Kua Palepale e Fakauka
1 “Ko e ha mutolu a fakauka, kia moua ai ha mutolu a moui.” (Luka 21:19) Ko e tau kupu ia, ko e vala he perofetaaga ha Iesu hagaao ke he “fakaotiaga he lalolagi,” ne fakamahino mai ke fakatumau ha tautolu a mahani fakamoli, kua lata ia tautolu ke mautauteute ke fakafehagai mo e tau kamatamata loga. Ka ke he malolo ha Iehova, igatia a tautolu mo e ‘fakauka ke hoko ke he fakaotiaga’ mo e “to fakamoui.”—Mata. 24:3, 13; Filipi 4:13.
2 Ko e favaleaga, tau lekua malolo tino, tau uka fakatupe, mo e tupetupe e manamanatuaga kua taute e tau aho takitaha mo kamatamata. Kia nakai nimo foki e tautolu, kua lali a Satani ke moumou e mahani fakamoli ha tautolu ki a Iehova. Ko e tau aho takitaha kua fakatumau a tautolu ke fakamoli ke he Matua ha tautolu nukua lagomatai a tautolu ke foaki e taha aho ia mo lalagoaga he tali ke he paleko he Fakafiu. Ko e fiafia ha ia ke iloa ko e tau “hihina mata” ha tautolu he fehagai mo e kamatamata kua nakai nimo! Kua uho ia ki a Iehova, ti ko e mahani fakamoli ha tautolu kua taute e loto hana ke fiafia!—Sala. 56:8; Fakatai 27:11.
3 Hakahaka he Tau Kamatamata: Fakakite he matematekelea e lolelole he tua po ke kelea he aga fakatagata, tuga e fakatokoluga po ke nakai fakauka. Ka e he tutuli ke hola kehe po ke fakaoti e tau kamatamata he aga nakai mai he faka-Tohi Tapu, kua lata ia tautolu ke omaoma ke he fakatonuaga he Kupu he Atua ke “toka e fakauka ke eke hana gahua katoatoa.” Ko e ha? Kakano ko e fakauka fakamoli ke he tau kamatamata kua lagomatai a tautolu ke “katoatoa ai mo e fakamaopoopo ai.” (Iako. 1:2-4) Maeke he fakauka ke lagomatai a tautolu ke feaki e tau fua uho, tuga e mahani mitaki, fakaalofa hohofi, mo e fakaalofa noa.—Roma 12:15.
4 Tua ne Fua Mai he Kamatamata: Ka fakauka a tautolu ke he tau kamatamata, kua moua e tautolu e tua ne fua mai he kamatamata nukua uho lahi ke he fofoga he Atua. (1 Pete. 1:6, 7) Ko e tua pihia kua tauteute a tautolu ke fakatumau e mauokafua ke he tau kamatamata anoiha. Lafi ki ai, kua logona e tautolu e taliaaga he Atua, ti fakamalolo he mena nei e amaamanakiaga ha tautolu, he taute ai ke moli ki a tautolu.—Roma 5:3-5.
5 Ko e palepale mua ue atu ma e fakauka kua fakakite mai he Iakopo 1:12, nukua pehe: “Uhoaki e tagata kua fakauka ke he kamatamata; ha ko e mena ka oti e kamatamata, ti moua ai e ia e foufou he moui.” Ti, kia fakatumau a tautolu ke nakai maueue e mahani fakamoli ha tautolu ki a Iehova, he mauokafua to palepale mitaki e ia a “lautolu kua fakaalofa kia ia.”