Puhala ke Hokotia ke he Tau Foliaga Fakaagaaga Haau
1. Ko e heigoa e tau foliaga fakaagaaga he tokologa he tau fuata Kerisiano?
1 Ko e Kerisiano fuata, kua nakai fakauaua ko e tau foliaga haau he moui kua fakaohooho he fakaalofa haau ma Iehova mo e tau kupu a Iesu ke he tau Kerisiano oti ke ‘kumikumi fakamua ke he kautu.’ (Mata. 6:33) Liga ko e foliaga haau ke fakalaulahi e fekafekauaga he gahua ko e paionia po ke gahua he matakavi ne lahi e manako ke he tau tagata fakamatala he Kautu. Falu kua manatu ke foaki noa ke gahua ta fale he lalolagi katoa, ke fekafekau he la, po ke gahua misionare. Ko e tau foliaga makona mooli mo e ke nava ki ai anei!
2. Ko e heigoa ka lagomatai a koe ke hokotia ke he tau foliaga fakaagaaga haau?
2 Ko e lagomataiaga ke hokotia ke he tau foliaga fakaagaaga haau ke tohi hifo. Ko e Watchtower, ia Iulai 15, 2004, ne pehē: “Kua mahino mo e maali e manatu kaeke fifili e [koe] e tau kupu ke fakamaama aki. Liga manako mogoia a [koe] ke tohi hifo e tau foliaga [haau] mo e puhala ke moua aki.” Lafi ki ai, maeke e tau foliaga ke uaaki ke lagomatai ke kitia aki e holo ki mua haau mo e fakatumau e onoono atu haau he tutuli e foliaga he vahā i mua.
3. Talahau falu foliaga kūkū ka maeke ke lagomatai taha ke lata ke papatiso.
3 Tau Foliaga Kūkū: Kaeke nakaila papatiso ia a koe, manamanatu ke he mena kua lata ia koe ke taute ke hokotia ke he foliaga ia. Liga lata a koe ke maama mitaki e tau matapatu fakaakoaga he Tohi Tapu. Ka pihia, fakatoka mo foliaga haau ke fakaako fakamatafeiga e tohi Fakaako he Tohi Tapu, totou e tau kupu tohi oti ne fakakite mai ai. (1 Timo. 4:15) Fakatoka foki e foliaga ke totou e Tohi Tapu katoa mai ia Kenese ki a Fakakiteaga, tuga kua lata ke taute he tau tagata he Peteli mo e tau tagata fakaako i Kiliata. Ka mole ia, ti fakatumau e fakaholoaga ke totou tumau e Tohi Tapu he tau aho oti. (Sala. 1:2, 3) Manamanatu la ke he puhala ia ka lagomatai a koe ke tupu fakaagaaga! Hafagi mo e fakaoti aki e liogi mai he loto e tau magaaho oti ka totou mo e kumikumi ke he Tohi Tapu, ti eketaha ke fakagahua e tau mena ne ako e koe.—Iako. 1:25.
4. Ko e heigoa e tau foliaga kūkū ka liga fakatoka he Kerisiano ne foli ke he vahā loa i mua ke fekafekau he Peteli po ke misionare?
4 Ka fitā a koe he papatiso, ko e heigoa falu foliaga ne liga maeke ia koe ke tutuli? Lata nakai a koe ke fakatolomaki ki mua e tau puhala fakamatala haau? Ma e fakatai, ko e foliaga nakai haau ke iloa lahi ke fakaaoga e Tohi Tapu he fekafekauaga he fonua? (2 Timo. 2:15) Liga fakalaulahi fēfē e koe e fekafekauaga haau he fonua? Kia fakatoka pauaki e tau foliaga kūkū ne felauaki mo e tau tau he moui mo e tuaga haau ne maeke ke lagomatai a koe ke hokotia ke he tau foliaga haau he vahā loa i mua.
5. Lagomatai fēfē e taha matakainaga taane he fakatoka e tau foliaga kūkū ke maeke ke hokotia ke he foliaga haana ke fekafekau he Peteli?
5 Ko e Tala ne Fakahiku Mitaki: Magaaho ne ahiahi atu a Tony ne 19 e tau he moui ke he la ofisa he tau Fakamoli a Iehova, ne tupu e manako haana ke gahua he Peteli. Ka e, kua keukeu e puhala moui haana, ti nakaila tukulele foki a ia ke he Atua. Ne fifili a Tony ke fakalautatai e moui haana ke he tau puhala ha Iehova mo e taute mo foliaga haana ke lata ke papatiso. He moua e foliaga ia, ne fakatoka e ia ke paionia fakakū ti holo atu mogoia ke paionia mau, he tohi he kalena haana e tau aho ne manako a ia ke kamata. Manamanatu la ke he olioli haana he fai magaaho ne paionia ai ti kua uiina ke fekafekau he Peteli!
6. Ko e heigoa ka lagomatai a koe ke hokotia ke he tau foliaga fakaagaaga haau?
6 Maeke foki ia koe ke hokotia ke he tau foliaga fakaagaaga haau he kumi fakamua e tau mena he Kautu. Kia tuku atu “hāu a tau gahua” ki mua a Iehova ke he liogi ti eketaha ke hokotia ki ai.—Fakatai 16:3; 21:5.