Kua Muitua Fakamalolō Nakai a Koe ke he Keriso?

‘Tuga ne o fano ai a mutolu, kia au atu he fakamalolo a mutolu ki ai.’—1 TESA. 4:1.

1, 2. (a) Ko e heigoa e tau mena homo ue atu ne kitia mata he tau tagata tokologa he vahā ha Iesu? (e) Ko e ha e magahala ha tautolu mogonei kua aoga lahi foki?

KUA manamanatu nakai a koe ko e homo ue atu ha ia ke moui he magaaho ne nofo a Iesu he lalolagi? Liga manamanatu a koe ke he magaaho ka fakamalolō ai e Iesu ti nakai lauia ke he tau fakaatukehe he mahukihuki he tino. Po kua liga manamanatu a koe ke he fiafia lahi ke kitia mo e fanogonogo ki a Iesu—ke maeke ke ako mai ia ia po ke kitia a ia ne taute e falu mana. (Mare. 4:1, 2; Luka 5:3-9; 9:11) Ko e lilifu lahi ha ia ke ha ha i ai he magaaho ne taute e Iesu e tau gahua oti nei! (Luka 19:37) Kua nakai fai atuhau tali mai he magaaho ia ne kitia mata e tau mena ia, ti ko e tau mena ne taute e Iesu he lalolagi “he eke e ia a ia mo poa” to nakai liu taute foki.—Hepe. 9:26; Ioane 14:19.

² Ko e magahala ha tautolu mogonei, kua aoga lahi foki. Ko e ha? Ha kua nonofo a tautolu he magaaho ne talahau tuai he tau Tohiaga Tapu ko e “vaha ke fakahiku ai” mo e “tau aho fakamui.” (Tani. 12:1-4, 9; 2 Timo. 3:1) He magahala nei, ne liti mai a Satani he lagi. Nakai leva, to līlī a ia ti liti “ke he pahua.” (Fakakite. 12:7-9, 12; 20:1-3) Ko e magaaho nei foki kua moua e tautolu e lilifu homo ue atu he fakapuloa e “tala mitaki nai he kautu” ke he lalolagi katoa, talahau ke he tau tagata hagaao ke he amaamanakiaga he Parataiso ka hoko mai—ko e gahua ka nakai liu taute foki.—Mata. 24:14.

3. Ato haele hake a Iesu ke he lagi, ko e heigoa ne tala age e ia ke he tau tutaki haana ke taute, ti ko e heigoa ka putoia ke he mena ia?

³ Ato haele hake a Iesu ke he lagi, ne tala age a ia ke he tau tutaki haana: “To eke foki a mutolu mo tau talahau haku ki Ierusalema, mo Iutaia oti ni, mo Samaria, ke hoko ni ke he fakaotiaga he lalolagi.” (Gahua 1:8) Ko e gahua ia to putoia e gahua fakaako atu he lalolagi katoa. Ko e foliaga? Ke taute tutaki—ko e tau tutaki lafi ki luga he Keriso—ato hoko mai e fakaotiaga. (Mata. 28:19, 20) Ko e heigoa kua lata ia tautolu ke taute ka manako a tautolu ke kautū he fakakatoatoa e poaki he Keriso?

4. (a) Ko e heigoa e mena kua lata ne peehi mai he tau kupu ha Peteru he 2 Peteru 3:11, 12? (e) Ko e heigoa kua lata ia tautolu ke puipui mai ai?

⁴ Mailoga e tau kupu nei he aposetolo ko Peteru: “Po ke fefe ha mutolu a mahani ke lata ai ke he tau mahani mitaki mo e tau mahani Atua; kua fakatalitali mo e foli atu kia hoko mai e aho [ha Iehova].” (2 Pete. 3:11, 12) Kua peehi he tau kupu ha Peteru e lata ke mataala fakalahi he tau aho fakamui nei ke iloa mooli kua fakamatapatu e tau momoui ha tautolu ke he tau gahua mahani Atua. Ko e tau gahua ia kua putoia e fakamatala e tala mitaki. Ti, ko e fiafia ha a ia ma tautolu ke kitia e makutu he tau matakainaga ha tautolu he lalolagi katoa he taute e poakiaga he Keriso ke fakamatala! He magaaho taha ia, ne mailoga e tautolu kua lata ni ke mataala neke fakatote he tau peehiaga he tau aho takitaha mai he lalolagi ha Satani mo e mai he tau fatuakiloto ni ha tautolu, e makutu ha tautolu he taute e fekafekauaga he Atua. Manamanatu la a tautolu mogoia ke he puhala ka maeke ai ke iloa mooli kua muitua tumau a tautolu ke he Keriso.

Talia Fiafia e Tau Matagahua ne Foaki he Atua

5, 6. (a) Ko e ha ne nava a Paulo ke he tau matakainaga talitonu haana i Ierusalema, ti ko e heigoa ne hataki e ia a lautolu mai ai? (e) Ko e ha kua nakai lata ia tautolu ke uta fakamāmā e tau matagahua ha tautolu ne foaki he Atua?

⁵ He tohi haana ke he tau Kerisiano i Ierusalema, ne navanava e aposetolo ko Paulo ke he tau matakainaga talitonu haana, ha ko e ha lautolu a fakauka ke tua fakamooli ti pihia foki i lalo he favaleaga he vahā i tuai. Ne talahau e ia: “Kia manamanatu a mutolu e vaha i tuai, ne fakamaamatia ai a mutolu, ti fakauka ai a mutolu ke he tau lahi he tau mena matematekelea.” E, kua manatu e Iehova e puhala tua fakamooli ha lautolu. (Hepe. 6:10; 10:32-34) Ko e tau kupu mafanatia ia ha Paulo kua liga fakamalolō lahi ke he tau Kerisiano Heperu ia. Ka e he tohi taha ia ni, ne hataki foki a Paulo ke he fatuakiloto he tagata kaeke kua nakai tau taofi, to fakatote e makutu ma e fekafekauaga he Atua. Ne tohi e ia kua lata he tau Kerisiano ke nakai “totoko” he muitua ke he tau poaki he Atua.—Hepe. 12:25.

⁶ Ko e hatakiaga ia ke he fatuakiloto ke “totoko” atu ke nakai talia e tau matagahua ne foaki he Atua kua hagaao foki ke he tau Kerisiano he vahā nei. Mailoga ai e tautolu e lata ha tautolu ke fakamalolō ke nakai uta fakamāmā e tau matagahua Kerisiano ha tautolu po ke fakaatā ke tote hifo e makutu ha tautolu ma e fekafekauaga he Atua. (Hepe. 10:39) He taute e gahua tapu kua putoia ai e moui mo e mate.—1 Timo. 4:16.

7, 8. (a) Ko e heigoa ka lagomatai a tautolu ke tumau e makutu ma e fekafekauaga he Atua? (e) Kaeke kua galo fakahaga e makutu fakamua ha tautolu, ko e heigoa kua lata ke manatu e tautolu hagaao ki a Iehova mo Iesu?

⁷ Ko e heigoa ka lagomatai a tautolu ke puipui mai he totoko ke nakai fakamooli e tau matagahua ha tautolu ke he Atua? Taha e puhala aoga ke tau atu ke he fatuakiloto ia, ko e manamanatu fakahokulo tumau ke he kakano he omonuo he tukuleleaga ha tautolu. Ko e kakano, ne mavehe a tautolu ki a Iehova to taute fakamua e tautolu e finagalo haana he tau momoui ha tautolu, mo e manako a tautolu ke fakatumau ke he maveheaga ia. (Totou Mataio 16:24.) Ko e mena ia, he falu magaaho kua lata ia tautolu ke fakamanou ti hūhū hifo: ‘Kua logona agaia nakai e au e mauokafua ke moui fakatatau ke he tukuleleaga haaku ke he Atua ke tuga ne taute e au he magaaho ne papatiso ai? Po kua galo kia e makutu haaku tali mai he tau tau fakamua ia?’

⁸ Kaeke kua fakakite he kumikumi fakatagata ne taute fakamooli kua fakalolelole tuai a tautolu, kua mitaki mogoia ia tautolu ke liu manamanatu ke he tau kupu atihake he perofeta ko Sefanaia. Ne tohi e ia: “Aua neke tagatagatō ai hau a tau lima. Ko Iehova hāu a Atua ha i loto ia koe kua malolo a ia; to fakamoui ai e ia; to olioli a ia ki a koe mo e fiafia.” (Sefa. 3:16, 17) Ko e tau kupu mafanatia nei kua hagaao fakamua ke he tau Isaraela i tuai ne liliu ki Ierusalema mai he fakapaea ki Papelonia. Pete ia, kua mooli agaia e fakamafanaaga nei ke he tau tagata he Atua he vahā nei. Ha ko e gahua ne taute e tautolu ko e gahua ha Iehova, kua lata ia tautolu ke tokaloto na lalago mo e fakamalolō tokoua e Iehova mo e Tama haana a tautolu ke fakamooli katoatoa e tau matagahua ha tautolu ne foaki he Atua. (Mata. 28:20; 2 Kori. 4:7) Ka eketaha a tautolu ke matutaki ke taute fakamakutu e gahua he Atua, to fakamonuina e ia a tautolu mo e lagomatai a tautolu ke fakatumau ke tupu fakaagaaga.

Fakamakutu he ‘Kumikumi Fakamua e Kautu’

9, 10. Ko e heigoa e kakano he fakataiaga ha Iesu ke he kaiaga lahi, ti ko e heigoa ka fakaako e tautolu mai ai?

⁹ He taumafa ke he kaiaga he kaina he pule he tau Farasaio, ne talahau e Iesu e fakataiaga hagaao ke he kaiaga mena lahi. He fakataiaga ia, ne fakamaama e Iesu e magaaho ne uiina e tau tagata kehekehe ke omai ke moua e Kautu he lagi. Ne fakamaama foki e ia e kakano ke “kalo kehe,” po ke totoko. (Totou Luka 14:16-21.) Ko e tau tagata ne uiina he fakataiaga ha Iesu ne kalo kehe ke nakai oatu ke he kaiaga lahi. Ne pehē taha kua lata a ia ke fano ke kitekite e kaina ne fakatau laia e ia. Ti pehē foki taha kua fakafua tuai e ia e tau povi ti manako ke fano ke kitia ai. Ka e pehē agaia taha: ‘Kua nakai maeke au ke fina atu. Kua fai hoana tuai au.’ Ko e tau talahauaga fakateaga anei. Ka fakatau he taha e kaina po ke tau manu huifā kua fa mahani ke kitekite fakamua ki ai, ti nakai lata mogoia ke tupetupe lahi ke kitekite ki ai he magaaho fakamui. Ti ko e lata he ha e faihoana laia ke taute e tagata ke nakai talia e uiina aoga lahi pihia? I loto he fakataiaga, ko e mena haia ne ita lahi e tagata he fale!

¹⁰ Kua maeke e tau tagata oti he Atua ke ako mai he fakaakoaga he fakataiaga ha Iesu. Ko e heigoa a ia? Kua nakai lata a tautolu ke fakaatā e tau mena fakatagata, tuga ne totoku he fakataiaga ha Iesu, ke eke mo tau mena aoga lahi ki a tautolu ti tuku kehe e fekafekauaga ha tautolu ke he Atua. Ka nakai tuku he Kerisiano e tau mena fakatagata he tuaga kua lata, to tote fakahaga e makutu haana ma e fekafekauaga. (Totou Luka 8:14.) Ke kalo mai neke tupu e mena ia, kua momoui fakatatau a tautolu ke he tomatomaaga ha Iesu: “Kia kumikumi fakamua a mutolu ke he kautu he Atua mo e hana tututonu.” (Mata. 6:33) Kua mafanatia mooli ke kitia e tau fekafekau he Atua—fuata mo e fuakau—hane fakagahua e fakatonuaga aoga lahi ia! Ti tokologa kua taute e tau lakaaga ke fakamukamuka e tau puhala momoui ha lautolu ke maeke ke foaki fakalahi e magaaho ke he fekafekauaga. Ne iloa ai e lautolu ko e makutu he kumikumi fakamua ke he kautu ka tamai e fiafia mooli mo e mauokafua lahi.

11. Ko e fakamauaga fe he Tohi Tapu ne fakamaama e aoga he fakamakutu mo e loto katoa he fekafekau ke he Atua?

¹¹ Ke fakamaama e aoga he fakamakutu ke he fekafekauaga he Atua, mailoga e mena ne tupu he moui he Patuiki ko Ioasa ha Isaraela. He tupetupe to kaumahala mooli e tau Isaraela he tau Suria, ne tagi a Ioasa ki a Elisaio. Ne hataki he perofeta a ia ke fana atu e matafana mai he pū fakamaama ki Suria, he fakakite kua kautū atu ke he motu ia ha ko Iehova. Kua lata ke fakamalolō mooli he mena nei e patuiki. Oti ti tala age a Elisaio ki a Ioasa ke uta haana a tau matafana ti ta aki e kelekele. Ne ta lagatolu ni e Ioasa e kelekele. Ne ita lahi a Elisaio ke he mena nei, ha ko e mena ka ta lagalima po ke lagaono e kelekele to fakakite ‘kua keli a Suria ato fakaoti ai.’ Ti he mogonei ne lagatolu ni e kautū ha Ioasa. Ha kua taute ai e ia ka e nakai fakamakutu, ne fakakaupā ni e kautūaga ha Ioasa. (2 Patu. 13:14-19) Ko e heigoa ka fakaako e tautolu mai he fakamauaga ia? To fakamonuina fakalahi ni e Iehova a tautolu ka taute loto katoa mo e fakamakutu e tautolu e gahua haana.

12. (a) Ko e heigoa ka lagomatai a tautolu ke fakatumau e makutu ke he fekafekauaga he Atua ka e fahia agaia ke he tau paleko he moui? (e) Talahau e puhala kua aoga ki a koe he lavelave tumau ke he fekafekauaga.

¹² Kua kamatamata he tau paleko he moui e makutu mo e fakamooli ha tautolu ke he fekafekauaga he Atua. Tokologa e tau matakainaga hane fahia ke he tau tutūaga uka fakatupe. Kua hogohogo manava falu ha kua fakakaupā he gagao lahi e mena kua maeke ia lautolu ke taute he fekafekauaga ha Iehova. Ka kua lata agaia a tautolu takitokotaha ke taute e tau lakaaga ke kitia mooli kua fakatumau e makutu ha tautolu mo e matutaki ke muitua katoatoa ke he Keriso. Fakamolemole mailoga falu lagomataiaga mo e tau kupu tohi i loto he puha “Ko e Heigoa ka Lagomatai a Koe ke Muitua Tumau ke he Keriso?” Manamanatu ke he puhala ka fakagahua katoatoa ai e koe. Ka taute pihia e koe, to moua e koe e tau aoga mooli. He lavelave tumau ke he fekafekauaga kua fakalagotatai a tautolu, fakamonuina e tau momoui ha tautolu, mo e tamai ki a tautolu e mafola mo e fiafia lahi mahaki. (1 Kori. 15:58) Mua atu, he loto katoatoa ke he fekafekauaga ha tautolu ke he Atua kua lagomatai a tautolu ke “foli atu kia hoko mai e aho [ha Iehova].”—2 Pete. 3:12.

Kia Kumikumi Hifo Fakamooli

13. Maeke fēfē ia tautolu takitokotaha ke iloa ko e heigoa e kakano ke fekafekau loto katoa?

¹³ Kua mitaki mogoia ke manatu, ke gahua mo e loto katoa kua nakai kakano ko e fiha la e tulā ka fakaaoga e tautolu ke he fekafekauaga. Kua kehekehe e tau tuaga he tau tagata takitokotaha. Ko e tagata ne fakaaoga taha po ke ua ni e tulā he gahua he fonua he tau mahina takitaha, kua talia fiafia e Iehova kaeke ko e mena ni haia nukua fakaatā he malolō tino haana a ia ke taute. (Fakatatai Mareko 12:41-44.) Ti ke iloa e kakano ke fekafekau loto katoa a tautolu takitokotaha ke he Atua, kua lata ia tautolu ke kumikumi fakamooli ke he tau mena kua fahia ki ai mo e ke he tau tuaga ha tautolu. Ha ko e tau tutaki he Keriso, kua manako foki a tautolu ke fakatatai e onoonoaga ha tautolu mo e haana. (Totou Roma 15:5; 1 Kori. 2:16) Ko e heigoa ne tuku fakamua e Iesu he moui haana? Ne talaage e ia ke he moto tagata mai i Kapanaumi: “Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.” (Luka 4:43; Ioane 18:37) He tokaloto e makutu ha Iesu ma e fekafekauaga haana, kia liu kitekite ke he tau tuaga haau ke kitia kua maeke nakai ia koe ke fakalaulahi atu e fekafekauaga haau.—1 Kori. 11:1.

14. Ko e heigoa e tau puhala ka fakalaulahi atu e tautolu e fekafekauaga ha tautolu?

¹⁴ Ko e manamanatu fakamitaki ke he tau tuaga ha tautolu, ka takitaki atu a tautolu ke talahau kua maeke ia tautolu ke fakatolomaki e magaaho kua fakaaoga e tautolu he fekafekauaga. (Mata. 9:37, 38) Ke tuga anei, kua tokoafe e tau fuata ikiiki ha tautolu ne paase mai laia he aoga kua fakalaulahi e fekafekauaga ha lautolu, ti he mogonei kua logona hifo e fiafia he fekafekau fakamakutu ko e tau paionia. Manako nakai a koe ke moua foki e fiafia ia? Kua manamanatu hifo falu matakainaga ke he tau tuaga ha lautolu ti fifili kua maeke ia lautolu ke hiki ke he taha matakavi he motu ha lautolu, po ke taha motu foki, ne manako lagomatai lahi ma e tau tagata fakailoa he Kautu. Ka ko e falu kua ako e lautolu e taha vagahau foki ke lagomatai e tau tagata vagahau motu kehe. Pete kua paleko ke fakalaulahi atu e fekafekauaga ha tautolu, kua tamai e tau monuina loga, ti maeke ia tautolu ke lagomatai e tokologa he falu tagata ke ‘hokotia he maama ke he kupu moli.’—1 Timo. 2:3, 4; 2 Kori. 9:6.

Tau Fakafifitakiaga he Tohi Tapu ke Muitua ki Ai

15, 16. Ha hai e tau fakafifitakiaga kua lata ia tautolu ke muitua ki ai he eke mo tau tutaki makutu he Keriso?

¹⁵ Tali atu fēfē falu ne eke mo tau aposetolo he magaaho ne ui atu e Keriso ki a lautolu ke eke mo tau tutaki haana? Hagaao ki a Mataio, ne pehē e fakamauaga: “Ti toka hifo e ia e tau mena oti, ti matike a ia, mo e mui atu kia ia.” (Luka 5:27, 28) Hagaao ki a Peteru mo Aneterea ne takafaga ika, kua totou e tautolu: “Ati toka ai agataha e laua ha laua a tau kupega, ka e mumui atu kia ia.” Ne kitia foki e Iesu a Iakopo mo Ioane hane ono, po ke haihai he tau kupega mo e matua taane ha laua. Tali atu fēfē a laua ke he uiina ha Iesu? “Ati toka ai agataha e laua e foulua mo e matua ha laua, ka e mumui atu kia ia.”—Mata. 4:18-22.

¹⁶ Taha fakafifitakiaga mitaki foki ko Saulo, ne eke mo aposetolo ko Paulo. Pete ne favale velagia a ia ke he tau tutaki he Keriso, ne hiki e puhala haana ti eke ‘ko e kapiniu kua fifili’ ke fakamatala e higoa he Keriso. “Ti fakamatala agataha e [Paulo] ke he tau sunako, ko [Iesu] ni ko e Tama he Atua.” (Gahua 9:3-22) Ti pete he fakauka a ia ke he tau matematekelea mo e tau favale loga, ne nakai galo ia Paulo e makutu haana.—2 Kori. 11:23-29; 12:15.

17. (a) Ko e heigoa e kakano ati manako a koe ke muitua ke he Keriso? (e) Ko e heigoa e tau monuina kua olioli e tautolu he taute mo e loto malolō katoatoa e finagalo ha Iehova?

¹⁷ Kua manako mooli a tautolu ke muitua ke he tau fakafifitakiaga mitaki he tau tutaki ia ti tali atu fakamakai mo e nakai fakauaua. (Hepe. 6:11, 12) Ko e heigoa e tau monuina kua olioli e tautolu he eketaha tumau a tautolu ke muitua fakamakutu mo e katoatoa ke he Keriso? Moua e tautolu e fiafia mooli he taute e finagalo he Atua mo e he logona hifo e makona he talia e tau kotofaaga lafi ki luga he fekafekauaga mo e tau matagahua i loto he fakapotopotoaga. (Sala. 40:8; totou 1 Tesalonia 4:1.) E, he eketaha fakamalolō a tautolu ke muitua ke he Keriso, ne olioli e tautolu e tau monuina loga mo e tukulagi, tuga e mafola he manamanatuaga, makona he loto, aga fakalatalata, taliaaga he Atua, mo e amaamanakiaga he moui tukulagi.—1 Timo. 4:10.

Manatu Nakai e Koe?

• Ko e heigoa e gahua aoga ne foaki ki a tautolu, mo e lata ke fēfē e onoonoaga ha tautolu ki ai?

• Ko e heigoa e aga fakatagata kua lata ia tautolu ke fakaeneene mai ai, ti ko e ha?

• Ko e heigoa e kumikumi hifo fakamooli kua lata ke taute e tautolu?

• Ko e heigoa ka lagomatai a tautolu ke fakatumau ke muitua ke he Keriso?

[Puha/Fakatino he lau 27]

Ko e Heigoa ka Lagomatai a Koe ke Muitua Tumau ke he Keriso?

▪ Totou e Kupu he Atua he tau aho takitaha, mo e manamanatu fakahokulo ke he tau mena ne totou e koe.—Sala. 1:1-3; 1 Timo. 4:15.

▪ Liogi tumau ke lalago mo e takitaki he agaaga he Atua.—Saka. 4:6; Luka 11:9, 13.

▪ Lafi auloa mo lautolu ne fakakite e loto fakamakutu ma e fekafekauaga.—Fakatai 13:20; Hepe. 10:24, 25.

▪ Mailoga e mafiti he tau magaaho kua moui ai a tautolu.—Efeso 5:15, 16.

▪ Kia mataala ke he hagahaga kelea ka moua mai he “kalo kehe.”—Luka 9:59-62.

▪ Manamanatu tumau e omonuo he tukuleleaga haau mo e tau monuina loga ne fua mai he fekafekau ki a Iehova mo e muitua loto katoa ke he Keriso.—Sala. 116:12-14; 133:3; Fakatai 10:22.