Tau Fuata Ikiiki—Totou e Kupu he Atua!
1 Ko e vaha fuata ko e magaaho he tau paleko mo e tau fifiliaga uka lahi. Tokologa a mutolu e tau fuata Kerisiano kua fakafelau he tau aho takitaha mo e tau peehiaga ke moumou e tau tutuaga faka-Atua he tau mahani. He kamata a koe ke taute e tau fifiliaga fakatagata hagaao ke he fakaakoaga, gahua, mo e fakamauaga, kua lata ia koe ke fita he fakatoka e tau foliaga fakaagaga. Ke he puhala ia kua maeke ia koe ke taute e falu fifiliaga ka fakahakohako fakamitaki e moui katoa hau. Ko e tau foliaga fakaagaga ne fakatoka fakamitaki ka lagomatai a koe ke fakapulotu mo e fakakautu e puhala hau. He totou mo e manamanatu hokulo tumau ke he Kupu he Atua, to omoi a koe ke moui fakatatau mo e fakatonuaga mai he agaga, mo e tau amaamanakiaga hako hau ka hokotia ke he kautuaga.—Iosua 1:8; Sala. 1:2, 3.
2 Aoga Fefe ki a Koe? Kua puke e lalolagi ha Satani he tau lagatau ke taute e mahani kelea. (1 Ioane 2:15, 16) Kua maeke ke iloa e koe e tau kapitiga aoga po ke falu ne tatai e tau momoui mo koe ne moua he tau matematekelea ha ko e mahala ke he peehiaga atu taha. He pipiki mau ke he fakatonuaga he Tohi Tapu ka foaki ki a koe e malolo fakaagaga mo e he mahani ke tiaki e puhala agahala. Lafi ki ai, ko e fakatonuaga he Kupu he Atua kua maeke ke lagomatai a koe ke hola kehe mai he tau matahele fakagalogalo ha Satani. (2 Kori. 2:11; Hepe. 5:14) Ko e fano he puhala he Atua ka tamai ki a koe e fiafia moli—makona fakatagata ke he puhala moui hau.—Sala. 119:1, 9, 11.
3 Ko e tau matapatu fakaakoaga nakai hikihiki he Kupu he Atua kua mahomo atu ke he pulotu he tagata. (Sala. 119:98-100) Ko e fakamahani ke he tau matapatu fakaakoaga he Tohi Tapu mo e manamanatu fakahokulo ke he tau finagalo ha Iehova ne fakakite fakalataha mo e liogi mai he loto kua maeke ke lagomatai a koe ke atihake e fakafetuiaga tata mo e Tohia pulotu oti kana he Tohi Tapu, ko Iehova ko e Atua. Kua mavehe a ia: “To fakaako e au a koe, mo e fakakite kia koe e puhala ke fano ai a koe; to fakatonu e au kia koe, mo e kitekite au kia koe.”—Sala. 32:8.
4 Taute e Magaaho ke Totou Ai: Taha e Kerisiano tote ne taute e foliaga ma hana ke totou e Tohi Tapu katoa, ti fakaoti e ia he taha e tau. Aoga fefe ki a ia? Ne talahau e ia: “Ne lahi e mena ne ako e au hagaao ki a Iehova—tau mena ne fakatata lahi au ki a ia mo e taute au ke manako ke matakutaku ki a ia he moui katoa haku.” (Iako. 4:8) Kua totou nakai e koe e Tohi Tapu katoa? Ka nakai, ko e ha ne nakai eke e mena ia mo foliaga hau? To fakamonuina moli e Iehova e tau laliaga hau, mo e to helehele e koe e tau palepale lalahi.