omaoma mai he tau mena ne mamahi a tautolu—ke pihia tumau mo e foliaga ha tautolu ke he fakamouiaga tukulagi.—Heperu 5:7-9, NW.
18. Maeke fefe ia tautolu ke tuku atu e fekafekau tapu ke he Atua ti fakalataha aki mo e matakutaku mahani atua?
18 He magaaho fakamui i loto he tohi ia ke he tau Kerisiano Heperu, ne akonaki atu a Paulo ke he tau Kerisiano ne fakauku: ‘Hanai, to moua e tautolu e kautu kua nakai maueue, kia fakaaue ai a tautolu, kia fekafekau ai a tautolu ke he Atua mo e fakafiafia ki a ia, mo e maimaina, mo e matakutaku.’ He vaha nei, kua kau auloa e “moto tagata tokologa” i loto he fekafekau tapu ia. Mo e ko e heigoa kua toka i ai? He mole atu he tutala ke he mahani totonu noa ha Iehova he foaki mai e poa he Tama Tane Hana, ko Iesu Keriso, kua pehe a Paulo: “Kia uta mau e tautolu e poa fakaheke ke he Atua kia ia ni, ko e fua haia he tau laugutu ha lautolu, kua fakaaue atu ke he hana higoa.” (Heperu 12:28; 13:12, 15) Mai he loto fakaaue ke he mahani totonu noa a Iehova, kua lata a tautolu ke manako ke foaki e tau matahola kua maeke ke fai ke he hana fekafekauaga tapu. Ha ko e tau hoa fakamoli he tau Kerisiano ne fakauku kua toe, kua fakakatoatoa he moto tagata tokologa he vaha nei e vala lahi he fekafekau ia. Kua tuku atu e lautolu nei e fakamouiaga ke he Atua mo Keriso, he tutu a lautolu fakaagaga ki mua he nofoaiki he Atua, “mo e fekafekau kia ia ke he aho mo e po ke he faituga hana.”—Fakakiteaga 7:9, 10, 15.
Fakaheke Tukulagi Tukumuitea a Iehova
19, 20. Ko e heigoa e tau vahega ua he matakutaku ka kitia mali he “aho a Iehova”?
19 Kua fakamafiti mai e aho lilifu lahi ke fakamatalahi a Iehova. “Ha ko e mena, kitiala, ko e hoko mai ne fai e aho ke huhunu ai tuga ne gutuumu; ti eke ai mo gutugutu saito a lautolu oti kua fakatokoluga, katoa mo lautolu oti kua eke e mahani kelea; to huhunu ai foki a lautolu ke he aho ko e hoko mai ne fai, kua pihia mai a Iehova Sapaota.” Ko e magaaho matematekelea lahi ia ko e “aho a Iehova, ne mua ue atu mo e matakutakuina.” (Malaki 4:1, 5) To pakia ai he “matakutaku” e tau loto he tau tagata kelea, mo e to “nakai fakai ke hao” mai a lautolu nei.—Ieremia 8:15; 1 Tesalonia 5:3.
20 Ka e pete ni, ko e tau tagata a Iehova, ne omoi he taha faga matakutaku kehe. Ko e agelu ne tuku atu e “vagahau mitaki tukulagi” ne leo lahi e hea ki a lautolu ke omai he pehe: “Kia matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana fakafiliaga.” (Fakakiteaga 14:6, 7) To tutu a tautolu mo e nava lahi ke he fakafiliaga ia he velagia a Amaketo ka tugi fakaotioti ai e lalolagi a Satani. To hihika mau e matakutaku lago mitaki ki a Iehova he tau loto ha tautolu. Kia moua ai e tautolu e fiafia pauaki he mogoia ke ha ha i ai a tautolu ni i loto ia ‘lautolu ne fakahao mai ne ui atu ke he higoa a Iehova’!—Ioelu 2:31, 32; Roma 10:13.
21. Ko e heigoa e tau fakamonuinaaga ka takitaki atu he matakutaku ki a Iehova?
21 To mumui mai e tau fakamonuinaaga ne mua atu e mitaki, kua fakalataha ki ai e “tau tau ke he moui hāu” kua fakamatoho atu tukulagi tukumuitea! (Fakatai 9:11; Salamo 37:9-11, 29) Ha kua pihia, ko e heigoa mo e heigoa e amaamanaki ha tautolu ke moua e tufaaga he Kautu po ke ke fekafekau ke he hana matakavi ka pule ki ai ko e lalolagi, kia fakatumau a tautolu he mogonei ke tuku atu e fekafekau tapu ke he Atua fakalataha mo e matakutaku he mahani atua mo e nava. Kia fakatumau a tautolu ke fakalilifu hana higoa tapu. Mo e ko e heigoa e fakamonuina ka moua mai? Ko e fakaaue lahi tukulagi ha kua uta e tautolu ke he tau loto e fakatonuaga pulotu ke fakatumau e matakutaku ki a Iehova!
To Maeke Fefe ia Koe ke Tali?
◻ Ko e heigoa e kakano he “matakutaku ki a Iehova”?
◻ Ne aoga fefe ke he hana tau tagata i tuai e matakutaku ke he Atua?
◻ Ko e heigoa e fakafifitakiaga he matakutaku he mahani atua ne toka hifo e Iesu ma tautolu?
◻ Liga to maeke fefe ia tautolu ke fakatumau e fakamoliaga ke matakutaku ki a Iehova?
[Fakatino he lau 27]
I loto he tohi ha Fakakiteaga, kua kitia ai e tau matakainaga a Iesu ne lologo “e lologo a Mose,” ko e lologo he fakahekeaga ki a Iehova
[Fakatino he lau 29]
Kua kautu lahi e matakau kautau a Iehosafata ke he matakutaku ki a Iehova
[Fakatino he lau 32]
Tau tau he moui kua fakamatoho atu ki tukulagi tukumuitea, e palepale ha lautolu ne matakutaku ki a Iehova