Kia Eke mo Fekafekau Holo ki Mua
1 Kua fiafia ha tautolu a Matua he lagi ka tupu ki mua fakaagaaga e tau fekafekau haana. Putoia he mena ia e holo ki mua ko e fekafekau loto motua mo e lauia mitaki he tala mitaki. Ne fakamalolō e Paulo e leveki ko Timoteo ke hagaaki mau a ia kia kitia ai e mafiti haana. (1 Timo. 4:13-15) Kua lata ia tautolu oti ke lali ke holo ki mua e tuaga he fekafekauaga ha tautolu, pete kaeke ko e tau tagata fakailoa iloa mitaki a tautolu.
2 Fakatoka e Tau Foliaga Fakatagata: Kua lata e holo ki mua mo e fakatoka e tau foliaga fakatagata. Ko e heigoa falu foliaga kua liga fakatoka e tautolu ma tautolu? Kua liga lali a tautolu ke iloa lahi e puhala ke fakaaoga ha tautolu a pelu fakaagaaga, ko e Tohi Tapu. (Efeso 6:17) Liga ha ha i ai e gahua fakamatala nukua lata ia tautolu ke holo ki mua, tuga e fakamatala he puhalatū, fakamatala he telefoni, po ke gahua he matakavi pisinisi. Liga maeke ia tautolu ke gahua ke lauia mitaki e tau liu aahi atu. Ko e taha foliaga mitaki lahi mahaki kua liga ke fakaholo ki mua e lotomatala ha tautolu ke kamata mo e taute e tau fakaakoaga Tohi Tapu.
3 Tau Foakiaga: Ko e tau feleveiaaga he fakapotopotoaga, mua atu ke he Aoga Fekafekau Fakateokarasi mo e Feleveiaaga Fekafekau, nukua talaga ke lagomatai a tautolu ke tupu ki mua ko e tau fekafekau. Ko e laliaga lahi kua fakaaoga e tautolu ke tauteute tuai mo e fakalataha ke he tau feleveiaaga nei mo e fakagahua e tau lagomataiaga ne foaki mai, to lahi ue atu e tau mena ka moua mooli e tautolu.—2 Kori. 9:6.
4 Kua lata foki ia tautolu ke felagomataiaki ke holo ki mua. (Fakatai 27:17) Ko e fanogonogo fakamitaki ke he fakataitaiaga ha lautolu ne gahua mo tautolu he fekafekauaga ka lagomatai a tautolu ke holo ki mua. Lafi ki ai, ko e leveki he fakaako tohi ha tautolu kua liga fakatoka ma tautolu ke moua e lagomataiaga fakatagata. Ko e fakamonuinaaga mooli ke moua e paionia po ke tagata fakailoa iloa mitaki ke lagomatai a tautolu ke lauia mitaki lahi mo e helehele mai e olioli ne mua atu he fekafekauaga! Ha ha i ai nakai e tagata fakailoa foou he fakaakoaga tohi ha tautolu? Liga maeke ia tautolu ke fakailoilo ke uiina a ia ke gahua mo tautolu.
5 Ko e gahua aoga lahi ne taute he vahā nei ko e fekafekauaga faka-Kerisiano. He foaki e tautolu ki a Iehova ha tautolu a “poa fakaheke,” kua manako a tautolu ke foaki katoatoa atu ki a ia. (Hepe. 13:15) Ka lali a tautolu ke holo ki mua he fekafekauaga, to eke a tautolu mo tau tagata ekegahua “nakai fai mena ke mā ai, kua fakatokatoka fakahako e kupu moli.”—2 Timo. 2:15.