Fiafia Lahi Moli he Fekafekau ki a Iehova
“Uhoaki e tagata ha i ai e Atua a Iakopo mo lagomatai hana; ko e hana amaamanaki ha i ai ia kia Iehova ko e hana Atua.”—SALAMO 146:5.
1, 2. Ko e heigoa e talahauaga ke he kakano he fiafia lahi, mo e ko e heigoa e kakano he fiafia lahi ke he tokologa he tau tagata he vaha nei?
KO E heigoa e fiafia lahi? Ne lali e tau tagata tohi fakamaama kupu, tau pulotu, tau iloilo fakalotu ke fakamaama e mena nei ke he tau senetenari loga. Ka e nakai moua e lautolu e fakamaamaaga ne talia lahi auloa. Ne fakailoa mai he Encyclopædia Britannica (Tohi Fakamaama Mena Peritania): “Ko e taha na kupu fakavaia e fiafia lahi mai he tau kupu.” Kehekehe e kakano he fiafia lahi ke he tau tagata kehekehe, ko e uta ni ke he onoonoaga ha lautolu ke he moui.
2 Ke he tokologa he tau tagata kua ha ha i ai e fiafia lahi ke he tino malolo, tau koloa moua mo e fakafetuiaga kapitiga mitaki. Ka e taha e mena, ha ha i ai e tau tagata ne ha ha ia lautolu e tau mena oti ia ka e nakai fiafia. Ke he tau tagata tane mo e fifine ne fakatapu ki a Iehova ko e Atua, ne foaki mai he Tohi Tapu e maamaaga he fiafia lahi ne kehe mahaki mai he maamaaga ne mahani ki ai e tokologa.
Ko e Maamaaga Kehe Hagaao ke he Fiafia Lahi
3, 4. (a) Ko hai ne talahau e Iesu ne fiafia? (e) Ko e heigoa ne mailoga ke he tau mena ke moua ai e fiafia lahi ne talahau e Iesu?
3 Ke he lauga hana he Mouga, ne nakai pehe a Iesu ko e falanaki ne fiafia lahi ke he tino malolo, tau koloa moua, po ke tau mena pihia. Ne fakailoa mai e ia e fiafia moli ha lautolu ne “manamanatu ke he tau mena fakaagaga” mo lautolu ne “fia kai mo e fia inu ma e tututonu.” Ne tatai e tau mena ua nei, ko e tau mena kua lata ke moua e fiafia lahi mo e talahauaga kehe lahi ha Iesu: “Fiafia a lautolu ne fakatutuku, ha ko e mena to fakamafanatia a lautolu.” (Mataio 5:3-6, NW) Kua maama moli, ne nakai pehe a Iesu ko e amanaki pauaki e tau tagata ke fiafia ka galo ia lautolu e taha fakahele. Ka ko e kakano hana ko e vagahau a ia kia lautolu ne momoko ke he tuaga agahala ha lautolu mo e tau fua ne tupu mai ai.
4 Ne vagahau e aposetolo ko Paulo ke he oi he tau tagata i lalo hifo he hala ke he fakaveaga he amaamanakiaga ke “toka noa ai e tau mena ne eke mai he tupaaga ke he mena popo vave.” (Roma 8:21, 22) Ko e tau tagata ne talia e puhala a Iehova, ke utakehe aki e hala mai he poa lukutoto ha Keriso mo e taute e finagalo he Atua ne fakamafanatia moli mo e moua e fiafia. (Roma 4:6-8) Ke he lauga he Mouga, ne talahau fiafia foki e Iesu “a lautolu kua loto molu,” “fakaalofa hofihofi noa,” “loto mea,” mo e “loto mafola.” Ne foaki mai e ia e fakamoliaga pete ne eke fakakelea, ko lautolu ia ne mahani molu to nakai fakagalo ha lautolu a fiafia lahi. (Mataio 5:5-11, NW) Ne fulufuluola ke mailoga ke he fakatokolugaaga he tau fiafia lahi nei ne fakatatai ni a lautolu ne muhu koloa mo lautolu ne mativa.
Ko e Fakaveaga he Fiafia Lahi Moli
5. Ko e heigoa e fakaveaga ma e fiafia lahi he tau fekafekau he Atua ne fakauku?
5 Ko e matapatu he fiafia lahi moli ne nakai moua mai he tau koloa loga. Ne pehe e Patuiki iloilo ko Solomona: “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.” (Fakatai 10:22) Ki a lautolu ne mailoga e pule katoatoa ha Iehova ke he lalolagi oti, ne o ua ne fiafia lahi mo e fakamonuina he Atua. Ko e tagata kua fakatapu ne ha ha ia ia mo e logona e ia e fakamonuinaaga a Iehova ne fiafia moli. Ko e maamaaga faka-Tohi Tapu, ko e fiafia lahi kua putoia e mamakona, hagahaga mitaki, mo e fakamoliaga he fekafekauga ha Iehova.
6. Ko e heigoa kua lata ke taute he tau tagata a Iehova ke tumau e fiafia moli ha lautolu?
6 Ko e fiafia lahi moli ko e falanaki ni ke he fakafetuiaga tonu mo Iehova. Ko e fakave aki ni e fakaalofa ke he Atua mo e fakamoli kia ia. Ne talia mo e loto katoa he tau fekafekau fakamoli a Iehova e tau kupu ha Paulo: “Ha kua nakai moui taha ia tautolu, ha ko ia ni . . . kua momoui ni ha ko Iehova . . . ko e tau tagata a Iehova a tautolu.” (Roma 14:7, 8, NW) Ko e mena haia ne nakai moua e fiafia lahi ka noa mo e omaoma ki a Iehova mo e olioli ke nofo i lalo he hana a finagalo. Ne pehe a Iesu: “Fiafia a lautolu ne logona e kupu he Atua mo e omaoma ki ai!”—Luka 11:28, NW.
Hikihiki e Tau Vala he Fiafia Lahi
7, 8. (a) Fakavahega fefe e tau mena ke moua aki e fiafia lahi? (e) Ko e heigoa ne maeke ke talahau ke he fakamauaga mo e fanafanau?
7 Ko e fiafia lahi ne kua oti he fakatutala ki ai kua fakahigoa ia ko e “fakaveaga,” po ke “fakatumau,” kakano ha kua aoga ma e tau fekafekau a Iehova ke he tau magaaho oti. Ke lafi foki ki ai, ne ha ha i ai e tau mena ne liga ke fakahigoa e tautolu ko e tau mena fa hikihiki fano, ko e tau mena ne moua e fiafia ke he falu a magaaho ka e tote po ke nakai fai ke he falu a magaaho. Ke he vaha he tau mamatua fakamua ia Aperahamo mo e magahala fakamua ato Kerisiano, ko e fakamauaga mo e fanafanau ko e matapatu ni ke moua aki e fiafia lahi. Ne fakakite mai e mena nei ke he ole mamahi ha Rahela kia Iakopo: “Ta mai la e falu a tama kia au, ka nakai ti mate na au.” (Kenese 30:1) Ko e agaga nei ke he fanafanau ne lata ia mo e finagalo a Iehova ke he magahala ia.—Kenese 13:14-16; 22:17.
8 Ko e fakamauaga mo e fanafanau ne talahaua ia ko e fakamonuinaaga foaki he Atua ma e tau tagata a Iehova ke he magahala fakamua ia. Ka e taha e mena, fakalataha ai e matematekelea mo e tau mena nei, mo e falu a tutuaga ke he vaha malaia ke he ha lautolu a fakapapaleaga he tau mena tutupu. (Fakatatai a Salamo 127, 128 mo Ieremia 6:12; 11:22; Tagi Aue 2:19; 4:4, 5.) Ti ko e mena haia ne maama mitaki ko e fakamauaga mo e fanafanau ne nakai tumau tukulagi e fiafia lahi.
Fiafia Lahi ka e Nakai Fai Fakamauaga he Vaha Ia
9. Ko e ha ne moua ai he tama fifine ha Iefeta e fakahekeaga ke he tau tau takitaha?
9 Tokologa e tau fekafekau he Atua ne moua e fiafia lahi ka e nakai fai fakamauaga. Mai ha ko e fakalilifuaga ke he omonuo he hana a matua tane, ne nofo tokotaha e tama fifine ha Iefeta. Ke he falu a magaaho ko ia mo e hana a tau kapitiga fifine ne tagi ia ke he hana a tamafine tote. Ka e ha ha ia ia e olioli he fekafekau tumau he tau magaaho oti ke he fale ha Iehova, liga ko ia fakalataha mo e “tau fifine ne fa fakapotopoto ke he gutuhala he fale uta fano he tutuutaga”! (Esoto 38:8) Ha ko e mena nei, ne moua e ia e fakahekeaga he tau tau takitaha.—Fakafili 11:37-40.
10. Ko e heigoa ha Iehova ne manako ke taute e Ieremia, ti liga tuga ke nakai fiafia e moui hana?
10 Ha ko e vaha matematekelea ne moui ai e perofeta ko Ieremia, ne manako e Atua ke nakai fai hoana mo e fanafanau a ia. (Ieremia 16:1-4) Ka e logona e Ieremia e moli he tau Kupu he Atua: “Fakamonuina e tagata malolo kua falanaki kia Iehova, ko ia kua eke a Iehova mo mauokafua hana.” (Ieremia 17:7, NW) Ne molea e 40 tau he fekafekau fakaperofeta, ne fekafekau fakamoli a Ieremia, ko e tagata nofo tokotaha ke he Atua. Ko e ha tautolu a iloaga, ne nakai fai hoana po ke fanafanau a ia. Ka e taha e mena, ko hai ne fakauaua ke he fiafia ha Ieremia, tuga ni a lautolu ne toe he tau Iutaia fakamoli ne “kikila ke he mahani mitaki a Iehova”?—Ieremia 31:12, NW.
11. Ko e heigoa e tau fakafifitakiaga Tohiaga Tapu he tau fekafekau fakamoli a Iehova ne fiafia, pete ne nakai fai hoa mai he fakamauaga?
11 Tokologa foki e falu tagata ne fekafekau olioli kia Iehova ka e nakai fai hoa fakamau. Ne nofo tokotaha, takape fifine, po ke takape tane a lautolu. Putoia kia lautolu e perofeta fifine ko Ana; liga ko Toreta po ko Tapita; ko e aposetolo ko Paulo; mo e fakafifitakiaga mua ue atu ko—Iesu Keriso.
Nofo Tokotaha ka e Fiafia he Vaha Nei
12. Ko e heigoa he falu a fekafekau fiafia, fakatapu a Iehova ne tokanoa ke taute he vaha nei mo e ko e ha?
12 Ko e vaha nei, ne loga e tau afe he Tau Fakamoli a Iehova ne fekafekau fakamoli ke he Atua ne nakai fai hoa ke he fakamauaga. Ko e falu ne kua maeke ke talia e uiina ha Iesu: “Ko ia kua maeke ke talia [e mena fakaalofa ko e nofo tokotaha] kia talia ai e ia.” Ne taute e lautolu e mena nei ha “ko e kautu he lagi.” (Mataio 19:11, 12) Ko e kakano, kua fakaaoga fakamitaki e lautolu e tokanoaaga foaki he Atua ke fakagahua lahi e tau magaaho mo e tau malolo ke fakalaulahi e tau gahua he Kautu. Ne tokologa ia lautolu ne fekafekau ko e tau tagata foafoa, tau faifeau, po ke tau hukui he magafaoa Peteli ke he matapatu he Kaufakalatahaaga Kolo Toko he lalolagi oti po ke taha mai he hana a tau la.
13. Ko e heigoa e tau fakafifitakiaga ke fakakite aki ko e maeke he Kerisiano ke fiafia he nofo tokotaha?
13 Taha e matakainaga fifine motua fakahelehele ne talahau hana moui aki e mataulu tala mahino mitaki “Ko e Tagata Foafoa Nofo Tokotaha mo e Fiafia.” (Ko e Kolo Toko, Peritania, Me 1, 1985, tau lau tohi 23-6) Ko e taha foki e matakainaga fifine nofo tokotaha ne fekafekau ke he molea e 50 e tau tau ke he Peteli ne pehe: “Makona katoatoa a au mo e haku a moui mo e haku a gahua. Ko e lavelave lahi a au a e mogonei ka fakatatai atu ke he vaha fakamua ke he gahua ne fiafia lahi au ki ai. Ne nakai fai tokihala a au. To liu foki ni au ke taute e fifiliaga taha nei.”—Ko e Kolo Toko, Peritania, Iuni 15, 1982, lau tohi 15.
14, 15. (a) Tuga he talahau he aposetolo ko Paulo, ko e heigoa kua lata ke maeke ke nofo tokotaha tumau? (e) Ko e ha ne talahau e Paulo ko e “mua he mitaki” mo e “fiafia” e tagata nofo tokotaha?
14 Mailoga e kupu ia ko e “fifiliaga.” Ne tohi e Paulo: “Ka ko ia kua mau hana loto, ka nakai fai mena ke lekua ai, ti ha ha ia ia e pule ke he hana loto, mo e mau e manatu he hana loto ke he mena nai ke taofi ai hana tamāfine tote, kua mitaki hana mena kua eke. Hanai, ko ia kua fakafaitane hana tama fifine kua mitaki hana mena kua eke, ka ko ia kua nakai fakafaitane a ia kua mua e mitaki he hana mena kua eke.” (1 Korinito 7:37, 38) Ko e ha ne “mua e mitaki”? Ne fakamaama e Paulo: “Kua loto au kia noa a mutolu mo e fakaatukehe. Kua fakaatukehe a ia kua nakai fai hoana ke he tau mena he Iki, po ke fakafiafia fefe a ia ke he Iki. . . . kua fakaatukehe a ia kua nofo noa ke he tau mena he Iki; . . . Kua tala atu e au e tau kupu nai kia mutolu kia aoga ai kia mutolu, . . . ka kia fulufuluola ai, kia fekafekau fakamitaki ke he Iki mo e loto nakai fakalavelave.”—1 Korinito 7:32-35.
15 Ko e fai matutakiaga nakai e “fekafekau fakamitaki ke he Iki mo e loto nakai fakalavelave” mo e manatu ke ‘moua e taliaaga fiafia lahi he Iki’? Ne maama mitaki e taofi ia ha Paulo. Ko e tala ke he Kerisiano takape, ne pehe a ia: “Kua tokanoa a ia ke fakalataha mo e tane kua loto ki ai, ka kia lata mo e Iki. Ka e mua atu e fiafia hana kaeke ke nofo noa pihia a ia, hagaao ke he taofiaga haku a ia. Kua moli haku a manatu kua ha ha foki ia au e Agaga he Atua.”—1 Korinito 7:39, 40, NW.
Ko e Tau Mitaki he Tuaga Nakai Fai Hoa Fakamau
16. Ko e heigoa e falu mitaki ne fiafia ai e tau Fakamoli a Iehova ne nofo tokotaha?
16 Pete ne nofo tokotaha e Kerisiano ha ko e fifiliaga fakatagata po ke tuaga he tau mena tutupu he matakavi ne nofo ai, ne moua mai he tuaga nakai fai tane ia e tau mitaki loga ma e tagata. Lahi e tau magaaho he tagata nofo tokotaha ke kumikumi e Kupu he Atua mo e manamanatu fakahokulo ki ai. Kaeke ke fakaaoga fakamitaki e lautolu e tuaga nei, ti hokulo atu ha lautolu a malolo fakaagaga. Ha kua nakai fai hoa fakamau ke tutala ha laua a tau mena vihi, ti tokologa ne fakaako ke falanaki fakalahi kia Iehova mo e kumi hana a takitakiaga ke he tau mena oti. (Salamo 37:5) Lagomatai he mena nei ke fetataaki e fakafetuiaga mo Iehova.
17, 18. (a) Ko e heigoa e tau gahua mitaki ke he fekafekauaga he fonua kua lata mo e tau fekafekau a Iehova ne nofo tokotaha? (e) Fakamaama mai fefe he falu fekafekau a Iehova ne nofo tokotaha ha lautolu a fiafia lahi?
17 Ko e tau Kerisiano ne nakai fai hoa fakamau ne lahi e tau magaaho ke fakalaulahi e fekafekauaga fakaheke ke he Atua. Ko e fakaakoaga pauaki ne taute he Aoga Fakaako Fekafekau ne fakakaupa ni ma e tau matakainaga nofo tokotaha po ke tau takape. Ko e tau matakainaga fifine nofo tokotaha ne tokanoa ke foli ke he tau fakamonuinaaga he fekafekauaga ke he Atua. Ko e matakainaga fifine ne kua fita he tutala ki ai ne fifili mai he loto ke fekafekau ke he taha motu i Aferika, ko e hana a tau kupu hanai, ko ia “ko e fifine lolelole kua molea e 50 he tau tau he moui.” Ne nofo a ia i ai, pete ne pa e gahua, mo e vega oti e tau misionare. Ne fekafekau agaia a ia i ai ko e tagata foafoa, pete ni kua molea e 80 e tau tau he moui hana he mogonei. Fiafia nakai a ia? Ke he hana a tala he moui ne tohi a ia pehe: “Ne maeke ia au ke fakaaoga e tokanoaaga mo e mukamuka ke faifano, ne moua ha ko e nofo tokotaha ke fakalavelave ke he feua, mo e moua mai he mena nei e fiafia lahi haku. . . . Ke he tau tau loga ko e haku a fakafetuiaga mo Iehova kua fakahokulo atu. Ha ko e fifine nofo tokotaha he taha motu i Aferika, ne kitia lahi e au a ia ko e Puipuiaga.
18 Mailoga lahi foki, e tau kupu he matakainaga tane ne fekafekau he matapatu he Kaufakalatahaaga Kolo Toko ke he loga he tau tau. Ne fiafia a ia, pete ne nakai fai hoana a ia mo e ha ha ia ia e amaamanakiaga ke he lagi ne nakai fia fai fakamauaga. Ke he tau 79 hana, ne tohi e ia: “Ke he tau aho oti ne ole e au ke he ha tautolu a matua fakahelehele he lagi ke he liogi ke lagomatai mo e pulotu ke tumau e malolo fakaagaga ti pihia foki e malolo ke he tino ke maeke ia au ke fekafekau tumau ke he hana a finagalo. Ke he tau tau fagofulu ma hiva kua mole ke he fekafekauaga ki a Iehova kua olioli moli au ke he fiafia, fai taui mitaki mo e fakamonuinaaga e puhala he moui. Mo e fakaalofa-totonu noa a Iehova ko e amanaki lahi au ke matutaki e fekafekauaga ke he hana a lilifu mo e fakahekeaga mo e fakamonuinaaga he hana tau tagata. . . . [Ko e] olioli a Iehova ne lagomatai aki au ke fakatumau e tau mitaki he tua, mo e amanaki lahi ke he magaaho ka nakai ha ha i ai e tau fi a Iehova mo e puke e lalolagi oti ke he hana lilifu.”—Numera 14:21; Nehemia 8:10; Ko e Kolo Toko, Peritania, Novema 15, 1968, tau lau tohi 699-702.
Falanaki ke he Heigoa e Fiafia Lahi Moli?
19. Ko e falanaki tumau ke he heigoa ha tautolu a fiafia lahi?
19 Ko e ha tautolu a fakafetuiaga uho mo Iehova, hana talia fiafia, mo e hana fakamonuinaaga—ko e tau mena hanei ke moua aki e tautolu e fiafia moli ke he tukulagi. Ka ha ha ia tautolu e manamanatuaga tonu nei ke he mouaaga he fiafia moli, to mailoga he tau fekafekau fai hoa fakamau a Iehova, ko e ha lautolu a fakamauaga ko e mena nakai uho ke he ha lautolu a tau momoui. Ne omaoma a lautolu ke he fakatonuaga he aposetolo ko Paulo: “Ka ko e haku a tala atu nai, ko e tau matakainaga na e, kua gahoa e tau aho kua toe kia tuga he nakai fai hoana, a lautolu kua fai hoana.” (1 Korinito 7:29) Nakai pehe e mena nei ke tiaki ha lautolu a tau hoana. Tuku fakamua he tau tane Kerisiano e fekafekauaga ki a Iehova, ti pihia foki ni ha lautolu a tau hoana fakaatua, fakahelehele, mo e lagomatai, ko e falu ne fekafekau mau mo hoa ke he ha lautolu a tau tane.—Fakatai 31:10-12, 28; Mataio 6:33.
20. Ko e heigoa e tau manamanatuaga tonu he tokologa he tau Kerisiano ke he ha lautolu a tau fakamonuinaaga ha ko e fakamauaga?
20 Ko e tau matakainaga fai hoana ne gahua leveki faifano, gahua ke he Peteli, tau momotua he fakapotopotoaga—ko e moli, ko e tau matakainaga Kerisiano ne fai hoa fakamau ne tuku fakamua e tau mena he Kautu—ne “toto e tau mena he lalolagi nai tuga he nakai toto fakalahi ki ai”; ne gahua a lautolu ke fakahaohao ha lautolu a fakamonuina ha koe fakamauaga ke he ha lautolu a tau momoui kua tukulele ke fekafekau ki a Iehova. (1 Korinito 7:31) Ka e taha e mena, fiafia a lautolu. Ko e ha? Ha ko e kakano moli he ha lautolu a fiafia nakai moua mai he ha lautolu a fakamauaga ka ko e ha lautolu a fekafekau ki a Iehova. Ne tokologa e tau tane mo e tau hoana fakamoli—e, mo e ha lautolu a tau fanau foki—ne fiafia ke he fakaholoaga nei.
21, 22. (a) Ha ko e fakaveaga mai ia Ieremia 9:23, 24, ko e heigoa kua lata ke fakapuke aki ha tautolu a fiafia lahi? (e) Ko e heigoa e tau mena ke moua ai e fiafia ne talahau mai he Fakatai 3:13-18?
21 Ne tohi he perofeta ko Ieremia: “Hanei e mena ne talahau e Iehova: ‘Nakai eke e tagata mahani mitaki ke palau hagaao kia ia ha ko e hana iloilo, mo e nakai eke e tagata malolo ke palau hagaao kia ia ha ko e hana malolo lahi ue atu. Nakai eke e tagata monuina ke palau hagaao kia ia ha ko e hana tau koloa. Ka e eke a ia ne palau hagaao kia ia ke palau hagaao kia ia ha ko e mena nei, kua moua ai e lotomatala mo e moua ai e iloilo ia au, ko au ko Iehova, ko Ia ne fakagahuahua e fakaalofa-totonu, fakafili tonu mo e tututonu he lalolagi; ke he tau mena oti nei ne ha ha ia au e kolikoli, ko e kupu vagahau mai ha Iehova.”—Ieremia 9:23, 24, NW.
22 Ko e nofo tokotaha a tautolu po ke fai tane po ke hoa fakamau, ko e ha tautolu a mouaaga he fiafia lahi ko e ha tautolu a lotomatala ki a Iehova mo e fakamoli ko e ha ha ia tautolu hana a fakamonuinaaga kakano ni ha ko e gahua a tautolu ke he hana a finagalo. Ne fiafia foki a tautolu he ha ha ia tautolu e maama ke he tau mena ne ha ha i ai e aoga, ko e tau mena ne fiafia ki ai a Iehova. Ko e Patuiki ko Solomona ne fai hoana ne nakai manatu ko e fakamauaga ko e kei ni a ia hokoia ke he fiafia. Ne pehe a ia: “Fiafia e tagata kua moua e ia e pulotu, mo e tagata ne ha ha e fakailoilo, kua mua e mitaki he moua ai ke he moua he ario ke moua mai he taute e auro hokoia. Kua mua atu e uho ke he tau maka, mo e falu kolikoli foki hau kua nakai tatai ai ki ai. Ko e fuafuaaga he tau aho kua ha ha he lima matau hana; ke he hana lima hema ha ha i ai e tau monuina mo e fakahekeaga. Ko e hana tau puhala he totonu, mo e hana a tau puhala kua mafola. Ko e akau he moui ki a lautolu ne taofi mau ki ai kua fakahigoa fiafia.”—Fakatai 3:13-18, NW.
23, 24. Ko e ha ne mauokafua ai a tautolu ko e fiafia lahi oti e tau fekafekau fakamoli a Iehova ke he fakatokaaga fou?
23 Kia lautolu ne fai hoa fakamau kia tumau e olioli ke taute e finagalo he Atua. Mo e ha tautolu a tau matakainaga tane mo e fifine fakahelehele ne nofo tokotaha mai he ha lautolu a tau fifiliaga po ke tau mena tutupu ke he tau matakavi ne nonofo ai, ke fakauka ke he tau mena vihi oti ha lautolu mo e moua e fiafia mo e mamakona ke he fekafekauaga ki a Iehova he magaaho nei mo e tukulagi. (Luka 18:29, 30; 2 Peteru 3:11-13) Ke he fakatokaaga he Atua ne nakai la hoko mai, to fofola ai e “tau tohi.” (Fakakiteaga 20:12) To ha ha he tau mena nei e tau fakatufono mo e tau fakatokatokaaga fou mo e fakalagalaga kua foaki ke he fiafia lahi he tau tagata omaoma.
24 Ko e moli, to ha ha ia tautolu e mauokafua, ko e ha tautolu a “Atua fiafia” to fakatokatoka tuai e ia e tau mena mitaki fulufuluola ma tautolu ke moua aki e tautolu e fiafia lahi. (1 Timoteo 1:11) To fakatumau e Atua ke ‘fakamafola hana lima mo e fakamakona e manako he tau mena momoui oti.’ (Salamo 145:16) Ko e mena haia ne tumau ai e fiafia lahi ke he fekafekauaga ki a Iehova.
To Tali Fefe e Koe?
◻ Ko e heigoa e fakaveaga he fiafia lahi he tau fekafekau fakatapu ha Iehova?
◻ Ke he magahala he Tohi Tapu, ko hai e falu a fekafekau fiafia ha Iehova ne nofo tokotaha?
◻ Ko e ha ne talahaua mitaki e Paulo e nofo tokotaha, mo e moua fefe he falu Kerisiano e fiafia he mouiaga nei?
◻ Ko e heigoa e falanakiaga tumau he ha tautolu a fiafia lahi?
◻ Ko e ha ne lata ia tautolu ke malolo to fiafia a lautolu oti ne fakamoli ke he fakatokaaga fou?
[Fakatino he lau 16]
Tokologa e tau matakainaga fifine nofo tokotaha ne fekafekau fiafia kia Iehova ko e tau fekafekau mau
[Fakatino he lau 18]
Ko e fakaveaga he fiafia lahi e fekafekau ke he finagalo ha Iehova