Fakatoka e Tau Foliaga Fakaagaga
1 Ko e lilifu ha ia ke fakaheke a Iehova ke he tukumalagi! Ke lagomatai a tautolu ke moua e foliaga ia, maeke ia tautolu ke fakatoka atu foki e tau foliaga fakaagaga fou mo e lali ke hokotia ki ai. Kua fakamalolo he mena nei a tautolu ke fakaaoga fakapulotu e tau malolo ha tautolu. (1 Kori. 9:26) Ko e heigoa e tau foliaga kua maeke ke hokotia ki ai ma hau?
2 Fakaako Tohi Tapu: Tauteute nakai a koe ke lata mo e tau feleveiaaga takitaha he fakapotopotoaga? Ka pihia, fakaata nakai e koe e magaaho ke kumikumi mo e manamanatu fakahokulo ka fakaako a koe? Ma e fakatai, ka tauteute ma e Fakaakoaga Kolo Toko mo e Fakaakoaga Tohi he Fakapotopotoaga he fahitapu, kua vate noa ni kia e koe e tau tali po ke veu nakai e koe e tau kupu tohi ne tu ai mo e manamanatu foki ke he tau kakano ma e fakamaamaaga ne foaki? Maeke nakai ke foli atu a koe ke kumikumi ke he tau manatu gahoa he tau fahitapu takitaha mai he totouaga Tohi Tapu ne fakatoka ma e Aoga Fekafekau Fakateokarasi? Ko e keli hifo fakaagaga pihia kua lata ma e magaaho mo e malolo, ka e loga e fua ka moua mai ai.—Fakatai 2:4, 5.
3 Tau Feleveiaaga he Fakapotopotoaga: Ko e taha foliaga foki ko e fakalataha tumau atu ke he tau feleveiaaga he fakapotopotoaga. Ko e hohoko mai tuai ke femataaki mo e tau matakainaga talitonu mo e ke fakalataha ke he lologo hafagi mo e liogi kua lagomatai ke ati hake e mafanatia he fakapotopotoaga. Liga ke lali foki a tautolu ke tali he tau feleveiaaga takitaha mo e gahua ke fakatolomaki ki mua e tau tali ha tautolu. Liga maeke ia koe ke fakakite e puhala ne aoga e kupu tohi he paratafa ke he fakatutalaaga po ke talahau e puhala kua aoga e vala tala ke he tau momoui ha tautolu he tau aho takitaha.—Hepe. 10:24, 25.
4 Gahua he Fonua: Tolomaki lahi ki mua e fekafekauaga ha tautolu ka fakatoka e tautolu e tau foliaga. Fai foliaga fakatagata nakai a koe ke he tau matahola nukua fakatoka e koe ke gahua ki ai he fonua he tau mahina takitaha? Lagomatai lahi e mena ia ke he falu. Po ke maeke nakai ia koe ke fakatolomaki ki mua he falu vala he fekafekauaga hau, tuga e fakaaoga e Tohi Tapu he gahua he taha fale ke he taha fale, he taute e tau liu ahi atu kua fai kakano, he lali ke kamata e fakaakoaga Tohi Tapu, po ke fakaako kua lauia mitaki ke he tau fakaakoaga?
5 Tau matua, kua fakamalolo nakai e mutolu e tau fanau ha mutolu ke fakatoka e tau foliaga he fekafekauaga ha Iehova? Lagomatai a lautolu ke kitia ko e eke mo fekafekau paionia, ko e misionare, po ke matakainaga he magafaoa he Peteli ko e puhala mitaki lahi ke fakakite e hokulo he ha lautolu a fakaaueaga ki a Iehova.—Fakama. 12:1.
6 He fokifoki e tautolu e tau gahua ha tautolu, kia fakatoka e tau foliaga fakaagaga, ti gahua ke hokotia atu ki ai, to moua e tautolu e olioli lahi mahaki he fekafekauaga ha tautolu mo e kia eke mo punaaga he fakamaloloaga ke he falu.—Roma 1:12.