Kia Tauteute Fakamitaki ke Fakaako Atu
1. Ko e ha kua lata ia tautolu ke hagaaki he atihake e loto fakaaue ka taute e fakaako Tohi Tapu?
1 Ka taute e tautolu e fakaako Tohi Tapu, kua lata ia tautolu ke tauteute fakamitaki kaeke ke fakalagalaga e tautolu e tagata fakaako ke fekafekau ki a Iehova. Kua lata ia tautolu ke aoga e tau laliaga ha tautolu he atihake e loto fakaaue he tagata fakaako ma e kupu mooli he Tohi Tapu. To omoomoi he mena nei e tagata fakaako. (Teu. 6:5; Fakatai 4:23; 1 Kori. 9:26) Liga to taute fēfē e tautolu e mena nei?
2. Lagomatai fēfē he liogi a tautolu ke tauteute fakamitaki?
2 Tauteute ke he Puhala Liogi: Ha ko Iehova ne fakatupu e tega he kupu mooli he loto he tagata fakaako, kua latatonu ia tautolu ke kamata tauteute ma e fakaakoaga he liogi fakamahino ma e tagata fakaako mo e tau manako pauaki haana. (1 Kori. 3:6; Iako. 1:5) Ko e tau liogi pihia kua lagomatai foki a tautolu ke fifili e puhala ka lalago fakalahi atu e tautolu ke fakapuke e loto haana ke he “maama mitaki” he finagalo a Iehova.—Kolo. 1:9, 10.
3. Liga tauteute fēfē a tautolu mo e tokaloto e tagata fakaako?
3 Manamanatu ke he Tagata Fakaako: Ne iloa e Iesu ko e fakaako lauia mitaki kua putoia e manamanatu ke he tau tagata. Liga ua e magaaho ne tala age e hūhū taha nei ki a Iesu: “Ko e heigoa e mena ke eke e au ke moua ai e moui tukulagi?” Ne tali e ia he tau magaaho takitaha he fakaaoga e tau puhala kehekehe. (Luka 10:25-28; 18:18-20) Kua lata ia tautolu ke tokaloto e tagata fakaaako he tauteute a tautolu. Ha e fē e tau kupu tohi i loto ka totou e tautolu mo ia? Lahi fēfē e vala tala ka amanaki a tautolu ke fakaako? Ko e heigoa e tau manatu he fakaakoaga kua liga uka he tagata fakaako ke maama po ke talia? Kaeke ke manamanatu a tautolu ke he falu hūhū ka hūhū mai, to mitaki ki a tautolu ke mautauteute ke tali fakamitaki.
4. Ko e heigoa kua putoia ke he tauteute mitaki?
4 Liu Fakamanatu e Tohi: Pete he lagaloga e fakaako e tautolu e tohi he tau mogo kua mole, ko e magaaho fakamua laia ka fakaako e tautolu mo e tagata fakaako. Ke hokotia a tautolu ke he loto haana, kua aoga lahi e tauteute mitaki ma e tau fakaakoaga takitaha. Kakano e mena nei ke taute e tautolu e tau mena ne fakamalolō e tagata fakaako ha tautolu ke taute. Liu fakamanatu e vala tala, putoia e tau kupu tohi ne tūtū ai, mo e tokaloto e tagata fakaako, ti liga vavate e tau matapatu manatu.—Roma 2:21, 22.
5. Liga fifitaki fēfē e tautolu a Iehova?
5 Kua fiafia lahi a Iehova ke he holo ki mua he tau tagata fakaako Tohi Tapu takitaha. (2 Pete. 3:9) He fai magaaho ke tauteute ma e tau fakaako Tohi Tapu takitaha, kua fakatātā e tautolu e manamanatuaga fakaalofa pihia.