Vala 10—Taute e Tau Fakaakoaga Tohi Tapu Holo ki Mua
Fakamahani e Tau Tagata Fakaako ke he Fekafekauaga he Taha Fale ke he Taha Fale
1 Ka fifili he tau motua kua lata e tagata fakaako Tohi Tapu mo tagata fakailoa nakaila papatiso, maeke ia ia ke kamata ke fakalataha mo e fakapotopotoaga ke he gahua fakamatala. (Kikite e Organized to Do Jehovah’s Will, lau 79-81.) Lagomatai fefe e tautolu e tagata fakaako ke hokotia ke maeke ke fakamatala he taha fale ke he taha fale?
2 Tauteute Tokoua: Nakai fai mena ke hukui aki e mautauteute mitaki. Fakakite ke he tagata fakaako e mouaaga he tau fakataitaiaga ne foaki mai he Ha Tautolu a Fekafekauaga he Kautu mo e tohi Reasoning, ti lagomatai a ia ke fifili e mataulu mukamuka kua aoga ma e fonua he matakavi. Mai he kamataaga, fakamalolo a ia ke fakaaoga e Tohi Tapu he fekafekauaga hana.—2 Timo. 4:2.
3 Ko e tau magaaho fakamahani kua latatonu mo e tagata fakailoa fou. He fatiaki he tagata fakaako e fakataitaiaga, fakakite ki a ia e puhala ke taute fakailoilo e tali ne aga mau ke he fonua. (Kolo. 4:6) Fakamafana ki a ia kua nakai lata e fekafekau Kerisiano ke iloa e tali ke he tau huhu takitaha he tagata he kaina. Kua mitaki lahi ke taute e tau huhu ia he tala age to taute e kumikumiaga ti liu ke fakatutala fakalaulahi e matakupu.—Fakatai 15:28.
4 Fakamatala Tokoua: Ko e magaaho fakapa ne fakalataha e tagata fakaako ke he fekafekauaga he taha fale ke he taha fale, kia toka a ia ke kitekite he taute e koe e fakataitaiaga ne kua tauteute tokoua e mua. Mole atu ti fai vala foki a ia. He falu magaaho, kua mitaki ke taute he tagata fakailoa fou e tama vala he fakataitaiaga, tuga e totou po ke talahau ke he kupu tohi. Manamanatu ke he aga fakatagata mo e maamaaga he tagata fakaako. (Filipi 4:5) Foaki tumau e navanava he fakatumau a koe ke fakamahani a ia ke he tau fahi kehekehe he gahua fakamatala.
5 Kua aoga ke lagomatai e tagata fakaako fou ke fakatu e setulu tumau he fakalataha ke he fekafekauaga, he tau fahitapu takitaha ka maeke. (Filipi 3:16) Pulega ke gahua tokoua he fonua, ti fakamalolo a ia ke gahua mo e falu ne makai. Ko e fakafifitakiaga mo e feoakiaga ha lautolu ka lagomatai a ia ke feaki e puhala mo e moua e olioli he fakamatala he taha fale ke he taha fale.