Puhala ke Fakamahani a Lautolu ne Foou ke Fakamatala
1. Fēfē e logonaaga haau he magaaho fakamua ne fakalataha a koe ke he gahua he fonua?
1 Manatu nakai e koe e mogo fakamua ne fakalataha a koe ke he gahua he fonua mai he taha fale ke he taha fale? Liga hopoate lahi mahaki a koe. Kaeke kua gahua a koe mo e faiaoga fakaako Tohi Tapu haau po ke taha tagata fakailoa, nakai fakauaua kua fiafia a koe ke moua e lagomatai haana. Kua iloa lahi e koe mogonei e gahua he fekafekau, ti ko koe mogonei he tuaga ke lagomatai a lautolu ne foou lahi ke fakamatala.
2. Ko e heigoa kua lata he tau tagata fakailoa foou ke iloa?
2 Kua lata e tau tagata fakailoa foou ke iloa ke kamata e tau fakatutalaaga mo e tagata he kaina, fakaaoga e Tohi Tapu he gutuhala, taute e tau liu aahi atu, mo e kamata ti taute e tau fakaako Tohi Tapu. Kua lata foki a lautolu ke iloa e puhala ke fakamatala he tau puhala kehekehe, tuga e fakamatala he puhalatū mo e ahiahi ke he tau tagata he tau matakavi pisinisi. Maeke ia koe ke lagomatai a lautolu ke holo ki mua he tau faahi nei ha ko e fakafifitakiaga mo e tau kupu haau.
3. Lagomatai fēfē e tautolu falu ha ko e fakafifitakiaga ha tautolu?
3 Fakaako he Fakafifitakiaga: Ne fakakite e Iesu ke he tau tutaki haana e puhala ke fakamatala. (Luka 8:1; 1 Pete. 2:21) Ka fakatoka a koe ke gahua mo e tagata fakailoa foou lahi, tauteute e fakataitai mukamuka ke maeke he tagata fakailoa ke fifitaki, liga he fakaaoga e fakataiaga i loto he taha he tau tohi ha tautolu. Ti tala age ke taute e koe e taha po ke ua e gutuhala ke maeke he tagata fakailoa ke logona e tau mena haau ka talahau. He ō mai kehe he gutuhala, liga hūhū a koe ke he tagata fakailoa ma e kitiaaga haana ke he lauiaaga he fakataitai haau. To lagomatai he mena nei a ia ke kitia e aoga he gahua mo e falu he fonua ti fakamukamuka ki a ia ke talia ha manatu lagomatai ne foaki e koe ka oti e taute e fakataitaiaga haana.
4. Liga lagomatai fēfē e tautolu e tagata fakailoa foou he mole e fanogonogo ke he fakataitaiaga haana?
4 Talahau Falu Manatu Lagomatai: Ne fakaako foki e Iesu e tau tutaki haana hagaao ke he puhala fakamatala. (Mata. 10:5-14) Maeke a koe ke lagomatai e tagata fakailoa foou ke he puhala pihia foki. Kaeke ko e magaaho haana ke tutala, fanogonogo fakamitaki. Mole e ō kehe ha mua mai he gutuhala, kia totonu he tala age fakahako mo e nava fakamooli, pete he kitia e koe kua lata falu vala he fakataitaiaga haana ke fakaholo ki mua. Ato fakakite e manatu lagomatai, liga fifili e koe ke toka ke kitia kua holo ki mua e mitaki haana ke he faahi ia he taha gutuhala foki. Liga kua hopoate ni a ia. Kia manatu foki, na kehekehe e lotomatala he tau tagata fakailoa, ti fa loga e puhala hako ke taute aki e matagahua.—1 Kori. 12:4-7.
5. Ko e heigoa ha tautolu ka talahau ka matamata mua ke foaki falu manatu lagomatai?
5 Falu magaaho, to hūhū e tagata fakailoa foou ki a koe ma e tau manatu lagomatai. Ka nakai hūhū a ia, ti matamata mua ke lagomatai a ia. Taute fēfē e mena nei ke he puhala fakailoilo? Ne hūhū falu tagata fakailoa, “Maeke nakai au ke tala atu e manatu lagomatai?” po ke, “Fēfē e manatu haau ke he puhala ia?” Taha puhala foki ke talahau, “Magaaho fakamua ne eke au mo tagata fakailoa, ne uka lahi au ke . . . , ka e lagomatai e puhala nei ki a au. . . . ” Kua aoga he falu magaaho ke totou tokoua e tohi Reasoning. Ke nakai fakatupetupe e koe a ia, kia foaki e tau manatu lagomatai ke he taha ni e vala he fakataitaiaga haana.
6. Hagaao ke he gahua he fonua, puhala fe kua ‘fakamata he lapatoa e lapatoa’?
6 Fakamata he Lapatoa e Lapatoa: Ko Timoteo, ko e tagata lotomatala he gahua fakamatala, ne fakamalolō e Paulo ke fakatumau a ia ke fakamahani ke fakaako atu mo e mafiti. (1 Timo. 4:13, 15) Pete kua leva lahi e fina atu fakamua a koe ke he gahua he fonua, kua lata ia koe ke lali tumau ke fakaholo ki mua e makutu haau. Ako mai he tau tagata fakailoa ne fakamatala mo koe, pihia foki mai ia lautolu ne nakaila mahani lahi ke he gahua he fonua, ti mataala ke lagomatai fakatotonu ke he falu, mua atu ki a lautolu ne foou lahi, ke eke mo tau tagata fekafekau makutu he kupu mooli.—Fakatai 27:17.