Fakatonuaga Pulotu ke he Nofo Tokotaha mo e Fakamauaga
“Kua tala atu e au e tau kupu nai . . . kia fulufuluola ai, kia fekafekau fakamitaki ke he Iki mo e loto nakai fakalavelave.”—1 KORI. 7:35.
1, 2. Ko e ha kua lata e tagata ke kumikumi e fakatonuaga he Tohi Tapu ke he nofo tokotaha mo e fakamauaga?
FALU vala he moui ne fakatupu e olioli, fakaita, po ke tupetupe lahi ne kehe mai he ha tautolu a fehagai mo e tagata taane po ke fifine kehe. Ko e lata ke fehagai fakamitaki mo e tau logonaaga pihia kua aoga mooli ma tautolu ke kumi e takitakiaga faka-Atua, ka e fai logonaaga foki he taute pihia. Ko e Kerisiano ne fiafia he nofo tokotaha ka logona hifo kua peehi he magafaoa po ke tau kapitiga haana a ia ke mau. Taha kua liga manako ke mau ka e nakai moua e hoa kua latatonu. Falu ne lata mo e takitakiaga ke he puhala ke tauteute ma e tau matagahua he taane po ke hoana. Ti ko e tau Kerisiano nonofo tokotaha mo e mau ne fehagai mo e tau kamatamata ke he mahani fakataane mo e fifine.
2 Kehe mai he fiafia fakatagata ha tautolu, ko e tau matakupu nei kua lauia e tuaga ha tautolu ki mua ha Iehova ko e Atua. He veveheaga 7 he tohi fakamua ha Paulo ke he tau Korinito, ne foaki e ia e takitakiaga ke he nofo tokotaha mo e fakamauaga. Ko e foliaga haana ke omoomoi e tau tagata totou haana “kia fulufuluola ai, kia fekafekau fakamitaki ke he Iki mo e loto nakai fakalavelave.” (1 Kori. 7:35) He manamanatu a koe ke he fakatonuaga haana hagaao ke he tau matakupu aoga nei, lali ke kitia haau a tuaga—nofo tokotaha po ke mau—ko e puhala ke fekafekau katoatoa ki a Iehova.
Fifiliaga Uho Lahi he Tagata
3, 4. (a) Tutupu fēfē e falu mena uka he falu mogo ka molea e tupetupe he tau tagata hagaao ke he tau kapitiga po ke taha he magafaoa ne nakaila mau? (e) Lata fēfē e fakatonuaga a Paulo ke lagomatai e tagata ke lagotatai e onoonoaga he fakamauaga?
3 Tuga e fakalatahaaga Iutaia he senetenari fakamua, loga e aga fakamotu he vahā nei kua fakamaama e fakamauaga ko e mena kua manako lahi ki ai. Ka molea e tau tau moui pauaki he fuata taane po ke fifine ka e nakaila mau, ne liga logona hifo he tau kapitiga mo e tau magafaoa manamanatu mitaki ke tala age ki a ia falu fakatonuaga. He fakatutalaaga, liga foaki e lautolu e manatu ki a ia ke kumikumi fakamalolō e hoa. Liga fakatō kupu a lautolu hagaao ke he taha tagata taane po ke fifine kua latatonu. Liga eke lagatau foki a lautolu ke maeke a laua ne nakai mau ke feleveia. Ko e tau mahani nei he falu mogo kua takitaki ke he fakamā, mavehevehe e tau tuaga kapitiga, mo e tau logonaaga hukia.
4 Ne nakai peehi e Paulo e falu ke mau po ke nonofo tokotaha tumau. (1 Kori. 7:7) Kua fiafia a ia he fekafekau ki a Iehova ka e nakai faihoana, ka e fakalilifu e ia e tonuhia he falu ke olioli e fakamauaga. Ko e tau Kerisiano takitaha he vahā nei kua fai tonuhia foki ke fifili ma lautolu ni ke mau po ke nofo tokotaha tumau. Nakai lata he falu ke peehi a lautolu ke taute e ha puhala.
Moua e Kautūaga he Nofo Tokotaha
5, 6. Ko e ha ne fakamalolō e Paulo e nofo tokotaha?
5 Ko e vala aoga he tau kupu a Paulo ke he tau Korinito ko e onoonoaga atihake haana he nofo tokotaha. (Totou 1 Korinito 7:8.) Pete he nakai fai hoana a Paulo, ne nakai fakamatalahi a ia ki a lautolu kua mau, tuga e tau akoako moui nakai fai hoana he Kerisitenitome. Ka e fakamaama he aposetolo e aoga ne olioli he tau fekafekau tokologa ne nakai mau ha ko e tala mitaki. Ko e heigoa e aoga ia?
6 Ko e Kerisiano nofo tokotaha ne fa mukamuka ke talia e tau kotofaaga he fekafekauaga a Iehova ne liga nakai maeke he tagata ne mau. Ne moua e Paulo e kotofaaga pauaki ko e “aposetolo ke he tau tagata kehe.” (Roma 11:13) Totou Gahua veveheaga 13 ke he 20, ti muitua ki a ia mo e haana tau matakainaga misionare he hafagi e lautolu e tau fonua mo e fakatū e tau fakapotopotoaga he tau matakavi. He fekafekauaga ha Paulo, ne fakamanavalahi a ia ke he tau mena uka ne tokogahoa he vahā nei ka fehagai. (2 Kori. 11:23-27, 32, 33) Ka ko e fiafia haana he lagomatai e tokologa ke eke mo tau tutaki ne taute e tau mena uka ia ke aoga lahi. (1 Tesa. 1:2-7, 9; 2:19) To kautū kia a ia he tau mena oti ne taute e ia ane fai hoana po ke fai magafaoa a ia? Liga nakai.
7. Talahau e fakataiaga he Tau Fakamoli nonofo tokotaha ne fakaaoga e tau tuaga ha laua ke fakalaulahi e tau mena he Kautu.
7 Tokologa e Kerisiano nakai mau kua fakaaoga e tau tuaga ha lautolu mogonei ke taute fakalahi e tau mena kua lata mo e Kautū. Ko Sara mo Limbania, ko e tau paionia nonofo tokotaha i Polivia, ne hiki atu ke he maaga ne totou tau he nakai fakamatala ke he tau tagata i ai. To lekua kia he nakai fai hila? Ne talahau e laua: “Ai fai letiō po ke televisoni, ti kua nakai fakatauhele e tau tagata mai he ha lautolu a magaaho pauaki, ko e totou.” Ne fakakite he falu tagata he maaga ke he tau paionia e tau lagaki he tau tohi he Tau Fakamoli a Iehova nukua totou agaia e lautolu ka kua leva e nakai liu lomi. Ha kua moua he tau matakainaga fifine e fiafia he laulahi he tau gutuhala, ne uka a laua ke aahi atu ke he tau kaina takitaha he fonua. Taha e fifine fuakau ne tala age ki a laua: “Liga kua tata mai e fakaotiaga ha kua hoko mai tuai e Tau Fakamoli a Iehova ki a mautolu.” Falu he maaga ia ne nakai leva ti o atu ke he tau feleveiaaga he fakapotopotoaga.
8, 9. (a) Ko e heigoa ne tokaloto e Paulo he vagahau fiafia a ia hagaao ke he nofo tokotaha? (e) Ko e heigoa e tau aoga kua moua he tau Kerisiano ne nakai mau?
8 Mooli, kua moua foki he tau Kerisiano kua mau e tau fua mitaki he mogo ne fakamatala e tala mitaki he tau matakavi uka. Ka ko e falu matagahua ne hafagi ke he tau paionia nonofo tokotaha ne liga uka ki a lautolu ne mau po ke fai fanau. Ne manamanatu a Paulo hagaao ke he aoga ne mailoga e ia ke fakaholo ki mua e tala mitaki ke he tau fakapotopotoaga he matakavi. Ne manako a ia ke he tau tagata oti ke olioli, tuga ne moua e ia. Ma e kakano ia, ne tutala fiafia a ia he fekafekau ki a Iehova ko e tagata nofo tokotaha.
9 Ko e matakainaga fifine paionia nofo tokotaha mai he Tau Faahi Kaufakalataha ne tohi: “Talitonu falu tagata ko e fiafia kua nakai maeke ke moua e lautolu ne nakai mau. Ka e kitia e au ko e fiafia tukulagi kua fakavē ke he tuaga kapitiga he tagata mo Iehova. Ko e nofo tokotaha, pete ko e foakiaga, ko e mena fakaalofa ofoofogia ka fakaaoga fakamitaki ai e koe.” Hagaao ke he moua e fiafia, ne tohi e ia: “Maeke e nofo tokotaha ke tuga e lapa fakapaoga ke he fiafia, nakai ko e fakatauhele. Iloa e au kua nakai tiaki e Iehova ha tagata mai he haana a tau fakaalofa hofihofi pete he nofo tokotaha po ke mau.” Kua fekafekau fiafia a ia mogonei he motu ne manako lahi mahaki ke he tau tagata fakailoa he Kautu. Ka nofo tokotaha a koe, maeke nakai a koe ke fakaaoga e atāina haau ke gahua fakalaulahi he fakaako e kupu mooli ke he falu? Liga moua foki e koe e nofo tokotaha ke eke mo mena fakaalofa uho lahi mai ia Iehova.
Lautolu ne Nonofo Tokotaha kua Manako ke Mau
10, 11. Lalago fēfē e Iehova a lautolu kua manako ke mau ka e nakaila moua e hoa kua latatonu?
10 Fai magaaho he nofo tokotaha, tokologa he tau fekafekau mahani fakamooli a Iehova ne fifili ke kumi e hoa mau. He mailoga e lata ma e takitakiaga, kua ole a lautolu ki a Iehova ma e lagomataiaga ke kumi e hoa kua latatonu.—Totou 1 Korinito 7:36.
11 Ka amanaki a koe ke mau e taha kua tatai e tau manako mo e haau ke fekafekau loto katoa ki a Iehova, fakatumau e manatu nei ki mua Haana he liogi. (Filipi 4:6, 7) Pete ne leva e lata haau ke fakatali, ua fakaatukehe. Falanaki ke he ha tautolu a Atua fakaalofa ke eke mo Lagomatai haau, mo e to lalago e ia e logonaaga haau ke lagotatai mo e manako haau.—Hepe. 13:6.
12. Ko e ha kua lata e Kerisiano ke manamanatu fakamitaki ke he ole ma e fakamauaga?
12 Ko e Kerisiano nofo tokotaha ne manako ke mau kua liga moua e ole mai he taha ne fakauaua e tuaga fakaagaaga po ke mai foki he tagata nakai tua. Ka tupu e mena ia ki a koe, manatu ko e loto mamahi ne fua mai he taute e fifiliaga kelea he hoa mau kua mua atu e mamahi lahi mahaki ke he logonaaga he tagata he mogo ne nofo tokotaha. Ka mau, ma e mitaki po ke ma e kelea lahi mahaki, kua fakamau tukulagi a koe ke he hoa haau. (1 Kori. 7:27) Ua fia mau lahi ti taute e fifiliaga ke mau mo e tokihala fakamui a koe.—Totou 1 Korinito 7:39.
Tauteute ma e Tau Mena Tutupu Mooli he Fakamauaga
13-15. Liga ko e heigoa e tau tupuaga he matematekelea he fakamauaga kua lata e hoa ke tutala ki ai he mogo fakamahani?
13 Pete he fakamalolō e Paulo e tagata nofo tokotaha ke fekafekau ki a Iehova, ne nakai ono hifo a ia ki a lautolu kua fifili ke mau. Ka e lagomatai he fakatonuaga omoomoi haana e tau hoa ke fehagai mo e tau mena tutupu mooli he moui fai taane mo e fai hoana mo e taute e pipiaga ha laua ke mau tukulagi.
14 Falu hoa ne lata ke hiki e tau amaamanakiaga ha laua ma e anoiha. He fakamahani a laua, tokoua e tagata kua liga kitia e fakaalofa ha laua kua uho, homo ue atu, ko e fakamooliaga he olioli he fakamauaga. Ne fakamau a laua fakalataha mo e logonaaga mohe miti ti talitonu kua nakai fai mena ke utakehe e fiafia tokoua ha laua. Ko e manamanatuaga pihia kua nakai mooli. Ko e tau puhala loto fakavihi he moui fai taane mo e fai hoana kua fiafia, ka e nakai ni ko e tau mena ia ke tauteute a laua ko e taane mo e hoana ma e matematekelea ne lauia e tau fakamauaga oti.—Totou 1 Korinito 7:28.a
15 Tokologa ne mau foou kua ofo, ti hogohogo manava foki he nakai tatai e tau hoa ha lautolu ke he tau matakupu aoga mo e ha lautolu. Liga kitia e laua e kehekehe ha laua ke he puhala kua lata ia laua ke fakaaoga e tupe mo e magaaho okioki, mena ke nonofo ai a laua, mo e lagafiha e ahiahi atu ha laua ke he tau matua fugavai. Ti igatia a laua mo e tau aga nakai mitaki ka fakaita aki taha. He fakamahani, kua mukamuka ke onoono fakamāmā ke he aoga he tau mena pihia, ka e halavihi lahi ki a laua he mogo fakamui he fakamauaga. Ti lata he hoa ke fakamafola e tau faahi nei ne tupetupe ki ai ato mau a laua.
16. Ko e ha kua lata e hoa ke talia ke he puhala ke fehagai ke he tau paleko he moui fai taane mo e fai hoana?
16 Ke kautū mo e fiafia, kua lata e hoa ke fehagai fakalataha ke he tau paleko ha laua. Lata ia laua ke talia ke he puhala ke akonaki e fanau ha laua mo e puhala ke leveki e tau matua fuakau. Ko e peehiaga ne fakatupu he tau mena uka he magafaoa kua nakai lata ke veveheaki a laua. He fakagahua e fakatonuaga he Tohi Tapu, to fakamafola e laua e tau lekua loga, fakamanavalahi ke he tau lekua ne toe, mo e nonofo fiafia tokoua.—1 Kori. 7:10, 11.
17. Ko e heigoa e tupetupe ma e “tau mena he lalolagi” kua lata e hoa ke amanaki ki ai?
17 Talahau foki e Paulo taha mena tupu mooli he fakamauaga ia 1 Korinito 7:32-34. (Totou.) Mukamuka e tau tagata fai taane mo e fai hoana ke “fakaatukehe ke he tau mena he lalolagi,” tuga e tau mena kai, tau mena ke tui, tau mena ke nonofo ai, mo e falu mena foki ne nakai fakaagaaga. Ko e ha ne pihia ai? He nofo tokotaha e matakainaga taane ne gahua lahi a ia ke he fonua. Ka ko e taane mogonei, ne moua e ia kua lata a ia ke fakaaoga taha magaaho mo e malolō ia ke leveki aki e hoana haana ti moua e taliaaga mai ia ia. Pihia foki e hoana ke he haana taane. He pulotu ha Iehova, ne mailoga e Ia e manako nei. Na iloa e Ia ko e fakamauaga kautū kua fa manako lahi ke he falu magaaho mo e malolō ne fakaaoga fakamua he taane mo e hoana ke he fekafekauaga Haana he mogo ne nonofo tokotaha a laua.
18. Ko e heigoa e tau hikihikiaga ke he tau matafeua fakafiafia ka taute he falu he mole e fakamauaga?
18 Ka kua laulahi atu e fakaakoaga. Ka lata e hoa ke fakaaoga falu magaaho mo e malolō mai he fekafekauaga he Atua ke leveki aki a laua, nakai kia lata foki a laua ke fakaaoga pihia e tau magaaho fakafiafia tuga ne taute e laua fakamua he nonofo tokotaha? Ko e heigoa e lauiaaga ke he hoana ka matutaki lahi ne taane ke putoia he tau sipote mo e tau kapitiga haana? Po ke liga fēfē e logonaaga he taane ka lahi mahaki e magaaho he hoana ke he tau mena fakafiafia mo e tau kapitiga haana? Ko e hoa ne fakaheu to liga nakai leva ti logona e matimati, nakai fiafia, mo e nakai fakaalofa. Maeke ke kalo mai he mena nei ka taute e lautolu ne mau e tau mena oti kana ke fakamalolō e pipiaga ha lautolu ko e taane mo e hoana.—Efeso 5:31.
Manako a Iehova ke he Mahani Meā
19, 20. (a) Ko e ha e tau tagata kua mau ne nakai atāina he kamatamata ke mahani feuaki? (e) Ko e heigoa e hagahaga kelea kua lauia e hoa mau ka fakaatā e laua a laua ke leva e nonofo kehekehe?
19 Kua eketaha e tau fekafekau ha Iehova ke fakatumau e meā he tau mahani. Falu ne fifili ke mau ke kalo kehe he tau lekua he faahi nei. Ka ko e fakamauaga kua nakai amanaki ti moua e puipuiaga ke he mahani feuaki. He tau vahā Tohi Tapu, ko e maaga nofo taue ne puipui e tau tagata ka nonofo mau a lautolu i loto he tau kaupā ia. Mogo ka fano e tagata ki fafo he pa gutuhala ne haolo viko ai e tau tagata fofō mo e tau tagata kolokolovao, to liga kaihā po ke kelipopo a ia. Pihia foki, kua moua he tau tagata kua mau e puipuiaga mai he mahani feuaki ka nonofo mau ni a laua he tau poakiaga mahani fakataane mo e fifine ne fakatū he Punaaga he fakamauaga ma laua.
20 Ne fakamaama e Paulo e tau poakiaga ia he 1 Korinito 7:2-5. He fakafetui mahani fakataane mo e fifine ke he haana taane ko e lilifu pauaki he hoana; ti ko e lilifu foki he taane ke he haana hoana. Igatia a laua mo e amanaki ke foaki ke he taha e mahani kua “lata” he fakamauaga, po ke fakafetui mahani fakataane mo e fifine kua tonuhia e hoa mau ke moua. Ka ko e falu taane mo e tau hoana kua leva e nonofo kehekehe—he o takitokotaha ke evaeva po ke nofo kehe mai he taha ha ko e gahua tupe, ti taofi e mahani kua “lata” mai he taha. Manamanatu ke he matematekelea ka ‘nakai fahia he fakauka,’ to hihiga e tagata ke he peehiaga fakasatani ti mahani faivao. Fakamonuina e Iehova e tau ulu magafaoa kua leveki e tau magafaoa ha lautolu ka e nakai fakahagahaga kelea e tau fakamauaga ha lautolu.—Sala. 37:25.
Tau Fua Mitaki he Omaoma e Fakatonuaga he Tohi Tapu
21. (a) Ko e ha kua uka ke taute e tau fifiliaga he nofo tokotaha mo e mau? (e) Ko e ha ne aoga e fakatonuaga ia 1 Korinito veveheaga 7?
21 Ko e tau fifiliaga ne putoia e nofo tokotaha mo e fakamauaga kua mua atu foki e uka ke taute he tagata. Ko e nakai mitaki katoatoa e punaaga he laulahi he tau lekua loga he tau fakafetuiaga he tagata kua moua he tau tagata oti. He fiafia mo e monuina foki a lautolu mai ia Iehova kua nakai hao katoatoa mai he hogohogo manava, pete he nofo tokotaha po ke mau. Ka fakagahua e koe e fakatonuaga pulotu ne moua ia 1 Korinito veveheaga 7, maeke ia koe ke fakatote hifo e tau lekua pihia. He fofoga a Iehova to ‘mitaki e mena kua eke’ e koe, he nofo tokotaha po ke mau a koe. (Totou 1 Korinito 7:37, 38.) He moua e taliaaga he Atua ko e foliaga lahi mahaki ka moua e koe. Mo e talia haana, to matutaki a koe ke hoko atu ke he moui he lalolagi foou haana. Ko e tau fakafetuiaga he vahāloto he tau tagata taane mo e tau fifine i ai to atāina he tau peehiaga ne mahani mau he vahā nei.
[Matahui Tala]
Maeke Nakai Ia Koe ke Tali?
• Ko e ha kua nakai lata e taha ke peehi falu ke fai taane mo e fai hoana?
• Fakaaoga fakamitaki fēfē e koe e magaaho haau ko e fekafekau nofo tokotaha ha Iehova?
• Maeke fēfē e hoa fakamahani ke tauteute ma e tau paleko he fakamauaga?
• Ko e ha e fakamauaga kua nakai amanaki ti puipui mai he mahani feuaki?
[Tau Fakatino he lau 14]
Olioli he moua he tau Kerisiano ne nakai mau kua fakaaoga e magaaho ha lautolu ke fakalaulahi e gahua he fonua
[Fakatino he lau 16]
Ko e heigoa e tau hikihikiaga ka taute he falu he mole e fakamauaga?