Tau Fuata Ikiiki—Ko e Heigoa ha Mutolu Ka Taute Aki e Tau Momoui ha Mutolu?
“Kua tau pihia au, nakai tuga e taumoto ke he matagi.”—1 KORI. 9:26.
1, 2. Ke kautū a koe he tupu hake a koe mo tagata lahi, ko e heigoa kua lata ke moua e koe?
KAEKE kua amanaki a koe ke fano fenoga he hala nakai mahani, liga manako a koe ke uta e mepe mo e kamapasi. To lagomatai he mepe a koe ke kitia e matakavi ne ha ha ai a koe mo e lagomatai a koe ke fakamaimailoga e hala haau. To takitaki he kamapasi a koe he hala hako. Ka e nakai aoga lahi e mepe mo e kamapasi kaeke ke nakai iloa e koe e matakavi haau ne fano ki ai. Ke kalo mai he fano nakai fai fakatauaga, lata ia koe ke iloa mitaki e matakavi.
2 Fehagai a koe mo e tuaga pihia he lahi hake a koe. Kua ha ha ia koe e mepe mo e kamapasi hakotika. Ko e Tohi Tapu e mepe ka lagomatai a koe ke iloa ke fifili e puhala hako. (Fakatai 3:5, 6) Ka fakamahani fakamitaki, maeke e loto manamanatu haau ke lagomatai lahi he fakatumau a koe ke he puhala hako. (Roma 2:15) Kua maeke ke eke ai mo kamapasi. Ke kautū e moui haau mogoia, kua lata foki ia koe ke iloa mitaki e mena ne gutu atu a koe ki ai. Lata ia koe ke fakatoka e tau foliaga mauokafua.
3. Ko e heigoa e tau aoga he fai foliaga ne hagaao a Paulo ki ai he 1 Korinito 9:26?
3 Ne fakamaama he aposetolo ko Paulo e tau aoga he fakatoka e tau foliaga mo e eketaha ke hokotia ki ai he tohia e ia: “Kua poi pihia au, nakai fakahaupo; kua tau pihia au, nakai tuga e taumoto ke he matagi.” (1 Kori. 9:26) Ka fai foliaga a koe, maeke ia koe ke poi mo e mauokafua. Nakai leva, to taute e koe falu fifiliaga uho lahi hagaao ke he tapuakiaga, gahua, fai tokoua, mo e magafaoa, ko e falu mena ni a ia. Falu magaaho, tuga kua logona hifo a koe mena fehagai a koe mo e tau puhala loga ne fakauaua. Ka fakamaimailoga tuai e koe e puhala haau he fakavē e tau fifiliaga haau ke he kupu mooli mo e tau matapatu fakaakoaga he Kupu he Atua, to nakai kamatamata a koe ke gutu atu he puhala hepe.—2 Timo. 4:4, 5.
4, 5. (a) Ko e heigoa ka tupu ka nakai fakatoka e koe ma haau e tau foliaga? (e) Ko e ha kua lata e tau fifiliaga haau ke takitaki he manako ke fakafiafia e Atua?
4 Ka nakai fakatoka e koe e tau foliaga ma haau, liga to fakaohooho he tau kapitiga mo e tau faiaoga a koe ke taute e mena ne logona hifo e lautolu kua hako ma haau. Mooli, pete he fai foliaga pauaki a koe, fai tagata agaia ka foaki e tau manatu ha lautolu. Ka fanogonogo ke he tau manatu ha lautolu, hūhū hifo ki a koe, ‘To lagomatai nakai he tau foliaga ne talahau e lautolu au ke manatu e Tufuga haaku he vahā tama haaku po ke to fakatauhele ai au mai he taute pihia?’—Totou Fakamatalaaga 12:1.
5 Kua lata he ha e tau fifiliaga he moui haau ke takitaki he manako ke fakafiafia e Atua? Taha kakano ha kua mai e Iehova ki a tautolu e tau mena mitaki oti ne ha ha ia tautolu. (Iako. 1:17) Mooli, kua lata e tau tagata oti ke tuku atu e tau fakaaue ki a Iehova. (Fakakite. 4:11) To fai puhala mitaki foki nakai ma haau ke fakakite e loto fakaaue haau ka e ke tokaloto a Iehova ka fakatoka e tau foliaga haau? Kia manamanatu la tautolu ke he tau foliaga kua aoga lahi ke moua mo e mena kua latatonu ia koe ke taute ke hokotia ki ai.
Ko e Heigoa e Tau Foliaga Ka Fakatoka e Koe?
6. Ko e heigoa e foliaga mua ue atu ka fakatoka e koe, ti ko e ha?
6 He talahau he vala tala fakamua, ko e foliaga aoga lahi ka fakatoka e koe ke fakamooli ki a koe kua moolioli e mena ne talahau he Tohi Tapu. (Roma 12:2; 2 Kori. 13:5) Liga talitonu e tau kapitiga haau ke he evolusene po ke tau fakaakoaga kehekehe he lotu fakavai ha kua tala age he falu ki a lautolu ko e mena anei kua lata ia lautolu ke talitonu. Pete ia, maeke ia koe ni ke manamanatu fakahokulo ke he tau mena ne talitonu a koe ki ai. Tokaloto na manako a Iehova ke fekafekau a koe ki a ia mo e manatu katoa. (Totou Mataio 22:36, 37.) Manako ha tautolu a Matua he lagi ki a koe ke atihake e tua ke he tau mena mooli.—Hepe. 11:1.
7, 8. (a) He fakatoka e tau foliaga kūkū fe ka lagomatai a koe ke fakamalolō e tua haau? (e) Ko e heigoa ka moua e koe ka hokotia a koe ke he falu foliaga kūkū haau?
7 He lagomatai ke fakamalolō e tua haau, ko e ha he fakatoka e tau foliaga kūkū? Taha foliaga ke liogi he tau aho takitaha. He lagomatai ke fakatumau e tau liogi haau ke totoka mo e felauaki tonu, maeke ia koe ke tokaloto po ke tohi hifo e tau mena pauaki ne tutupu he aho nukua manako a koe ke putoia he tau liogi haau. Kia talahau e tau paleko ne fehagai mo koe ti pihia foki mo e tau mena ne fiafia a koe ki ai. (Filipi 4:6) Taha foliaga foki ke totou e Tohi Tapu he tau aho takitaha. Iloa nakai e koe ka totou e koe fā e lau he aho, to oti e Tohi Tapu katoa he totou e koe he taha ni e tau?a ‘Uhoaki e tagata ne fiafia ke he fakatufono a Iehova,’ he talahau he Salamo 1:1, 2, mo e ‘totou a ia ke he tau fakatufono hana ke he aho katoa mo e po.’
8 Ko e foliaga kū ke toluaki ka fakatoka e koe ko e tauteute e tali ma e tau feleveiaaga takitaha he fakapotopotoaga. Ke kamata aki, to manako a koe ke totou e tali po ke kupu tohi. Nakai leva, maeke ia koe ke foli ke tali ni he tau kupu haau. Mooli, ko e tau magaaho takitaha kua tali a koe, kua foaki e koe e mena fakaalofa ki a Iehova. (Hepe. 13:15) Ka hokotia a koe ke he falu foliaga nai, to tupu e mauokafua haau, ti pihia foki e loto fakaaue haau ma Iehova, mo e to mautali a koe ke fakatoka e tau foliaga ma e vahā loa i mua.
9. Ka nakaila eke a koe mo tagata fakailoa he Kautu, ko e heigoa e tau foliaga ma e vahā loa i mua ka fakatoka e koe ma haau?
9 Ko e heigoa e tau foliaga ma e vahā loa i mua ka fakatoka e koe ma haau? Ka nakaila kamata a koe ke fakailoa e tala mitaki ke he tau tagata, liga ko e foliaga haau ma e vahā loa i mua ke eke mo tagata fakailoa he Kautu. Ka hokotia a koe ke he foliaga lilifu nei, to manako a koe ke taute tumau mo e lauia mitaki he nakai tonoa e mahina he gahua he fonua. To manako foki a koe ke fakaako ke fakaaoga e Tohi Tapu he gahua he fonua. He taute pihia e koe, to liga moua e koe kua fiafia lahi a koe ke he gahua fakamatala. Maeke ia koe mogoia ke fakalahi e magaaho haau he gahua he taha fale ke he taha fale po ke lali foki ke taute e fakaako Tohi Tapu. Ko e tagata fakailoa nakaila papatiso, ko e heigoa foki e foliaga mitaki ma haau ka kia hokotia ke he papatisoaga ti eke mo Fakamoli tukulele mo e papatiso a Iehova ko e Atua?
10, 11. Ko e heigoa e tau foliaga ma e vahā loa i mua ka fakatoka he tau fuata papatiso ma lautolu?
10 Kaeke ko e fekafekau papatiso a Iehova a koe, hanei falu foliaga ma e vahā loa i mua ka foli atu a koe ki ai. Liga manako a koe he falu magaaho ke lagomatai e tau fakapotopotoaga ke fakamatala he fonua ne nakai fa gahua tumau. Liga manako foki a koe ke fifili ke fakaaoga e hakahakau mo e tino malolō haau ke gahua paionia fakakū po ke paionia tumau. Totou hogofulu afe e paionia fiafia ka tala atu ki a koe ko e puhala palepale mitaki e gahua mau ke manatu e Tufuga he vahā fuata haau. Ko e tau foliaga anei ka moua e koe he nofo agaia i kaina. Ko e fakapotopotoaga he matakavi haau ka aoga foki mai he haau a tau foliaga ia.
11 Falu foliaga ma e vahā loa i mua ka fakaatā a koe ke lahi e aoga he falu fakapotopotoaga. Ma e fakatai, maeke ia koe ke fakatoka ke fekafekau he taha matakavi po ke motu ne lahi atu e manako lagomatai. Liga manako a koe ke lagomatai e talagaaga he tau Fale he Kautu po ke tau la ofisa he tau motu kehe. Maeke foki ia koe ke fekafekau he Peteli po ke eke mo misionare. Mooli, ko e lakaaga fakamua ka lata a koe ke hokotia ki ai ato maeke a koe ke fakaholo atu ke he laulahi he tau foliaga ma e vahā loa i mua ne talahau he mena nei ko e papatiso. Ka nakaila papatiso a koe, manamanatu ke he mena ka putoia he hokotia ke he lakaaga nei he moui haau.
Hokotia ke he Foliaga he Papatisoaga
12. Ko e heigoa e tau kakano ne papatiso e falu, ti ko e ha kua nakai lahi e mena nei?
12 To fakamaama fēfē e koe e kakano he papatisoaga? Liga manatu e falu ko e puipuiaga anei ma lautolu neke mokulu ke he agahala. Liga logona hifo he falu kua lata a lautolu ke papatiso ha kua papatiso tuai e tau kapitiga ha lautolu. Falu fuata ikiiki kua liga manako ke fakafiafia e tau matua ha lautolu. Pete ia, nakai ko e konotuleke e papatisoaga ne taofi a koe mai he taute e tau mena ne manako a koe ke taute fufū; po ke papatiso ha kua fakaohooho he falu. Kua lata ia koe ke papatiso ka maama katoatoa e koe e mena ne putoia ko e taha he Tau Fakamoli a Iehova ti ka iloa mooli e koe kua mautali mo e fiafia a koe ke taute e matagahua nei.—Fakama. 5:4, 5.
13. Ko e ha kua lata ia koe ke papatiso?
13 Taha kakano ke papatiso ko e poakiaga a Iesu ke he tau tutaki haana ke “eke e tau motu oti kana mo tutaki, ti papatiso atu a lautolu.” Ne fakatoka foki e ia e fifitakiaga ke papatiso. (Totou Mataio 28:19, 20; Mareko 1:9.) Lafi ki ai, ko e papatisoaga ko e lakaaga aoga lahi ma lautolu kua manako ke moui. He mole e talahau he tā e Noa e vaka ne hao a ia mo e magafaoa haana he Fakapukeaga, ne pehē e aposetolo ko Peteru: “Ko e fakatai foki he mena ia ko e papatisoaga, kua fakamoui ai ainei a tautolu, . . . ke he liu tu mai a Iesu Keriso.” (1 Pete. 3:20, 21) Ka e nakai kakano e mena nei ko e papatisoaga kua tuga e fakatokaaga inisua ka moua e koe he magaaho ka hoko e matematekelea. Ka e papatiso a koe ha kua fakaalofa a koe ki a Iehova ti manako ke fekafekau ki a ia mo e haau a loto, tino, manatu, mo e malolō katoa.—Mare. 12:29, 30.
14. Liga ko e ha ne fakauaua e falu he papatiso, ka ko e heigoa e fakamafanaaga kua moua e koe?
14 Falu ne liga fakauaua ke papatiso ha ko e matakutaku neke tuku ki tua he mogo fakamui. Pihia kia e matakutaku haau? Ka pihia, nakai ko e mena kelea e matakutaku ia. Liga kakano ai kua maama mitaki e koe e matagahua uho lahi ia he eke mo taha he Tau Fakamoli a Iehova. Liga fai kakano foki nakai? Liga kua nakaila talitonu ia a koe ko e muitua ke he tau tuaga he Atua ko e puhala mitaki lahi mahaki he moui. Ko e mena ia, manamanatu ke he tau fua ne moua e lautolu kua fakaheu e tau tuaga he Tohi Tapu ka lagomatai a koe ke taute e fifiliaga haau. He taha faahi, liga kua manako a koe ke he tau tuaga he Atua ka e fakauaua a koe ki a koe ke fakamooli e mena ia. Eke e mena ia mo fakamailoga mitaki, ha kua fakakite ai e loto holoilalo haau. Mole ia, pehē e Tohi Tapu ko e tau loto he tau tagata nakai mitaki katoatoa oti kua fakavai. (Iere. 17:9) Ka e maeke ia koe ke kautū ka fakatumau a koe ke ‘leoleo ki ai ke lata mo e tau kupu he Atua.’ (Totou Salamo 119:9.) Ko e tau kakano he tau fakauaua haau ke papatiso, kua lata ia koe ke kautū mai he tau manatu mo e tau kapaletū pihia.b
15, 16. Iloa fēfē e koe kua mautali a koe ke papatiso?
15 Maeke fēfē mogoia ia koe ke iloa kua mautali a koe ke papatiso? Taha puhala ko e hūhū hifo ki a koe e tau hūhū tuga anei: ‘Maeke nakai au ke fakamaama e tau matapatu fakaakoaga he Tohi Tapu ke he falu? Fai vala nakai au he fekafekauaga pete ka nakai fai e tau matua haaku? Eketaha nakai au ke fina atu ke he tau feleveiaaga Kerisiano oti? Maeke nakai au ke manatu e tau magaaho pauaki he totoko e au e peehiaga he tau kapitiga? To matutaki nakai au ke fekafekau ki a Iehova pete ne nakai liu e tau matua mo e tau kapitiga haaku ke fekafekau? Kua liogi nakai au hagaao ke he fakafetuiaga haaku mo e Atua? Ti kua taute mooli nakai e au e tukuleleaga mauokafua ki a Iehova he liogi?’
16 Ko e papatisoaga ko e lakaaga ne hikihiki e moui ti kua nakai lata ke uta fakamāmā. Kua motua mooli nakai a koe ke manamanatu fakahokulo ke he lakaaga nai? Ko e kakano he motua kua nakai ni ko e maeke ke taute e tau lauga mitaki mai i mua po ke tau tali pulotu he feleveiaaga. Lata ai ke taute e tau fifiliaga ne fakavē ke he maamaaga he tau matapatu fakaakoaga he Tohi Tapu. (Totou Heperu 5:14.) Kaeke ko koe he tuaga he moui kua maeke ke taute e mena ia, ti ko e mena ne fakatoka i mua haau ko e lilifu ue atu—ko e fekafekau loto katoatoa ki a Iehova mo e moui he puhala kua fakakite na tukulele mooli a koe ki a ia.
17. Ko e heigoa ka lagomatai a koe ke fahia ke he tau kamatamata ka mole e papatiso haau?
17 He mole agataha e papatiso, liga hufia a koe he hakahakau lahi ma e fekafekau ke he Atua. Nakai leva mogoia, liga fehagai a koe mo e tau kamatamata he tua mo e mauokafua haau. (2 Timo. 3:12) Ua manatu hifo kua fehagai tokotaha a koe mo e tau kamatamata nei. Kumi e tomatomaaga he tau matua haau. Ono atu ki a lautolu ne motua fakaagaaga he fakapotopotoaga ma e lagomatai. Fakatumau e kapitiga mo lautolu ka lagomatai a koe. Ua nimo na leveki e Iehova a koe, mo e to atu e ia ki a koe e malolō kua lata ke fehagai mo e tau tuaga ka tupu.—1 Pete. 5:6, 7.
Maeke Fēfē a Koe ke Hokotia ke he Tau Foliaga Haau?
18, 19. Maeke fēfē a koe ke aoga mai he kumikumi e tau mena haau ne mua e aoga?
18 Pete e tau logonaaga mitaki lahi mahaki haau, liga kia kua nakai fai magaaho lahi a koe ke taute e tau mena ne loto mo e manako a koe ki ai? Ka pihia, kua lata ia koe ke kumikumi e tau mena haau kua mua e aoga. Ke fakatai: Uta e pakete palasetiki ti fafao ai falu patuō lalahi i loto. Ti fakapuke e pakete aki e oneone. Ha ha ia koe e pakete ne puke he tau patuō mo e oneone. Liligi e pakete ka e toka e oneone mo e tau patuō ia. Mogonai, fakapuke fakamua e pakete aki e oneone, ti lali ke fakahaohao e tau patuō i loto he pakete. Fai matapoko nakai ma e tau patuō? Ai fai, ha kua tuku mua e koe e oneone he pakete.
19 Fehagai a koe mo e paleko taha ia ka fatifati e tau magaaho haau. Ka tuku fakamua e koe e tau mena tuga e fakafiafiaaga, to liga nakai lahi e magaaho he moui haau ma e tau mena lalahi—ko e tau mena fakaagaaga. Ka eke ke muitua e koe e tomatomaaga he Tohi Tapu ke “mailoga ai e mutolu e tau mena kehekehe [po ke, kua mua e aoga],” to moua e koe e magaaho ma e tau mena he Kautu mo e fai fakafiafiaaga.—Filipi 1:10.
20. Ka logona e koe e fakaatukehe mo e tau fakauaua he eketaha a koe ke hokotia ke he tau foliaga haau, ko e heigoa kua lata ke taute e koe?
20 He eketaha a koe ke hokotia ke he tau foliaga haau, ne putoia e papatisoaga, kua maeke ia koe he falu magaaho ke logona e fakaatukehe mo e fakauaua. Ka pihia a koe, “kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe.” (Sala. 55:22) Mogonei, ha ha ia koe e magaaho ke fai vala he gahua fiafia mo e uho lahi he fakamauaga tala he tagata, ko e fakamatala mo e gahua fakaako he lalolagi katoa. (Gahua 1:8) Maeke ia koe ke fifili ke eke mo tagata kitekite mo e onoono ke he falu kua taute e gahua nei. Po ke fai vala a koe he taute e gahua ia. Ua tolomuli ke foaki e tau taleni haau ke fakalaulahi e tau gahua he Kautu. To nakai tokihala a koe he fekafekau ke he ‘hāu a vahā fuata ki a Ia ne eke a koe.’—Fakama. 12:1.
[Tau Matahui Tala]
b He lagomatai ke lata mo e mena nei, kikite e tohi Questions Young People Ask—Answers That Work, Volume 2, veveheaga 34.
To Tali Fēfē e Koe?
• Ko e ha kua lata ia koe ke fakatoka e tau foliaga?
• Ko e heigoa falu foliaga kua aoga lahi ke moua?
• Ko e heigoa kua putoia he hokotia ke he foliaga he papatisoaga?
• Maeke fēfē he kumikumi ke he tau mena kua mua e aoga ke lagomatai a koe ke hokotia ke he tau foliaga haau?
[Fakatino he lau 13]
Fai foliaga nakai a koe ke totou e Tohi Tapu he tau aho oti?
[Fakatino he lau 15]
Ko e heigoa ka lagomatai a koe ke hokotia ke he foliaga he papatiso?
[Fakatino he lau 16]
Ko e heigoa e fakaakoaga kua fakaako e koe mai he fakataiaga nei?