‘Fiafia e Tagata kua Fakauka Mau ke he Kamatamata’
1 Kua fehagai e tau Kerisiano takitaha mo e tau kamatamata. (2 Timo. 3:12) Liga tupu mai e tau kamatamata ha ko e gagao e tino, uka fakatupe, matahele, favaleaga, po ke falu puhala loga foki. Ko e tau kamatamata ne fakakavega aki e Satani a tautolu kua talaga ke fakamanou hifo a tautolu, ke taute a tautolu ke tiaki e fekafekauaga Kerisiano, po ke taofi foki a tautolu mai he fekafekau ke he Atua. (Iopu 1:9-11) Fakahiku fēfē ke he fiafia lahi e fakauka ke he tau kamatamata?—2 Pete. 2:9.
2 Tauteute ma e Tau Kamatamata: Ne foaki e Iehova e haana Kupu mooli, putoia e fakamauaga he moui mo e tau fakaakoaga ha Iesu. He logona e tau kupu ha Iesu mo e taute ai, kua fakatoka e tautolu e fakavēaga malolō ati tauteute a tautolu ma e kamatamata. (Luka 6:47-49) Kua moua foki e tautolu e malolō mai he falu foakiaga—he ha tautolu a tau matakainaga Kerisiano, tau feleveiaaga he fakapotopotoaga, mo e tau tohi ne fakavē ke he Tohi Tapu mai he vahega fekafekau fakamoli mo e loto matala. Kua fakaaoga tumau e tautolu e mena fakaalofa he Atua he liogi.—Mata. 6:13.
3 Kua foaki mai foki e Iehova e amaamanakiaga ki a tautolu. Ka atihake e tautolu e tua malolō ke he tau maveheaga a Iehova, kua eke e amaamanakiaga ha tautolu ko e “taula he [“solu,” NW], kua nakai matoho mo e mauokafua.” (Hepe. 6:19) He vahā Tohi Tapu, ne nakai toka he tau toga e uaafo ka e nakai fai taula, pete ne afua mitaki. Ka fakaofo mai e afā, ko e tuku hifo he taula ka puipui e toga neke tafea atu ke he pokoahu. Pihia foki, ko e ati e tautolu e tua ke he tau maveheaga he Atua mogonei ka mauokafua a tautolu he magaaho ka tutupu ai e tau matematekelea loga. Maeke e tau mena uka ke tutupu fakaofo. Pete ne talia e gahua fakamatala ha Paulo mo Panapa he magaaho fakamua i Luseta, ne hiki mafiti e tuaga he magaaho ne hohoko mai e tau tagata totoko Iutaia.—Gahua 14:8-19.
4 Tamai he Fakauka e Fiafia: He fakatumau ke mauokafua ke he fekafekauaga pete ne tau totoko kua foaki ki a tautolu e mafola he manamanatuaga. Kua fiafia a tautolu ka tokutoku fakakelea ha ko Keriso. (Gahua 5:40, 41) Ko e fakauka ke he tau kamatamata kua lagomatai a tautolu ke feaki e tau mahani he fakatokolalo, omaoma, mo e fakauka fakalahi. (Teu. 8:16; Hepe. 5:8; Iako. 1:2, 3) Kua fakaako a tautolu ke falanaki ki a Iehova, ke falanaki ke he tau maveheaga haana, mo e taute a ia mo hūaga.—Fakatai 18:10.
5 Iloa e tautolu na mole vave e tau kamatamata. (2 Kori. 4:17, 18) Kua foaki he tau kamatamata ki a tautolu e tau magaaho ke fakatātā e hokulo he ha tautolu a fakaalofa ki a Iehova. He fakauka ki ai, maeke ia tautolu ke foaki e tali ke he tau ekefakakelea a Satani. Ko e mena ia, kua nakai fakalolelole a tautolu! “[“Fiafia,” NW] e tagata kua fakauka ke he kamatamata; ha ko e mena ka oti e kamatamata, ti moua ai e ia e foufou he moui.”—Iako. 1:12.