Kua Palepale e Fakauka

¹ “Ko e ha mutolu a fakauka, kia moua ai ha mutolu a moui.” (Luka 21:19) Ko e tau kupu ia, ko e vala he perofetaaga ha Iesu hagaao ke he “fakaotiaga he lalolagi,” ne fakamahino mai ke fakatumau ha tautolu a mahani fakamoli, kua lata ia tautolu ke mautauteute ke fakafehagai mo e tau kamatamata loga. Ka ke he malolo ha Iehova, igatia a tautolu mo e ‘fakauka ke hoko ke he fakaotiaga’ mo e “to fakamoui.”​—Mata. 24:3, 13; Filipi 4:13.

² Ko e favaleaga, tau lekua malolo tino, tau uka fakatupe, mo e tupetupe e manamanatuaga kua taute e tau aho takitaha mo kamatamata. Kia nakai nimo foki e tautolu, kua lali a Satani ke moumou e mahani fakamoli ha tautolu ki a Iehova. Ko e tau aho takitaha kua fakatumau a tautolu ke fakamoli ke he Matua ha tautolu nukua lagomatai a tautolu ke foaki e taha aho ia mo lalagoaga he tali ke he paleko he Fakafiu. Ko e fiafia ha ia ke iloa ko e tau “hihina mata” ha tautolu he fehagai mo e kamatamata kua nakai nimo! Kua uho ia ki a Iehova, ti ko e mahani fakamoli ha tautolu kua taute e loto hana ke fiafia!​—Sala. 56:8; Fakatai 27:11.

³ Hakahaka he Tau Kamatamata: Fakakite he matematekelea e lolelole he tua po ke kelea he aga fakatagata, tuga e fakatokoluga po ke nakai fakauka. Ka e he tutuli ke hola kehe po ke fakaoti e tau kamatamata he aga nakai mai he faka-Tohi Tapu, kua lata ia tautolu ke omaoma ke he fakatonuaga he Kupu he Atua ke “toka e fakauka ke eke hana gahua katoatoa.” Ko e ha? Kakano ko e fakauka fakamoli ke he tau kamatamata kua lagomatai a tautolu ke “katoatoa ai mo e fakamaopoopo ai.” (Iako. 1:2-4) Maeke he fakauka ke lagomatai a tautolu ke feaki e tau fua uho, tuga e mahani mitaki, fakaalofa hohofi, mo e fakaalofa noa.​—Roma 12:15.

⁴ Tua ne Fua Mai he Kamatamata: Ka fakauka a tautolu ke he tau kamatamata, kua moua e tautolu e tua ne fua mai he kamatamata nukua uho lahi ke he fofoga he Atua. (1 Pete. 1:6, 7) Ko e tua pihia kua tauteute a tautolu ke fakatumau e mauokafua ke he tau kamatamata anoiha. Lafi ki ai, kua logona e tautolu e taliaaga he Atua, ti fakamalolo he mena nei e amaamanakiaga ha tautolu, he taute ai ke moli ki a tautolu.​—Roma 5:3-5.

⁵ Ko e palepale mua ue atu ma e fakauka kua fakakite mai he Iakopo 1:12, nukua pehe: “Uhoaki e tagata kua fakauka ke he kamatamata; ha ko e mena ka oti e kamatamata, ti moua ai e ia e foufou he moui.” Ti, kia fakatumau a tautolu ke nakai maueue e mahani fakamoli ha tautolu ki a Iehova, he mauokafua to palepale mitaki e ia a “lautolu kua fakaalofa kia ia.”

Vala 2​—Taute e Tau Fakaakoaga Tohi Tapu Holo ki Mua

Mautauteute ke Taute e Fakaakoaga

¹ Ko e fakaako lauia mitaki ke he fakaakoaga Tohi Tapu kua putoia e lahi atu he fakatutala ni ke he vala tala mo e veu he tau kupu tohi ne tutu i ai. Kua lata ia tautolu ke folafola e vala tala ke he puhala kua lauia e loto he tagata fakaako. Kua lata e mena nei mo e mautauteute fakamatafeiga he tokaloto e tagata fakaako.​—Fakatai 15:28.

² Puhala ke Tauteute: Kamata he liogi ki a Iehova hagaao ke he tagata mo e tau manako hana. Ole ki a Iehova ke lagomatai a koe ke hoko ke he loto he tagata fakaako. (Kolo. 1:9, 10) Ke kitia mitaki e matakupu, kia fai magaaho ke manamanatu ke he mataulu he veveheaga po ke fakaakoaga, ke he tau mataulu ikiiki, mo e tau lagomataiaga kitia mata. Huhu ki a koe ni, ‘Ko e heigoa e fakaveaga he vala tala?’ To lagomatai he mena nei a koe ke hagaaki ke he tau matapatu manatu he taute e koe e fakaakoaga.

³ Liu fakamanatu fakamitaki e vala tala he taha paratafa ke he taha paratafa. Fakamahino e tau tali ke he tau huhu ne tohi, he fakamailoga ni e tau matapatu kupu mo e tau alaga kupu. Kumikumi e puhala ne matutaki e tau kupu tohi ne tutu i ai mo e matapatu manatu he paratafa, ti fifili e kupu ke totou he magaaho fakaako. To lagomatai lahi ki a koe ka fakamaumau e tau manatu kuku he fahi he tohi. Kua lata he tagata fakaako ke kitia maali ko e mena ne ako e ia kua mai he Kupu he Atua.​—1 Tesa. 2:13.

⁴ Hiki e Fakaakoaga ke Lata mo e Tagata: Matutaki atu, manamanatu ke he fakaakoaga mo e tokaloto e tagata fakaako pauaki. Lali ke kitia tuai e tau huhu mo e tau manatu kua liga uka ia ia ke maama po ke talia. Huhu ki a koe ni: ‘Ko e heigoa kua lata ia ia ke maama po ke gahua ke maeke ke fakaholo ki mua fakaagaga? Hoko fefe au ke he loto hana?’ Ti hikihiki e fakaakoaga hau pihia. He tau magaaho, kua liga kitia e koe e lata ke tauteute e fakataiaga, e fakamaamaaga, po ke tau fufuta huhu ke lagomatai e tagata fakaako ke moua e kakano he manatu po ke kupu tohi pauaki. (Nehe. 8:8) Ka e hola kehe mai he fakaaoga falu vala tala lafi ki luga ne tote e aoga ke he matakupu. Ko e liu fakamanatu ku he fakaotiaga he fakaakoaga ka lagomatai a koe ke manatu e tau matapatu manatu.

⁵ Ko e olioli ha ia ha tautolu ka moua mai e fua tututonu ia lautolu ne fou ke fakaheke ki a Iehova! (Filipi 1:11) Ke lagomatai a lautolu ke hoko ke he foliaga ia, tauteute fakamitaki he tau magaaho takitaha ka taute e koe e fakaakoaga Tohi Tapu.