“Kia Puke he Agaaga”
1. Ko e heigoa e aga kua lata ke fakamailoga e gahua fakamatala ha tautolu?
1 Nakai lata ke fai vala he fekafekauaga Kerisiano ha tautolu kua mateafu. Ka kua fakamalolō ki a tautolu “kia puke he agaaga” mo e ke “fekafekau ki a Iehova.” (Roma 12:11, NW) Pete ia, ha ha i ai loga e mena ka tohotua e fakamakutu ha tautolu ma e gahua he fonua ha tautolu. Maeke fēfē a tautolu ke “fakapuho” e fakamakutu mo e hakahakau ha tautolu ma e fekafekau he Kautu?—2 Timo. 1:6, 7.
2. Ko e heigoa e fakafetuiaga ne ha ha he fakaako Tohi Tapu fakatagata mo e fakamakutu he gahua he fonua?
2 Fakaako Fakatagata he Tohi Tapu: Ko e tagata fakamatala lauia mitaki he Kautu ko ia ne ofania e fakatufono he Atua mo e lauia lahi mahaki ha ko e tau kupu mooli ne moua i ai. (Sala. 119:97) He iloa e tau kupu mooli he Tohi Tapu ka fakaako fakatagata, kua fakaohooho he mena nei e tau loto ha tautolu mo e fakatupu lahi e makutu ha tautolu. Ko e fakaalofa ma e Foaki he tau kupu mooli ia mo e manako ha tautolu ke folafola e tala mitaki ke he falu kua omoomoi a tautolu ke uta mau e fakahekeaga ha tautolu ke he Atua mo e fakapuloa ke he tau tagata e higoa ia. (Hepe. 13:15) Maaliali, he eketaha ke talahau atu e tala mitaki kua fakakite e loto fakaaue hokulo ha tautolu ma e aoga lahi ai.
3. Maeke fēfē he agaaga he Atua ke fakalagalaga e gahua he fonua ha tautolu?
3 Liogi ma e Agaaga he Atua: Ko e gahua he fonua ne lauia mitaki kua nakai ni fakakatoatoa he malolō ni ha tautolu. Ko e fakamakutu mooli kua moua he tafe tumau mai he agaaga he Atua. (1 Pete. 4:11) Ko e fakatata lahi ke he Punaaga he “malolo lahi” to foaki ki a tautolu e malolō fakaagaaga ke fakamatala fakamalolō. (Isaia 40:26, 29-31) He fehagai e aposetolo ko Paulo mo e matematekelea he gahua he fonua haana, ha ha ai “e lagomatai ne moua e [ia] mai he Atua.” (Gahua 26:21, 22) Ko e agaaga tapu omoomoi a Iehova ka lagomatai a tautolu ke fakamakutu ke he gahua he fonua ha tautolu, ti kua lata ia tautolu ke liogi ke moua ai.—Luka 11:9-13.
4. Ko e heigoa e tau fua mitaki ka omoomoi he fakamakutu, ka ko e heigoa e tau hatakiaga ne poaki mai?
4 Ko e fakamakutu lahi mahaki ma e fakamatala he Kautu kua omoomoi e fakamakutu lahi he tau matakainaga Kerisiano. (2 Kori. 9:2) He fonua, kua liga mua atu e fanogonogo he tau tagata ke he ogo ne talahau fakamakai mo e mauokafua. Ka ko e fakamakutu kua matutaki tumau mo e fakalotomatala mo e mahani molu. (Tito 3:2) He tau magaaho oti, kua eketaha a tautolu ke fakalilifu e tagata he kaina mo e manamanatu ke he atāina he fifiliaga haana.
5. Ko e heigoa e tomatomaaga omoomoi kua lata ia tautolu ke eketaha ke fakagahua?
5 Ko e tau tagata fakapuloa he Kautu, lata tumau a tautolu “kia puke he agaaga.” Kia feaki e tautolu e fakamakutu he puhala he fakaako fakatagata he Tohi Tapu mo e liogi nakai noa ki a Iehova ko Ia ka foaki ki a tautolu e agaaga tapu ne malolō lahi. He puhala nei, maeke ia tautolu ke taute fakamakutu e gahua he fonua ha tautolu mo e ‘agaga tapu, katoa mo e maaliali.’—1 Tesa. 1:5.