Kia Manako Lahi ke he Tapuakiaga Mooli
“Kua loga e tau saito ke helehele, ka ko e tau tagata gahua, kua tokogaogao a lautolu.”—MATA. 9:37.
1. To fakamaama fēfē e koe e mafiti?
HA HA ia koe e tohi kua lata ke he tagata pauaki ke kikite ki ai ato oti e aho. Ko e heigoa haau ka taute? Tohi ai e koe “MAFITI!” Ko koe hane fina atu ke he matagahua aoga lahi haau, ka kua mule a koe. Ko e heigoa haau kua taute? Tala age a koe ke he tagata fakaholo, “Fakamolemole fakaave; ko e fekau MAFITI!” E, ka ha ha ia koe e gahua kua lata ke taute ti tote lahi e magaaho, ne logona hifo e koe e nakai fakatotoka mo e tupetupe. To gahuahua mafiti e moui haau ti gahua fakatepetepe a koe mo e fakamakamaka. Ko e mafiti a ia!
2. Ko e heigoa e gahua mafiti lahi ma e tau Kerisiano mooli he vahā nei?
2 Ma e tau Kerisiano mooli he vahā nei, nakai fai mena ne mua atu e mafiti ka ko e fakamatala he tala mitaki he Kautu mo e taute tutaki he tau tagata he tau motu oti. (Mata. 24:14; 28:19, 20) He fatiaki e Mareko e tau kupu a Iesu ne tohia e ia, kua lata e gahua nei ke taute “fakamua,” ato hoko mai e fakaotiaga. (Mare. 13:10) Latatonu mooli e puhala ia. Pehē a Iesu: “Kua loga e tau saito ke helehele, ka ko e tau tagata gahua, kua tokogaogao a lautolu.” Nakai fakatali e heleheleaga; kua lata ke fakaputuputu ato oti e magahala.—Mata. 9:37.
3. Tali atu fēfē e tokologa ke he manako mafiti ke fakamatala?
3 Ha kua aoga lahi mahaki e gahua fakamatala ki a tautolu, kua latatonu ke foaki fakalahi ha tautolu a tau magaaho, malolō, mo e mataala kua lata. Nava lahi, tokologa hane taute pihia. Falu ne fakamukamuka e tau momoui ni ha lautolu ke maeke ke taute e fekafekau mau tuga e tau paionia po ke tau misionare po ke gahua he taha he tau kaina Peteli he lalolagi katoa. Lavelave lahi e tau momoui ha lautolu. Liga loga e mena ne toka hifo e lautolu ti loga e paleko ne feleveia mo lautolu. Ka e fakamonuina lahi e Iehova a lautolu. Kua fiafia a tautolu ma lautolu. (Totou Luka 18:28-30.) He nakai maeke e falu ke fakalataha ke he tau matagahua he tau tagata fakapuloa mau, nukua foaki fakalahi e magaaho kua lata ke he gahua fakamoui nai, ne putoia e lagomatai he tau fanau ha tautolu ke moua e moui.—Teu. 6:6, 7.
4. Ko e ha ne liga hihiga e falu ke galo e manatu mafiti?
4 He fitā e kitia e tautolu, na fa matutaki e manatu mafiti mo e magaaho fakakaupā, magaaho fafati, mo e fakahikuaga. Kua nonofo a tautolu he magaaho he fakaotiaga, ti loga e fakamooliaga he Tohi Tapu mo e fakamauaga tuai ke kitia aki e mena ia. (Mata. 24:3, 33; 2 Timo. 3:1-5) Nakai fai tagata agaia ne iloa e magaaho tonu ka hoko mai e fakaotiaga. He talahau fakamatafeiga ke he “fakamailoga” ne fakakite aki e “fakaotiaga he lalolagi,” ne talahau fakatonu e Iesu: “Ka ko e aho ia mo e magaaho ia nakai iloa he taha tagata, nakai iloa foki he tau agelu he lagi, ka ko e haku a Matua hokoia ni.” (Mata. 24:36) Ha kua pihia, ne liga uka he falu ke fakatumau e manatu mafiti he tau tau takitaha, mua atu ka leva tuai he taute pihia e lautolu. (Fakatai 13:12) Fa pihia nakai e logonaaga haau falu magaaho? Ko e heigoa ka lagomatai a tautolu ke feaki po ke fakatumau e manatu mafiti ma e gahua kua manako a Iehova ko e Atua mo Iesu Keriso ke taute e tautolu he magaaho nei?
Manamanatu ke he ha Tautolu a Fakafifitaki ko Iesu
5. Ke he tau puhala fe kua fakakite e Iesu e manatu mafiti ne matutaki mo e fekafekauaga?
5 Ko lautolu oti ia ne fakatātā e fakamafiti he fekafekau ha lautolu ke he Atua, ko Iesu Keriso mooli ko e fakafifitaki ne mua atu. Taha kakano he fakamafiti haana ha kua lahi mahaki e mena ka taute e ia he tolu ni mo e hafa e tau. Ka e lahi atu e mena ne taute e Iesu hagaao ke he tapuakiaga mooli ke he mena ne taute he ha tagata. Ne fakailoa atu e ia e higoa mo e finagalo he haana Matua, fakamatala e tala mitaki he Kautu, fakatapakupaku e fakatupua mo e tau fakaakoaga fakavai he tau takitaki lotu, ti fakatokoluga e pule katoatoa a Iehova ke hoko foki ke he mate. Ne eketaha a ia he viko takai he motu—he fakaako, lagomatai, mo e fakamaulu e tau tagata. (Mata. 9:35) Nakaila fai tagata ne lahi mahaki e mena ne taute he magaaho kū pihia. Ne gahua malolō lahi foki a Iesu tuga ni e tau tagata oti.—Ioane 18:37.
6. Ko e heigoa e mena ne mua atu e aoga ke he moui a Iesu?
6 Ko e heigoa ne fakalagalaga a Iesu ati fakamakamaka ke he fekafekauaga haana? Mai he perofetaaga a Tanielu, nukua iloa e Iesu e matutakiaga haana mo e magaaho fafati ha Iehova. (Tani. 9:27) Ti tuga he talahau, ko e fekafekauaga haana he lalolagi ne fakaoti he “maga foki ne veveheua aki e vaha tapu,” po ke mole e tolu mo e hafa e tau. Nakai leva e hoko ofoofogia atu haana ki Ierusalema he vahā tau tupu he 33 V.N., ne pehē a Iesu: “Kua hoko mai e vaha ke hoko ai e Tama he tagata ke he hana lilifu.” (Ioane 12:23) Pete he iloa e Iesu kua tata lahi mai e mate haana, ne nakai eke e ia e naia mo mena kua mua e aoga ke he moui haana, ko e matapatu kakano he gahua malolō. Ka e mua atu e aoga ki a ia he fakaaoga e tau magaaho oti ke taute e finagalo he haana Matua mo e fakakite e fakaalofa ke he tau tagata haana. Ko e fakaalofa ia ne omoomoi a ia ke fakapotopoto mo e fakamahani e tau tutaki haana, he fekau atu a lautolu ke taute e tau matagahua fakamatala. Taute e ia pihia ke maeke ia lautolu ke matutaki e gahua ne kamata e ia mo e to fakalaulahi atu foki e tau gahua ne taute e ia.—Totou Ioane 14:12.
7, 8. Tali atu fēfē e tau tutaki he fakameā e Iesu e faituga, ti ko e ha ne taute pihia e Iesu?
7 Taha e mena ne tupu he moui ha Iesu ne fakakite fakamalolō e manako lahi ne ha ha ia ia. He mataulu he fekafekauaga haana, ko e magahala he Paseka he 30 V.N. Ne o mai a Iesu mo e tau tutaki haana ki Ierusalema mo e kitia ke he faituga “a lautolu ne fakafua e tau povi, mo e tau mamoe, mo e tau lupe; ko lautolu foki ne fakafua e tau tupe, ha ne nonofo mai ai.” Ko e heigoa e tali ha Iesu, ti lauia fēfē e tau tutaki haana ke he mena ia?—Totou Ioane 2:13-17.
8 Ko e mena ne taute mo e talahau e Iesu he mogoia ne fakamanatu mooli ke he tau tutaki e tau kupu fakaperofeta he taha salamo ha Tavita: “Kua kai ni au he manako lahi ke he hāu a fale.” (Sala. 69:9) Ko e ha? Ha ko e mena ne taute e Iesu ne putoia lahi mahaki e hagahaga kelea. Mole ia, ko e tau takitaki he faituga—ko e tau ekepoa, tau tohikupu, mo e falu—i tua he tau gahua fakafua koloa fakalialia ne hoko i ai. Ke fakatapakupaku mo e fakatauhele e tau lagatau ha lautolu, ne taute e Iesu a ia mo fī he tau takitaki lotu he magahala ia. Ne mailoga mitaki he tau tutaki e tuaga, ko e ‘manako lahi ke he fale he Atua,’ po ke fakamakutu ke he tapuakiaga mooli, ne kitia maali ai. Ko e heigoa mogoia e manako lahi? Kehe kia mai he mafiti?
Fakatatai e Mafiti mo e Manako Lahi
9. Liga fakamaama fēfē e manako lahi?
9 Taha e tohi fakamaama kupu ne talahau e “manako lahi” ko e “fakamakai mo e hokulo e fiafia he tutuli e taha mena,” ti foaki e tau kupu kua tatai e kakano tuga e loto lahi, eketaha, tukumoeulu, mo e hakahakau. Mooli, ko e fekafekauaga a Iesu ka fakakite ke he tau kupu oti nai. Ti, ko e Today’s English Version ne talahau pehē e kupu tohi: “Ko e haaku a fakamooli katoatoa ke he fale haau, Ma Atua na e, kua kakā ki loto haaku tuga e afi.” Fuluola ai, he falu vagahau Asia, ko e kupu ma e “manako lahi” kua moua mai he ua e vala ne kakano mooli ko e “loto velagia” ke tuga kua kakā e loto. Ko e mena ia ne manatu he tau tutaki e tau kupu a Tavita he kitia e lautolu e mena ne taute e Iesu he faituga. Ti ko e heigoa ne omoi e loto ha Iesu ke velagia, mo e gahuahua, po ke fakalagalaga a ia ke taute pihia?
10. Ko e heigoa e kakano he “manako lahi” tuga ne fakaaoga he Tohi Tapu?
10 Ko e kupu “manako lahi” he salamo a Tavita kua moua mai he kupu Heperu ne fa fakaliliu “ita tafuā” po ke “mahekeheke” he falu vala he Tohi Tapu. Ne fa fakamaama ai he New World Translation he falu magaaho ko e loto fakamooli katoatoa. Taha tohi fakamaama kupu he Tohi Tapu ne pehē hagaao ke he talahauaga nai: “Kua fa fakaaoga ai ke lata mo e fakafetuiaga he fakamauaga . . . Tuga ni e mahekeheke he taane po ke hoana kua fakakite fakalahi e tutonuhia, ti fakakite he Atua e tutonuhia Haana, mo e fakamatalahi ai ki a lautolu ko e koloa uho Haana.” (Mare. 12:28-30; Luka 4:8) Ti ko e manako lahi he manatu faka-Tohi Tapu kua mua atu ke he tukumoeulu po ke hakahakau ke he tutuliaga pauaki, tuga ne fakakite he tau tagata fiafia ma e tau sipote mahuiga ha lautolu. Ko e manako lahi a Tavita ko e mahekeheke ke he puhala mitaki, ko e totoko ke he faitaua po ke ekefakakelea, ko e tomatomaaga malolō ke puipui e higoa mitaki po ke fakahako e matafatia.
11. Ko e heigoa ati omoi a Iesu ke fakamakamaka a ia?
11 Nakai uta hehē he tau tutaki a Iesu e matutakiaga he tau kupu a Tavita mo e mena ne kitia e lautolu he taute e Iesu he faituga. Ne nakai fakamakamaka a Iesu ha kua fafati e magaaho haana ka ko e manako lahi, po ke ita tafuā a ia ke lata mo e higoa he haana Matua mo e tapuakiaga meā. Magaaho ne kitia e ia e ekefakakelea mo e kupu kelea ke he higoa he Atua, kua tonuhia e manako lahi, po ke mahekeheke haana ti taute e mena ke fakahako aki e tuaga. He kitia e Iesu e tau tagata matematekelea ne pehia mo e ekefakakelea he tau takitaki lotu, ne omoi he manako lahi haana a ia ke tamai e okiokiaga ke he tau tagata, mo e talahau e tau fakafiliaga malolō ke he tau takitaki lotu favale.—Mata. 9:36; 23:2, 4, 27, 28, 33.
Kia Manako Lahi ke he Tapuakiaga Mooli
12, 13. Ko e heigoa he tau takitaki lotu Kerisitenitome he vahā nei ne taute hagaao ke he (a) higoa he Atua? (e) Kautu he Atua?
12 Ko e tau lotu mogonei ne viko takai ia tautolu kua pihia foki—po ke mua atu e kelea—ke he vahā a Iesu. Ma e fakatai, manatu e mena fakamua ne fakaako e Iesu ke he tau tutaki haana ke liogi hagaao ke he higoa he Atua: “Kia tapu hau a higoa.” (Mata. 6:9) Kitia nakai e tautolu e tau takitaki lotu, mua atu ke he tau akoako ha Kerisitenitome, kua fakaako e tau tagata ke iloa e Atua ke he haana higoa mo e ke fakatapu, po ke fakalilifu e higoa ia? Mamao ligo ai, ne talahau pikopiko e lautolu e Atua ke he tau fakaakoaga fakavai tuga e Tolu Taha, nakai maeke e tino ke mate, mo e afi tote, taute e Atua ke tuga ko e mena galo, halavihi, favale, mo e kelea muitui foki. Ne tamai foki e lautolu e ekefakakelea ke he Atua ha ko e ha lautolu a tau tukupau mo e tau pikopiko ha lautolu. (Totou Roma 2:21-24.) Lafi ki ai, kua taute e lautolu e tau mena oti kana he lali ke ufiufi e higoa he Atua, mo e utakehe ai mai he tau liliuaga ha lautolu he Tohi Tapu. Ne fakalavelave e lautolu e tau tagata he fakatata ke he Atua mo e feaki e fakafetuiaga fakatagata mo ia.—Iako. 4:7, 8.
13 Ne fakaako foki e Iesu e tau tutaki haana ke liogi ma e Kautu he Atua: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mata. 6:10) Pete e fatiaki tumau he tau takitaki lotu Kerisitenitome e liogi ia, ne tomatoma e lautolu e tau tagata ke lalago e tau mena fakapolitika mo e falu fakatokatokaaga he tagata. Lafi ki ai, ne taute fakateaga e lautolu e tau tagata ne fakamakamaka ke fakamatala mo e talahau atu e Kautu nei. Ti ko e fua, tokologa a lautolu ia ne talahau ko e tau Kerisiano, kua nakai ko e matakupu ke fakatutala e Kautu he Atua ti nakai tua foki ki ai.
14. Fakavalavai fēfē he tau akoako Kerisitenitome e Kupu he Atua?
14 He liogi ke he Atua, ne talahau fakamaali e Iesu: “Ko e hau a kupu ko e kupu moli haia.” (Ioane 17:17) Ato toka e ia e lalolagi, ne fakakite e Iesu to fifili e ia e “fekafekau fakamoli mo e loto matala” ke foaki e tau mena kai fakaagaaga ma e tau tagata haana. (Mata. 24:45) Pete he mafiti ke talahau kua fakaako e lautolu e Kupu he Atua, kua fakamooli kia e tau akoako ha Kerisitenitome ke taute e gahua he Iki? Nakai. Kua hihiga a lautolu ke fakahigoa e mena ne talahau he Tohi Tapu ko e tala fakatai po ke tala tuai. He nakai fagai e fuifui ha lautolu aki e tau mena kai fakaagaaga, ti fakamafana mo e fakamaama ki a lautolu, ne fakamagiho he tau takitaki lotu e tau teliga ha lautolu ne tua aki e tau fakaakoaga he tagata. Lafi ki ai, ne fakavalavai e lautolu e tau tuaga tokoluga he tau mahani he Atua ke felauaki mo e tau mahani foou ne fakatū e lautolu.—2 Timo. 4:3, 4.
15. Fēfē e logonaaga haau ke he tau mena oti ne taute he tau akoako ke he higoa he Atua?
15 Ha ko e tau mena oti kua taute ai—liga ke he higoa he Atua he Tohi Tapu—tokologa e tagata fakamooli kua fakagogoa po ke galo katoatoa e tua ha lautolu ke he Atua mo e Tohi Tapu. Kua mokulu a lautolu ke he matahele a Satani mo e fakatokaaga kelea haana. Ka kitia mo e logona e koe e tau mena ia hane tutupu he tau aho takitaha, fēfē e logonaaga haau? Ha ko e fekafekau a Iehova, ka kitia e koe e ekefakakelea mo e vagahau kelea kua fata ke he higoa he Atua, nakai kia omoomoi a koe ke taute e tau mena oti ke fakahako e hehē? Ka kitia e koe kua tala fakavai mo e ekefakakelea ke he tau tagata fakamooli mo e loto hako, nakai kia fakalagalaga a koe ke fakamafana a lautolu kua pehia? He kitia e Iesu e tau tagata he magahala haana kua “fakafita a lautolu, mo e tiaki atu ai, tuga e tau mamoe nakai fai leveki a lautolu,” ne nakai ni fakaalofa hofihofi a ia. Ne “kamata ai a ia ke fakaako a lautolu ke he tau mena loga.” (Mata. 9:36; Mare. 6:34) Ha ha ia tautolu e tau kakano oti ke fakamakutu ma e tapuakiaga mooli, tuga a Iesu.
16, 17. (a) Ko e heigoa kua lata ke omoomoi a tautolu ke fakamakamaka ke he gahua he fonua? (e) Ko e heigoa ka fakatutala a tautolu he vala tala ka mui mai?
16 Ka onoono pihia a tautolu ke he ha tautolu a gahua he fonua, ko e tau kupu he aposetolo ko Paulo ne moua ia 1 Timoteo 2:3, 4 kua uho lahi e kakano. (Totou.) Kua gahua malolō a tautolu he fonua he nakai ni iloa e tautolu kua nonofo a tautolu he tau aho fakamui ka e pihia foki ha kua mailoga e tautolu ko e finagalo he Atua. Kua manako a ia ke he tau tagata ke moua e iloilo he kupu mooli ke maeke foki ia lautolu ke fakaako ke tapuaki ti fekafekau ki a ia mo e monuina ai. Kua omoomoi a tautolu ke fakamakamaka ke he gahua he fonua, nakai matapatu ai ha kua fakakaupā e magaaho, ka kua manako a tautolu ke fakalilifu e higoa he Atua mo e lagomatai e tau tagata ke iloa e finagalo haana. Kua fakamakutu a tautolu ke he tapuakiaga meā.—1 Timo. 4:16.
17 Ha ko e tau tagata a Iehova, kua fakamonuina a tautolu aki e iloilo he kupu mooli hagaao ke he finagalo he Atua ke lata mo e tau tagata mo e lalolagi. Ha ha ia tautolu e tau puhala ke lagomatai e tau tagata ke moua e fiafia mo e amaamanakiaga mooli ma e vahā anoiha. Maeke ia tautolu ke fakakite ki a lautolu e puhala ke moua e puipuiaga ka hoko mai e moumouaga ke he fakatokaaga a Satani. (2 Tesa. 1:7-9) He nakai logona e fakaita po ke loto lolelole ha kua tuga na mule mai e aho a Iehova, kua lata ia tautolu ke fiafia ha kua fai magaaho agaia ma tautolu ke fakamakutu ke he tapuakiaga mooli. (Mika 7:7; Hapa. 2:3) Maeke fēfē ia tautolu ke feaki e fakamakutu pihia? To fakatutala a tautolu ke he mena nei he vala tala ka mui mai.
Maeke Nakai a Koe ke Fakamaama?
• Ko e heigoa ati omoomoi a Iesu ke gahua malolō ke he fekafekauaga katoa haana?
• Ko e heigoa e kakano he “manako lahi” he puhala faka-Tohi Tapu?
• Ko e heigoa kua kitia e tautolu he vahā nei kua lata ke fakalagalaga a tautolu ke fakamakutu ke he tapuakiaga mooli?
[Fakatino he lau 8]
Hagaaki a Iesu he taute e finagalo he haana Matua mo e fakakite e fakaalofa ke he tau tagata
[Fakatino he lau 10]
Ha ha ia tautolu e tau kakano oti ke fakamakutu ke he tapuakiaga mooli