Leveki
Taute e Tau Fakaakoaga Tohi Tapu Holo ki Mua
Ko e uho nei ko e potaaga he tau matapatu manatu mai he tau atu vala tala he taute e tau fakaakoaga Tohi Tapu holo ki mua ne fakamau i loto he Ha Tautolu a Fekafekauaga he Kautu. Kua fakamafana ke he tau tagata oti ke leveki e uho nei mo e ke fakakia ki ai ka taute e tau fakaako Tohi Tapu. Lafi ki ai, lata ke fakamaama foki e tau manatu he uho nei ke he tau feleveiaaga ma e fekau he fonua, mo e maeke he tau leveki fekafekau ke fakaaoga ke fakave e tau lauga ha lautolu ki ai ka aahi atu ke he tau matakau he fakaakoaga tohi.
Vala 1: Ko e Heigoa e Fakaakoaga Tohi Tapu?
Ka taute fakatumau mo e fakatokatoka e koe e fakatutalaaga Tohi Tapu, pete he ku, ka e fakaaoga e Tohi Tapu fakalataha mo e taha he tau tohi ne kotofa, kua hane taute e koe e fakaakoaga Tohi Tapu. Kia hokotaki ko e fakaakoaga ka lagaua e taute he mole e fakataitaiaga ke fakaako mo e ka fai kakano ke talitonu to matutaki e fakaakoaga.—km 7/04 lau 1.
Tau Tohi kua Kotofa
◼ Ko e Heigoa e Manako he Atua ma Tautolu?
◼ Iloilo ne Takitaki Atu ke he Moui Tukulagi
◼ Tapuaki ke he Atua Moli Tokotaha
◼ Maeke a Koe mo Kapitiga he Atua! ka fakaaoga ke fakaako mo e tau tagata ne temotemoai e fakaakoaga po ke totouaga.
Vala 2: Mautauteute ke Taute e Fakaakoaga
Kua lata ia tautolu ke folafola e vala tala ke he puhala kua lauia e loto he tagata fakaako. Kua lata e mena nei mo e mautauteute fakamatafeiga he tokaloto e tagata fakaako.—km 8/04 lau 1.
Puhala ke Tauteute
◼ Kumikumi fakaku e mataulu, tau mataulu ikiiki, mo e tau lagomatai kitia mata he veveheaga po ke fakaakoaga.
◼ Fakamahino e tau tali ke he tau huhu ne tohi, he fakamailoga ni e tau matapatu kupu mo e tau alaga kupu.
◼ Fifili e tau kupu tohi ne tutu ai ke totou ka fakaako ai. Fakamaumau e tau manatu kuku he fahi he tohi ne fakaako.
◼ Tauteute e fakamanatuaga ku ke he tau matapatu manatu.
Hiki e Fakaakoaga ke Lata mo e Tagata
◼ Liogi hagaao ke he tagata fakaako mo e tau manako hana.
◼ Manamanatu ke he tau manatu ka liga uka he tagata fakaako ke maama po ke talia.
◼ Manamanatu: Ko e heigoa kua lata ia ia ke maama po ke gahua ke maeke ke fakaholo ki mua fakaagaga? Hokotia fefe au ke he loto hana?
◼ Ka lata, tauteute e fakataiaga, fakamaamaaga, po ke tau fufuta huhu ke lagomatai e tagata fakaako ke moua e kakano he manatu po ke kupu tohi.
Vala 3: Fakaaoga Lauia Mitaki he Tau Tohiaga Tapu
Ko e kakano ha tautolu he taute e tau fakaakoaga Tohi Tapu ko e ‘taute tutaki’ he lagomatai e tau tagata ke maama mo e talia e tau fakaakoaga he Kupu he Atua mo e fakagahua ke he tau momoui ha lautolu. (Mata. 28:19, 20; 1 Tesa. 2:13) Ko e mena ia, kua lata ke fakamatapatu e fakaakoaga aki e tau Tohiaga Tapu.—km 11/04 lau 8. (fufuta U.S. lau 4)
Fakaako Mai he Kupu he Atua
◼ Fakakite ke he tagata fakaako e puhala ke kumi aki e tau kupu pauaki he Tohi Tapu ni hana.
◼ Veveu mo e fakatutala ke he tau kupu Tohi Tapu ne fakakite e fakaveaga faka-Tohi Tapu ke he tau taofiaga ha tautolu.
◼ Fakaaoga e tau huhu. He nakai fakamaama e tau kupu Tohi Tapu ke he tagata fakaako, toka a ia ke fakamaama atu ki a koe e tau kupu.
◼ Kia fakamukamuka. Nakai lali ke fakamaama e tau vala oti he kupu tohi. Putoia ni e vala kua latatonu ke fakamaama aki e manatu.
◼ Talahau e fakagahuaaga aoga. Lagomatai e tagata fakaako ke kitia e puhala kua maeke e kupu tohi he Tohi Tapu ke gahua fakatagata ki a ia.
Vala 4: Fakamahani e Tau Tagata Fakaako ke Tauteute
Ko e tagata fakaako ne totou tuai e fakaakoaga, fakamaimailoga e tau tali, mo e manamanatu e puhala ke talahau ai ke he tau kupu ni hana nukua mafiti e holo ki mua fakaagaga. Ko e mena ia, ka fakatu e fakaakoaga tumau, tauteute tokoua e fakaakoaga ke fakakite e puhala ke he tagata fakaako. Mo e laulahi he tau tagata fakaako, to lagomatai ai ka tauteute tuai tokoua e veveheaga po ke fakaakoaga katoa.—km 12/04 lau 1.
Fakamaimailoga mo e Fakamaumau
◼ Fakamaama e puhala ke kumi e tau tali hako ke he tau huhu ne tohi ai.
◼ Fakakite ke he tagata fakaako e lagaki he tohi fakaako hau ne kua fakamaimailoga ni e koe e tau matapatu kupu po ke tau alaga kupu.
◼ Lagomatai e tagata fakaako ke kitia ko e mena lalago he kupu tohi ne tu ai e manatu he paratafa mo e fakakite ki a ia e puhala ke fakamaumau fakaku he fahi he fakaakoaga hana he tohi.
Fakamaama Ku mo e Liu Fakamanatu
◼ Fakakite ke he tagata fakaako e puhala ke kumikumi e veveheaga po ke mataulu he fakaakoaga, tau mataulu ikiiki, mo e tau fakataiaga fakamua to kamata e tauteute tuai fakamatafeiga hana.
◼ Fakamalolo e tagata fakaako ke liu fakamanatu e tau matapatu manatu ka oti e tauteute.
Vala 5: Fifili e Lahi he Vala ka Fakaako
Ko e lahi he vala ka fakaako ki ai to falanaki ke he maama mo e tau tutuaga he faiaoga mo e tagata fakaako.—km 1/05 lau 1.
Ati e Tua Malolo
◼ Aua neke fakamahala e maamaaga mitaki he tagata fakaako ma e Kupu he Atua ha ko e fakamafiti.
◼ Fakaaoga e ha magaaho kua lata ke lagomatai e tagata fakaako ke maama mo e talia e mena kua ako e ia.
◼ Fakalahi e magaaho ke manamanatu ke he tau matapatu kupu tohi ne fakave ki ai e tau fakaakoaga.
Fakaholo e Fakaakoaga
◼ Ka hihiga e tagata fakaako ke loa e tala ke he tau mena fakatagata, kua lata ia koe ke fakatoka ke tutala ke he tau mena nei ka oti e fakaakoaga.
◼ Kia nakai tutala tumau ka fakaako. Fakakaupa e fakatutalaaga ke he tau manatu kehe mo e tau mena tutupu ke nakai tauhele e tagata fakaako mai he moua e iloilo tonu he tau fakaakoaga aoga he Tohi Tapu.
Vala 6: Ka Huhu e Tagata Fakaako
Ka fakatumau e fakaako Tohi Tapu, kua lata ke taute e tau fakaakoaga he Tohi Tapu ke he puhala maopoopo ka e nakai hopo he taha matakupu ke he taha. To lagomatai he mena nei e tagata fakaako ke ati e fakaveaga he iloilo tonu mo e ke holo fakaagaga ki mua.—km 2/05 lau 6.
Kia Fakailoilo
◼ Ko e tau huhu hagaao ke he mena ne fakaako ki ai kua fa tali ni he mogoia.
◼ Ko e tau huhu ne nakai fai matutaki ke he mena ne fakaako po ke lata ke kumikumi kua lata ke fakatutala ki ai he taha magaaho. Liga kua lagomatai ke tohi hifo e tau huhu ia.
◼ Kaeke uka he tagata fakaako ke talia taha fakaakoaga, lata ke talahau taha vala tala ne tutala lahi ke he matakupu ia.
◼ Ka nakaila talitonu ia he tagata fakaako, toka e matakupu ma e taha magaaho mo e matutaki atu e fakaakoaga hana.
Kia Fakalatalata
◼ Kaeke nakai iloa e koe e tali, kia nakai tala age e manatu ni hau.
◼ Fakakite fakaeneene age e puhala ke taute e kumikumiaga.
Vala 7: Liogi he Fakaakoaga
Ma e tau tagata fakaako Tohi Tapu ke holo ki mua fakaagaga, kua aoga ke moua e monuina ha Iehova. Ko e mena ia, kua mitaki e fakaakoaga ke hafagi mo e fakaoti aki e liogi.—km 4/05 lau 6. (fufuta U.S. 3/05 lau 4)
Puhala ke Kamata e Liogi
◼ Mo lautolu ne hihiga fakalotu, kua maeke ke liogi he fakaakoaga fakamua.
◼ Ma e falu, lata ia tautolu ke fifili e magaaho ka kamata ke liogi.
◼ Fakaaoga e Salamo 25:4, 5 mo e 1 Ioane 5:14 ke fakamaama e kakano he liogi.
◼ Fakaaoga a Ioane 15:16 ke fakakite kua lata ia tautolu ke liogi ki a Iehova puhala ia Iesu Keriso.
Tau Mena Ka Putoia he Liogi:
◼ Kua felauaki ke fakaheke ki a Iehova ko e Punaaga he tau fakaakoaga.
◼ Fakakite e fiafia moli ke he tagata fakaako.
◼ Fakakite e loto fakaaue ke he fakatokatokaaga kua fakaaoga e Iehova.
◼ Ole e fakamonuina ha Iehova ma e tau laliaga he tagata fakaako ke taute e tau mena hane ako e ia.
Vala 8: Takitaki e Tau Tagata Fakaako ke he Fakatokatokaaga
Ko e foliaga ha tautolu he taute e tau fakaakoaga Tohi Tapu ke nakai ni fakaako e tau taofiaga ka e lagomatai foki e tau tagata fakaako ke eke mo vala he fakapotopotoaga Kerisiano. Fakaaoga falu minuti gahoa he tau fakaakoaga takitaha he fahi tapu ke fakatutala ke he taha e manatu hagaao ke he fakatokatokaaga ha Iehova.—km 5/05 lau 8. (fufuta U.S. 4/05 lau 8)
Tau Feleveiaaga he Fakapotopotoaga
◼ Fakamaama e tau feleveiaaga he fakapotopotoaga takitaha. Mai he fakaakoaga fakamua, uiina a lautolu ke fakalataha.
◼ Tutala ke he tau manatu mitaki lahi ne talahau he tau feleveiaaga.
◼ Atihake e fiafia ma e Fakamanatuaga, tau toloaga, mo e ahiahi he leveki takaiaga.
◼ Fakaaoga e tau ata he tau tohi ha tautolu ke lagomatai a lautolu ke fakatino e tau mena ne fa taute i ai.
◼ Fakamalolo a lautolu ke totou e porosua Tau Fakamoli a Iehova—Ne Kaufakalataha ke Taute e Finagalo he Atua ke he Lalolagi Katoa
Fakaaoga e Tau Vitio ke Atihake e Loto Fakaaue
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Vala 9: Tauteute e Tau Tagata Fakaako ke Fakamatala Nakai Mautali
He kamata e tau tagata fakaako Tohi Tapu ke fakagahua e tua ke he mena ne ako e lautolu, ne omoomoi a lautolu ke tutala hagaao ki ai.—km 5/05 lau 1.
Fakamalolo a Lautolu ke Fakamatala
◼ Fai nakai he tau kapitiga mo e tau tagata he magafaoa ka uiina e lautolu ke fakalataha ke he fakaakoaga?
◼ Fai nakai he tau kapitiga gahua, tau kapitiga aoga, po ke falu tagata mahani ne fakakite e fiafia?
Fakamahani ke Fakalataha ke he Tau Taofiaga ha Lautolu:
◼ He tau manatu ne fifili he magaaho ne fakaako, huhu ke he tagata fakaako, “To fakaaoga fefe e koe e Tohi Tapu ke fakamaama aki e kupu moli nei ke he magafaoa hau?”
◼ Lagomatai e tagata fakaako ke loto fakaaue e lata ke fakalilifu mo e totonu ka tutala mo e falu hagaao ke he Atua mo e hana tau finagalo.
◼ Ko e porosua Tau Fakamoli a Iehova—Ne Kaufakalataha ke Taute e Finagalo he Atua ke he Lalolagi Katoa kua maeke ke taute e tau tagata fakaako ke lagomatai e tau kapitiga mo e tau tagata he magafaoa ke maama ha tautolu a tau taofiaga mo e tau gahua ne fakave ke he Tohi Tapu.
Vala 10: Fakamahani e Tau Tagata Fakaako ke he Fekafekauaga he Taha Fale ke he Taha Fale
Ka fifili he tau motua kua lata e tagata fakaako Tohi Tapu mo tagata fakailoa nakaila papatiso, maeke ia ia ke kamata ke fakalataha mo e fakapotopotoaga ke he gahua fakamatala.—km 6/05 lau 1.
Tauteute Tokoua
◼ Fakakite ke he tagata fakailoa fou e mouaaga he tau fakataitaiaga.
◼ lagomatai a ia ke fifili e mataulu mukamuka kua aoga ma e fonua he matakavi.
◼ Fakamalolo a ia ke fakaaoga e Tohi Tapu he fekafekauaga hana.
◼ Fatiaki tokoua e fakataitaiaga. Fakakite ki a ia e puhala ke taute fakailoilo e tau tali ne aga mau.
Fakamatala Tokoua
◼ Toka e tagata fakaako ke kitekite he taute e koe e fakataitaiaga ne tauteute tokoua e mua.
◼ Manamanatu ke he aga fakatagata mo e maamaaga he tagata fakaako. He falu magaaho, kua mitaki ke taute e ia e tama vala he fakataitaiaga.
◼ Lagomatai e tagata fakailoa fou ke fakatu e setulu tumau he fakalataha ke he fekafekauaga.
Vala 11: Lagomatai e Tau Tagata Fakaako ke Taute e Tau Liu Ahi Atu
Ko e mau tauteute ma e liu ahi atu kua kamata ke he ahi atu fakamua. Fakamalolo e tagata fakaako ke fakakite e fiafia moli ki a lautolu ne kua tutala mo ia. Fakamahani tumau a ia ke huhu ki a lautolu, fanogonogo ke he tau talahauaga ha lautolu, mo e ke mailoga e tau mena ne kapaletu a lautolu i ai.—km 7/05 lau 1.
Tauteute ke Liu Atu
◼ Liu fakatutala ke he liu atu fakamua, mo e lagomatai e tagata fakaako ke fifili e matakupu ka futiaki e tagata he kaina.
◼ Tauteute e fakataiaga ku ke fakakite taha kupu Tohi Tapu fakalataha mo e paratafa he tohi.
◼ Tauteute e huhu kua maeke ke huhu he matahiku he fakatutalaaga.
Makai he Liu Atu
◼ Fakamalolo e tagata fakaako ke liu mafiti atu ki a lautolu oti kua fakakite e fiafia.
◼ Lagomatai e tagata fakaako ke kitia e lata he ahi atu tumau he lali ke moua a lautolu ne uka ke moua.
◼ Fakakite ke he tagata fakailoa fou e puhala ke taute e tau fakatokaaga, mo e lagomatai a ia ke loto fakaaue e lata ke liu atu tuga ne mavehe.
Vala 12: Lagomatai e Tau Tagata Fakaako ke Kamata mo e Taute e Tau Fakaakoaga Tohi Tapu
Ko e fifitaki hau ki a Iesu he fakatoka e fakafifitakiaga mitaki he fekafekauaga hau ni kua aoga. He kitekite e tagata fakaako ke he takitakiaga hau, to loto fakaaue a ia ke he foliaga ne taute e tau ahi atu ke kamata e tau fakaakoaga Tohi Tapu.—km 8/05 lau 1.
Foaki e Fakaakoaga Tohi Tapu
◼ Fakamaama ke he tagata fakaako kua nakai mahani ke fakamaama fakamatafeiga e fakatokaaga fakaako.
◼ Kua fa mitaki lahi ke fakatata e fakaakoaga he fakaaoga taha po ke liga ua e paratafa mai he tohi fakaako.
◼ Liu fakatutala mo e fakatata e taha he tau manatu ke kamata e tau fakaako Tohi Tapu.—km 8/05 lau 8; km 1/02 lau 6.
Fakamahani e Tau Tagata Fakaako ke Eke mo Tau Faiaoga
◼ Fakamalolo e tau tagata fakaako ke hu he Aoga Fekafekau Fakateokarasi.
◼ Pulega mo e tau tagata fakailoa fou ke fakatauo a koe ke he tau fakaakoaga Tohi Tapu ka liga fai mena a lautolu ka lafi ki ai.