Ko e Gahua ne Mua Ue Atu e Aoga
1. Ko e heigoa ka fakalagalaga he tau foakiaga he loto fakaaue hokulo ha tautolu ke taute ke lata mo e gahua he fonua?
1 Ko e ha kua fakamafana tumau a tautolu ke foaki fakalahi e tau magaaho, malolō, mo e tau koloa ha tautolu ke he gahua he fonua? Ha kua nakai fai gahua ne mua atu e uho! He manamanatu ke he tau lauiaaga mua ue atu ka fakatupu e manako ha tautolu ke fai vala he gahua nei ka nakai liu taute foki.—Gahua 20:24.
2. Lagomatai fēfē he fakamatala ha tautolu ke fakatapu e higoa mua ue atu a Iehova?
2 Fakatapu e Higoa a Iehova: Kua peehi he gahua fakamatala to hukui he Kautu a Iehova puhala ia Keriso Iesu e tau fakatufono oti he tagata mo e foaki e tau tuluiaga ke he tau matematekelea oti kana he tau tagata. (Mata. 6:9, 10) Kua fakaheke a Iehova ha ko ia hokoia kua maeke ke laveaki a tautolu mai he gagao mo e mate. (Isaia 25:8; 33:24) Ha kua fua e tautolu e higoa haana, kua mailoga he falu e mahani mitaki mo e fakamakutu ha tautolu ati maeke foki ke fakaheke a Ia. (1 Pete. 2:12) Kua fiafia mooli a tautolu ke fakailoa e higoa he Iki Pule Katoatoa ko Iehova ke he lalolagi katoa!—Sala. 83:18.
3. Ko e heigoa e tau monuina kua moua e lautolu ne talia fiafia e fekau he Kautu?
3 Fakahao e Tau Momoui: “Nakai finagalo a [Iehova] ke malaia taha, ka kia hohoko oti kana ke he tokihala.” (2 Pete. 3:9) Ka nakai fai tagata ke fakaako a lautolu to maeke fēfē he tau tagata ke iloa e tau mena ne onoono ki ai a Iehova ko e mahani tonu po ke nakai tonu? (Iona 4:11; Roma 10:13-15) Ka talia he tau tagata e tala mitaki, kua holo ki mua e tuaga he tau momoui ha lautolu he tiaki e tau gahua hagahaga kelea. (Mika 4:1-4) Lafi ki ai, kua moua e lautolu e amaamanakiaga fiafia he moui tukulagi. Ko e fakamatala mo e fakaako atu fakamakutu ha tautolu kua fakahao a tautolu mo lautolu ne fanogonogo ki a tautolu. (1 Timo. 4:16) Ko e kotofaaga lilifu mooli kua moua e tautolu he gahua aoga lahi nei!
4. Ko e ha ne putoia a tautolu he eketaha ke he gahua fakamatala mo e taute tutaki he Kautu?
4 Nakai leva to tamai he matematekelea lahi e moumouaga ke he lalolagi nakai tututonu nei. Ko lautolu ne tapuaki ki a Iehova to momoui. Ti, ko e fakamatala mo e taute tutaki ko e gahua mafiti, aoga, mo e lagomatai lahi hane taute mogonei. Kia tuku fakamua ai e tautolu ke he tau momoui ha tautolu!—Mata. 6:33.