12 Tau Foliaga

KO E KAKANO

Ko e foliaga ne nakai ko e miti noa​—ko e mena ne fia loto a koe ke moua. Ko e tau foliaga mooli kua putoia e fakatokatoka, hikihiki, mo e gahua malolō.

Ko e tau foliaga kua maeke ke kū (fai aho po ke fai faahi tapu ke taute), ai leva lahi (fai mahina), mo e leva (taha e tau po ke molea). Ko e tau foliaga ne leva to hokotia ki ai to moua he fakatokatoka e tau foliaga kūkū.

KAKANO NE AOGA

Ke hokotia ke he tau foliaga ka fakamalolō e mauokafua haau, atihake e tau tuaga kapitiga, mo e fakamalagaki e fiafia.

Mauokafua fakatagata: Ka fakatoka e koe e tau foliaga ikiiki ti hokotia ki ai, to mauokafua a koe ke taute e tau foliaga lalahi. Logona foki e koe e mauokafua lahi ka fehagai mo e tau paleko he tau aho takitaha, tuga ke fakatumau ka peehi he atu taha.

Tau tuaga kapitiga: Fiafia e tau tagata ke lafi mo e tau tagata ne mitaki he fakatoka e tau foliaga, ko lautolu ne iloa e mena ne manako ti makai ke gahua ke hokotia ki ai. Pihia foki, taha he tau puhala mitaki lahi ke fakamalolō e tuaga kapitiga ko e gahua mo e taha tagata ne tatai e foliaga.

Fiafia: Ka fakatoka mo e hokotia ke he tau foliaga haau, logona hifo e koe e makona he manamanatuaga.

“Fiafia lahi au he fai foliaga. Fai mena tumau au ke taute mo e foaki ki a au e taha mena ke foli tumau ki ai. Ti ka hokotia a koe ke he foliaga, fiafia a koe ke liu ono ki tua mo e pehē, ‘Ae, maeke mooli au ke taute! Fakamooli e au e mena ne fakatoka ke taute.’”​—Christopher.

MATAPATU FAKAAKOAGA HE TOHI TAPU: “Ko ia kua manamanatu ke he matagi nakai gana saito e ia; ko ia foki kua kitekite ke he tau aolagi nakai ni helehele saito e ia.”​—Fakamatalaaga 11:4.

MENA KE TAUTE E KOE

Taute e tau lakaaga nei ke fakatoka mo e hokotia ke he tau foliaga haau.

Mailoga. Tohi hifo e tau foliaga kua aoga, ti tuku fakapapahi ai, he fifili e tau foliaga kua manako a koe ke taute fakamua, uaaki, toluaki, mo e falu foki.

Fakatoka. Ma e tau foliaga takitaha, taute e tau mena nā:

• Fakatoka e magaaho mooli ke oti ai.

• Fakatoka e tau lakaaga kua putoia.

• Manamanatu ke he tau mena uka, ti kumi e puhala ke kautū ki ai.

Gahua. Ua leo ke iloa e tau vala tala oti to kamata. Hūhū hifo ki a koe, ‘Ko e heigoa e mena fakamua ka taute e au ke hokotia ke he foliaga haaku?’ Ti taute. Utahetua e holoaga he tau lakaaga takitaha he oti he taute.

MATAPATU FAKAAKOAGA HE TOHI TAPU: “Ko e tau manatu he tagata ne malolo ke gahua kua hiku ia ke he muhu mena.”​—Tau Fakatai 21:5.