Tau Tagata Fiafia Lahi Mahaki he Lalolagi
1 “Uhoaki e motu kua eke a Iehova mo Atua ha lautolu.” (Sala. 144:15) Kua fakamaama he tau kupu ia e Tau Fakamoli a Iehova ko e tau tagata fiafia lahi mahaki he lalolagi. Nakai fai olioli lahi foki mai he fekafekau ke he Atua moui tokotaha maka, ko Iehova. Ha ko ia ko e ‘Atua fiafia,’ kua fakakite e lautolu ne tapuaki ki a ia hana fiafia. (1 Timo. 1:11) Ko e heigoa falu vala he tapuakiaga ha tautolu kua lafi ke he fiafia lahi ha tautolu?
2 Tau Kakano he Fiafia: Kua fakailoa moli mai e Iesu ki a tautolu kua hau e fiafia pihia ha ko e ha tautolu a “manamanatu ke he tau mena fakaagaga.” (Mata. 5:3, NW) He fakatumau e fakaako e Tohi Tapu mo e fakalataha ke he tau feleveiaaga Kerisiano oti ha tautolu nukua fakamakona e manako ia. He ako e mena moli he Kupu he Atua kua fakatokanoa a tautolu mai he fakavai mo e hepehepe fakalotu. (Ioane 8:32) Kua fakaako foki he tau Tohiaga Tapu a tautolu ke he puhala mitaki ue atu he moui. (Isa 48:17) Ha ko e mena ia, kua olioli e tautolu e fefakalatahaaki faka-Kerisiano atihake he feoakiaga fiafia ha tautolu he tau matakainaga.—1 Tesa. 2:19, 20; 1 Pete. 2:17.
3 Moua e tautolu e makona lahi he omaoma ke he tau tutuaga he mahani mitaki ue atu he Atua, ha kua iloa e tautolu kua puipui he mena nei a tautolu mo e taute a Iehova ke fiafia. (Fakatai 27:11) Ne talahau he tagata tohi nusipepa: “Pete ni ha lautolu a tau poakiaga kikili, kua tumau e fiafia he Tau Fakamoli a Iehova. Kehe mamao ni. Ko lautolu kua ikiiki ti pihia mo lautolu kua lalahi [kua ha ha ai fakalataha mo lautolu] ne fakakite e foliga kua olioli lahi mo e lagotatai mitaki.” Lagomatai fefe e tautolu e falu ke fakalataha ke he puhala moui fiafia ha tautolu?
4 Lagomatai e Falu ke Kumi e Fiafia: Kua puke e lalolagi he nakai fiafia, ti pouliuli e kitiaaga he tau tagata tokologa ke he vaha anoiha. Pete ia, ha ha ia tautolu e kitiaaga mitaki lahi, he iloa to taha aho ko e tau mena momoko oti to eke mo mena kua mole atu. (Fakakite. 21:3, 4) Ko e mena ia, kia fakalataha fakamakai a tautolu ke he fekafekauaga, he kumi a lautolu kua loto moli ke talahau e amaamanakiaga mo e tau taofiaga ha tautolu ki a lautolu hagaao ki a Iehova.—Eseki. 9:4.
5 Ne pehe e matakainaga fifine paionia: “Nakai fai mena foki kua mua atu e makona mai he lagomatai e tau tagata ke o mai ke iloa a Iehova mo e hana kupu moli.” Kia eketaha katoatoa a tautolu ke fakamalolo e tokologa foki ke talia e tau fakaakoaga Tohi Tapu. Ko e fekafekau ki a Iehova mo e foaki a tautolu ke lagomatai e falu ke fekafekau ki a ia ka moua e fiafia lahi mahaki.—Gahua 20:35.