Fakatolomaki ki Mua e Lotomatala ha Tautolu he Fekafekauaga—Fakamahani a Lautolu ne Foou

Kakano kua Aoga Ai: Ko e tau tutaki foou ha Iesu kua lata ke omaoma ke he “tau mena oti” ne poaki e ia, putoia e fakaako he kupu mooli ke he falu. (Mata. 28:19, 20) Tokologa a lautolu ne foou kua fitā e hokotia ke hū he Aoga Fekafekau Fakateokarasi ti liga fakamatala nakai mautali ke he tau tagata he magafaoa po ke tau kapitiga. Ka e, he tupu e loto fakaaue ha lautolu ma e tau mena ne fakaako e lautolu mo e maeke ke iloa kua manako a Iehova ke he tau tagata oti ke logona e tala mitaki, ti liga fakakite e lautolu e manako ke fakalataha ke he gahua he fonua. (Roma 10:13, 14) Ka talia ki a lautolu ne foou ke eke mo tau tagata fakailoa nakaila papatiso, to lagomatai he fakamahaniaga mitaki a lautolu ke mauokafua lahi he taute e lautolu e lakaaga aoga nei he fakaholo ki mua e tuaga fakaagaaga ha lautolu.—Luka 6:40.

Puhala ke Taute Ai:

Lagomatai e tagata fakailoa foou ke moua e ia e tau tohi kua lata ma e gahua fakamatala mo e fakaako atu. Fakakite ki a ia e puhala ne tuku fakavahega e koe e kato fakamatala haau, ti fakamaama e kakano he tau tohi takitaha ne uta e koe.
He taute tokoua, fifili e fakafeleveiaaga fakataitai mai he Ha Tautolu a Fekafekauaga he Kautu ti fakagahua ai. Fakamalolō a ia ne foou ke fakaaoga e fakataitaiaga ke he tau kupu ni haana. Fakamahani ke he tau tuaga i loto he tohi Ministry School, lau 82, ne mahani mau ke he fonua ha mutolu. Talahau e aoga he lilifu e tau tapulu mo e tauteuteaga.—2 Kori. 6:3, 4.
Matutaki ke taute e fakamahaniaga. Fakakite ke he tau tagata fakailoa foou e mepe he fonua, ti fakaako a lautolu ke fakamau fakahako ai. Fakatātā e puhala ke fakamau hifo a lautolu ne fiafia. Fakaako a ia ke fakaaoga e jw.org he gahua fakamatala mo e tohi tote Good News for People of All Nations. Lagomatai a ia ke feaki e fiafia ne moua e ia.—1 Kori. 3:6.
Kia fakauka, ti nava ki a ia. (Fakatai 25:11) Fakatoka e fakafifitakiaga mitaki. Ko e fakamakutu mo e fiafia fakatagata haau kua fakakite to lauia mitaki ai ke he tau tau loga i mua.

Fakatai e Mena Ē he Mahina Nei:

Gahua he fonua ke he taha fale ke he taha fale mo e tagata fakaako haau, ti uta a ia ke he liu aahi atu po ke fakaako Tohi Tapu. Ka nakai fai tagata fakaako a koe, uiina e tagata fakailoa ne nakai lahi e iloaaga ke gahua mo koe.