Lata ia Tautolu ke Fakatumau e Fakamakutu ma e Fekafekauaga
1 He tau tau takitaha tali mai he 1992, ne foaki fakamakutu he Tau Fakamooli a Iehova e tau tulā ne molea e taha e piliona ke he gahua fakamatala ke he lalolagi katoa mo e taute tutaki he Kautu. Ko e fiafia ha ia ha tautolu kua fai vala tote ke he gahua homo ue atu nei!—Mata. 28:19, 20.
2 Mooli, ha ha ia Iehova e tau fakaaue mo e tau fakahekeaga oti, ne fakatumau a tautolu ke he fekafekauaga ha tautolu ke he “tau aho uka” nei. (2 Timo. 3:1) Ko e heigoa kua lata ia tautolu kaeke ke matutaki a tautolu ke fakalataha fakamakutu ke he gahua aoga nei?
3 Fakavēaga ma e Fakamakutu: Ko e fakaalofa hokulo ma e Atua mo e katofia, ti pihia mo e manako mai he loto ke moui fakatatau ke he tukuleleaga ha tautolu, kua fakalagalaga a tautolu ke he fekafekauga he Kautu. (Mata. 22:37-39; 1 Ioa. 5:3) Kua fakalagalaga he fakaalofa a tautolu ke taute e tau foakiaga ke maeke ke fakalataha katoatoa a tautolu ke he gahua fakamatala.—Luka 9:23.
4 Gahua ke Fakatumau e Fakamakutu: Ko e ha tautolu a fī ko e Tiapolo kua taute e tau laliaga oti ke fakalolelole aki e fakamakutu ha tautolu ma e fekafekauaga. Ko e nakai fiafia ha lautolu he matakavi ha tautolu, ko e tau fakatauhele he lalolagi nei, tau peehiaga he moui he tau aho takitaha, mo e tupetupe ke he hifo fakahaga he malolō tino ha tautolu ko e falu mena gahoa na ia ne fakaaoga e ia he lali ke fakalolelole aki a tautolu.
5 Ko e mena ia, kua lata ia tautolu ke gahua fakalahi ke fakatumau e fakamakutu malolō ha tautolu. Kua aoga ma tautolu ke feaki e ‘fakaalofa fakamua kua toka ia tautolu.’ Kua putoia he mena ia e totou mo e manamanatu hokulo tumau ke he Kupu he Atua, ko e Tohi Tapu, mo e fakaaoga e tautolu e tau foakiaga fakaagaaga oti kana he “fekafekau fakamoli mo e loto matala.”—Fakakite. 2:4; Mata. 24:45; Sala. 119:97.
6 Kua fakakite fakamaali he tau perofetaaga he Tohi Tapu, ko e aho a Iehova ma e fakatulakiaga he tau tagata nakai mahani Atua kua mafiti lahi mai. (2 Pete. 2:3; 3:10) Mo e maaliali e mena ia ke he manamanatuaga, kia gahua fakalahi a tautolu he fakatumau e fakamakutu ha tautolu ma e fekafekauaga, he fakalataha katoatoa ke he gahua fakamatala mo e taute tutaki he Kautu ke he lalolagi katoa hane hoko mogonei!