Fakatumau e Fakamakutu Haau ke he Gahua he Fonua

KO E fakamatala he tala mitaki ko e gahua ne mua e aoga kua taute ke he lalolagi he vahā nei. Ti kua lilifu ke hukui a Iehova he gahua fakaako nei. Ka e, he falu mogo kua paleko ai ma e tau paionia mo e tau tagata fakailoa ke fakatumau e makutu ha lautolu ke he gahua he fonua. Ko e ha?

Falu tagata fakailoa ne nakai tutala lahi ka fakamatala mai he taha fale ke he taha fale ha kua tokologa e tau tagata ne nakai moua i kaina. Ti ka fai tagata i kaina, liga nakai fiafia a lautolu ke he fekau he Kautu mo e ita foki ki a tautolu. Falu tagata fakailoa ne lahi mo e fua mitaki e fonua ka e matakutaku neke nakai fakamatala a lautolu ke he tau tagata oti i ai. Ha ha i ai agaia e falu hane fakamatala ke he tau tau loga ti kua loto lolelole ha kua nakaila hoko mai e fakaotiaga.

To ha ha i ai e tau paleko ke he ha tautolu a gahua he fonua ka lauia e fakamakutu ha tautolu. Nonofo a tautolu he lalolagi ne pule a Satani ko e Tiapolo “kua mahani kelea,” ti amanaki a tautolu to uka ma tautolu ke fakamatala e tala mitaki.​—1 Ioane 5:19.

Pete ne tau paleko kua lauia a koe he gahua haau he fonua, maeke a koe ke mauokafua to lagomatai e Iehova a koe ke kautū mai ai. Ka ko e heigoa haau ka taute ke fakalaulahi e fakamakutu ke he gahua he fonua? Fakatutala la tautolu ke he falu puhala.

LAGOMATAI E TAU TAGATA FAKAILOA FOOU

He tau tau takitaha, totou afe kua papatiso ko e Tau Fakamoli a Iehova. Ka papatiso foou a koe, maeke ia koe ke lahi e mena ka fakaako mai ia lautolu ne kua leva e fakamatala. Ti ka eke a koe mo tagata fakailoa ke he tau tau loga, maeke nakai a koe ke lagomatai ke fakamahani a lautolu ne foou? Ko e mena fiafia lahi ka taute pihia.

Iloa e Iesu kua lata e tau tutaki haana ma e takitakiaga ke eke mo tau faiaoga lauia mitaki, ti fakakite e ia e puhala ki a lautolu ke fakamatala. (Luka 8:1) He vahā nei, lata a lautolu ne foou mo e fakamahaniaga pihia ke eke mo tau fekafekau lauia mitaki.

Nakai lata ia tautolu ke manamanatu ha kua fano e tagata fakailoa foou ke he fonua, kua iloa tuai a ia ke fakaako. Kua lata a ia mo e fakaakoaga fakatagata mai he faiaoga totonu mo e fakaalofa. Ko e tagata fakailoa lotomatala kua lata ke fakaako a ia ke (1) tauteute mo e fakamahani e mena ke talahau ke he tagata he kaina, (2) fakatutala mo e tau tagata, (3) foaki e tau tohi, (4) liu atu ke aahi a lautolu ne fiafia, mo e (5) kamata e fakaako Tohi Tapu. Maeke he tagata fakailoa foou ke eke mo fekafekau lauia mitaki ka mailoga mo e fifitaki e ia e puhala fakaako he tagata fakailoa lotomatala. (Luka 6:40) Ti logona he tagata fakailoa foou e mauokafua lahi he iloa to fai tagata kua mautali ke lagomatai a ia he magaaho tonu. Nava atu mo e foaki e tau puhala ka lagomatai foki e tagata fakailoa foou.​—Fakamatalaaga 4:9, 10.

TUTALA MO E HOA HAAU HE GAHUA KE HE FONUA

Pete ne tau laliaga haau ke tutala ke he tau tagata he kaina, he falu aho ko e tau fakatutalaaga mo e hoa haau he gahua fakamatala kua mua e mitaki. Manatu na fakafano e Iesu e tau tutaki haana ke fakamatala “takitokoua.” (Luka 10:1) He gahua tokoua, maeke ia laua ke fefakamafanaaki mo e fefakalagalagaaki. Moua e tautolu e tau magaaho mitaki ke “fefakamafanaaki” he gahua mo e tau matakainaga ha tautolu he fonua.​—Roma 1:12.

Ko e heigoa falu mena ka tutala a koe ki ai? Fai mena tutupu atihake foou nakai a mua tokoua? Kua fai manatu aoga nakai a koe kua iloa he haau a fakaako fakatagata po ke fakamagafaoa? Mafanatia kia a koe ke he taha mena ne logona e koe he feleveiaaga? Falu mogo liga gahua a koe mo e tagata fakailoa ne nakai iloa mitaki e koe. Liga maeke a koe ke hūhū ki a ia na hau fēfē a ia ke he kupu mooli. Ko e heigoa ati talitonu a ia ko e fakatokatokaaga ha Iehova anei? Ko e heigoa e tau kotofaaga po ke tau iloaaga haana? Liga maeke a koe ke talahau falu he tau mena tutupu haau. Ko e heigoa ni e tali ne moua he fonua, ka gahua fakamatala mo e taha, kua ha ha ia koe e magaaho mitaki ke tumau e “fefakamafanaki.”​—1 Tesalonia 5:11.

FAKAHOLO KI MUA E PUHALA FAKAAKO FAKATAGATA HAAU

Ke fakatumau e fakamakutu ha tautolu he fonua, lata a tautolu ke holo ki mua e tuaga he fakaako fakatagata ha tautolu. Ko e “fekafekau fakamoli mo e loto matala” kua lomi e tau vala tala ke he loga e tau matakupu kehekehe ka fakaako e tautolu. (Mataio 24:45) Fakatutala la tautolu ke he taha fakataiaga he matakupu mitaki ma e fakaako fakatagata: Ko e ha e gahua fakamatala kua aoga lahi? Ko e puha “Fakamakutu Tumau He Ha a Koe ke he Gahua he Fonua?” kua foaki e falu kakano.

He kumikumi e tau manatu i loto he puha ka fakalagalaga a koe ke matutaki e fakamatala fakamakutu. Mo matakupu kumikumi, lali ke fakamau falu kakano faka-Tohi Tapu ke fakamatala fakamakutu. Ti manamanatu fakahokulo ke he tau kakano nei. Ka taute e koe e mena nei, to malolō e fakamakutu haau ke he gahua he fonua.

EKETAHA KE FAKATAI TAHA PUHALA FOOU

Fakakite tumau he fakatokatokaaga ha Iehova e tau puhala ke lagomatai a tautolu ke holo ki mua ke he gahua he fonua. Ma e fakatai, lafi ke he gahua he taha fale ke he taha fale ha tautolu, maeke a tautolu ke fakatai foki e tohitohi, fakamatala he telefoni, fakamatala he puhalatū po ke falu toloaga tagata, mo e fakamatala he tau magaaho noa ke he tau tagata po ke he gahuaaga ha lautolu. Liga maeke foki a tautolu ke taute e tau fakatokaaga ke fakamatala he tau matakavi ne gahoa po ke ai fai Fakamoli.

Makai nakai a koe ke fakatai taha puhala foou? Tokologa kua kautū he taute e tau puhala nei. Manamanatu ke he tolu e fifitakiaga.

Ko e matakainaga fifine ne higoa ko April ne fifili ke fakaaoga e taha manatu mai he taha vala tala he Kingdom Ministry ke he puhala ke kamata e tau fakaako Tohi Tapu. Foaki a ia ke fakaako mo e tokotolu e tagata ne gahua mo ia. Ofo mo e fiafia a April he talia e lautolu ke fakaako ti kamata foki ke fakalataha ke he tau feleveiaaga fakapotopotoaga.

Kua fakamafana foki ki a tautolu ke kumi e tau tagata kua liga fiafia ke he tau vala tala pauaki he tau mekasini ha tautolu. Ko e leveki takaiaga i Amerika ne fifili ke foaki e vala tala Awake! hagaao ke he tau hui momi ke he tau takitaki he tau fale koloa ne sela hui momi he falu matakavi. Foaki foki e ia mo e hoana haana e fufuta “Maama e Toketa Hau” ke he molea 100 e tau ofisa toketā. Pehē a ia ko e tau aahi nei kua lagomatai e tau tagata ke mahani ke he gahua fakamatala mo e tau tohi ha tautolu. He iloa mitaki e tau tagata he fonua, kua maeke he leveki takaiaga mo e hoana haana ke liu aahi atu ke he tokologa.

Ko e matakainaga fifine ne higoa ko Judy ne tohi ke he matapatu he lalolagi ha kua loto fakaaue a ia ke he fakamafanaaga ke fakamatala he puhala telefoni. Pehē a ia ko e matua fifine haana ne 86 e tau he moui kua loga lahi e lekua malolō tino, ka e fakamatala tumau he telefoni ke he tau tagata. Ko e fua, kamata a ia ke taute e fakaako Tohi Tapu mo e fifine ne 92 e tau he moui!

Ko e tau puhala ne talahau he tau tohi ha tautolu kua aoga mooli. Taute pihia! Maeke ai ke lagomatai a koe ke fakatumau e olioli mo e fakamakutu haau ke he gahua he fonua.

FAKATOKA E TAU FOLIAGA KUA LATA

Ko e heigoa ne taute a tautolu ke kautū he gahua fakamatala ha tautolu? Nakai ko e loga he tau tohi ha tautolu ka foaki, loga he fakaako Tohi Tapu ha tautolu ne taute, po ke tokologa he tau tagata ne lagomatai e tautolu ke eke mo Tau Fakamoli a Iehova. Manamanatu ki a Noa. Tokofiha e tagata ne nakai mai he magafaoa ha Noa ne lagomatai e ia ke eke mo tau tagata tapuaki ha Iehova? Ne kua eke mooli a ia mo tagata fakamatala ne kautū. Ko e mena ne aoga kua fekafekau fakamooli a tautolu ki a Iehova.​—1 Korinito 4:2.

Tokologa e tagata fakailoa ne mailoga ke logona e fiafia mooli ke he gahua fakamatala, lata ia lautolu ke fakatoka e tau foliaga kua lata. Ko e heigoa e falu foliaga nei? Falu manatu ne haia he puha “Fakatoka e Tau Foliaga kua Lata.”

Ole ki a Iehova ke lagomatai a koe ke taute e fekafekauaga haau ke palepale mitaki mo e fai kakano. Ka hokotia a koe ke he tau foliaga haau, to logona mooli e koe e fiafia he iloa hane taute e koe e tau mena oti ke fakamatala e tala mitaki.

Mooli kua paleko ke fakamatala e tala mitaki. Ka e ha ha i ai e tau mena ka taute e koe ke fakamakutu ke he gahua haau he fonua. Fakatutala atihake mo e hoa fakamatala haau, taute tumau mo e fai kakano e fakaako fakatagata haau, fakaaoga e tau manatu he fekafekau fakamoli mo e loto matala, ti fakatoka e tau foliaga kua lata. Mua atu, kua foaki atu e Iehova ko e Atua ki a koe e lilifu ke fakamatala e tala mitaki ko e taha he Tau Fakamoli Haana. (Isaia 43:10) Ē, to logona mooli e koe e olioli lahi mahaki he matutaki a koe ke fakatumau e fakamakutu haau ke he gahua he fonua!