He Magahala Fakamanatuaga Nei, To Fifitaki Nakai e Koe e Fakamakutu ha Iehova mo Iesu?

1. Ko e heigoa e laliaga pauaki ka taute he Tau Fakamoli a Iehova he magahala Fakamanatuaga?

¹ Kua fakamakutu a Iehova ke fakamooli e finagalo haana. Hagaao ke he falu monuina he Kautu he Atua, ia Isaia 9:7 ne pehē: “To eke ai e tau mena ia ke he fakamalolo a Iehova Sapaota.” Pihia foki, he fekafekauaga haana he lalolagi, ne fakatātā he Tama he Atua e fakamakutu lahi ma e tapuakiaga mooli. (Ioane 2:13-17; 4:34) He tau tau takitaha he magahala Fakamanatuaga, totou miliona e tau tagata fakailoa he lalolagi katoa ne lali pauaki ke fifitaki e fakamakutu ha Iehova mo Iesu he fakalahi e matagahua ha lautolu he fonua. Ko koe nakai taha mo lautolu?

2. Ko e heigoa ka fakalagalaga a tautolu ke taute kamata ia Mati 7?

² Matagahua he Fakamanatuaga: Ko e matagahua he tau nei ke fakailoa e Fakamanatuaga to kamata he Aho Faiumu, Mati 7. Fakatoka mogonei ke fakalataha fakamakutu ma e gahua he fonua. To pukeina e tau fakapotopotoaga he fiafia he eketaha a lautolu ke gahua e fonua ha lautolu ke oti. Lali fakalahi ke uiina e tau fakaako Tohi Tapu, tau liu aahi atu, tau kapitiga gahua, tau magafaoa, mo e tau kapitiga aoga haau he age ki a lautolu e uiina po ke he fakaaoga e jw.org.

3. Maeke fēfē a tautolu ke fakalaulahi e gahua he fonua ha tautolu ia Mati mo Aperila?

³ Paionia Fakakū: To fakalagalaga foki he fakamakutu a tautolu ke fakalaulahi e gahua fakamatala ha tautolu. Nakai fakauaua to tokologa ka maeke ke paionia fakakū ia Mati mo Aperila, ha kua maeke a tautolu ke fifili 30 e tulā. He tapuakiaga magafaoa po ke fakaako fakatagata haau, liogi ma e puhala ke maeke ia koe ke taute e mena nei. (Fakatai 15:22) Ko e hakahakau haau ma e matagahua nei ka fakalagalaga e falu ke he gahua fakamakutu. Ka taute e koe e tau hikiaga fakatagata ke lahi e mena ka taute, to fifitaki e koe e fakamakutu ha Iesu.​—Mare. 6:31-34.

4. Ko e heigoa e tau palepale he fifitaki e fakamakutu ha Iehova mo Iesu?

⁴ Ko e fifitaki e tautolu e fakamakutu ha Iehova mo Iesu he magahala Fakamanatuaga nei ka tamai e tau palepale loga. To tokologa atu foki he fonua ka fakamatala ki ai. To moua e tautolu e fiafia mo e makona ne moua he fekafekau ki a Iehova mo e foaki ke he falu. (Gahua 20:35) Mua e aoga, to fakafiafia e tautolu e Atua mo e haana Tama ne fakamakutu.