VALA TALA FAKAAKO 41
Puhala ke Lagomatai e Tagata Fakaako Tohi Tapu ke Hoko Atu ke he Papatiso—Vala Taha
“Kua kitia a mutolu ko e tohi a Keriso a mutolu ne fekafekau ai a mautolu.”—2 KORI. 3:3.
LOLOGO 40 Kia Kumikumi Fakamua e Kautu
FAKAMAAMAAGA KŪa
Mua atu e fiafia he fakapotopotoaga katoa he kitia e tagata fakaako Tohi Tapu ne fakaalofa a lautolu ki ai kua papatiso (Kikite paratafa 1)
1. Lagomatai fēfē he 2 Korinito 3:1-3 a tautolu ke loto fakaaue ke he kotofaaga ke taute e fakaako Tohi Tapu kua takitaki ke he papatiso? (Kikite fakatino he kili.)
FĒFĒ e logonaaga haau ka kitia e tagata fakaako Tohi Tapu mai he fonua he fakapotopotoaga haau kua papatiso? Fiafia mooli a koe. (Mata. 28:19) Ti kaeke ko koe ne fakaako mo e tutaki foou ia, to fiafia lahi a koe ke kitia a ia kua papatiso! (1 Tesa. 2:19, 20) Ko e tau tutaki papatiso foou ko e “tau tohi ke talahaua mitaki,” he nakai ni ma lautolu kua fakaako mo lautolu ka e pihia foki mo e fakapotopotoaga katoa.—Totou 2 Korinito 3:1-3.
2. (a) Ko e heigoa e hūhū aoga lahi kua lata a tautolu ke fakatutala, ti ko e ha? (e) Ko e heigoa e fakaako Tohi Tapu? (Kikite matahui tala.)
2 Ko e mena mitaki lahi ke kitia ke he fā e tau kua mole ko e evalesi kua kavi ke he 10,000,000 he tau tagata fakaako Tohi Tapub ne hokotaki he tau mahina takitaha he lalolagi katoa. He tau tau takitaha ia foki kua evalesi ke molea e 280,000 ne papatiso he tau tau takitaha ko e Tau Fakamoli a Iehova mo e ko e tau tutaki foou ha Iesu Keriso. Lagomatai fēfē e tautolu e tau tagata fakaako Tohi Tapu ne molea e toko miliona ia ke papatiso? He fakauka a Iehova ke fakaatā e tau tagata ke eke mo Tau Fakamoli Haana, manako a tautolu ke taute e tau mena oti ke lagomatai a lautolu ke holo ki mua fakamafiti ke papatiso. Kua teitei oti tuai e magaaho!—1 Kori. 7:29a; 1 Pete. 4:7.
3. Ko e heigoa ka fakatutala a tautolu he vala nei hagaao ke he fakaako Tohi Tapu?
3 Ha kua mafiti lahi e lata ke taute tutaki mogonei, kua kumikumi he tau la ofisa e puhala ka lagomatai e tautolu e tokologa he tau tagata fakaako Tohi Tapu ha tautolu ke holo atu ke he papatiso. He vala tala nei mo e vala tala ka mui mai, to kitia e tautolu e mena ka fakaako mai he tau paionia, tau misionare, mo e tau leveki takaiaga kua lahi e iloaaga.c (Fakatai 11:14; 15:22) Kua fakamaama e lautolu e mena ka taute he tau faiaoga Tohi Tapu mo e tau tagata fakaako ha lautolu ke kautū e fakaako Tohi Tapu. He vala tala nei, to fakatutala a tautolu ke he lima e vala kua lata e tau tagata fakaako takitaha ke taute ke holo ki mua ke papatiso.
FAKAAKO HE TAU FAAHI TAPU TAKITAHA
Ole ke he tagata fakaako ke nonofo ke fakatutala ke he Tohi Tapu (Kikite paratafa 4-6)
4. Ko e heigoa kua lata a tautolu ke mailoga ke he fakaako Tohi Tapu he gutuhala?
4 Tokologa he tau matakainaga kua taute e tau fakaako Tohi Tapu he gutuhala he tagata he kaina. Pete ko e kamataaga mitaki anei ke fakalagalaga e fiafia ke he Tohi Tapu, ko e tau fakatutalaaga nei kua kū lahi ti nakai fa mahani ke taute he tau faahi tapu takitaha. Ke feaki atu foki e fiafia, falu kua ole ke moua e tau vala tala matutaki he tagata ne fiafia ti hea atu he telefoni po ke tohitohi atu he matini ke he tagata ke talahau e taha manatu kū mai he Tohi Tapu ato liu a laua ke feleveia. Ko e tau fakatutala pihia kua liga matutaki ke he tau mahina ka e nakai tupu mai e fakaako holo ki mua he Tohi Tapu. To holo ki mua mooli kia e tagata fakaako ke tukulele mo e papatiso kaeke ko e magaaho mo e laliaga ni a ia ne moua e ia ke fakaako e Kupu he Atua? Liga nakai.
5. Ia Luka 14:27-33, ko e heigoa ne fakamaama e Iesu ka lagomatai a tautolu he gahua taute tutaki?
5 He taha magaaho, fakamaama e Iesu e mena ka taute he tagata kua manako ke eke mo tutaki haana. Tutala a ia hagaao ke he taha tagata ne manako ke ati e kolo mo e hagaao ke he patuiki ne manako ke fano he tau. Pehē a Iesu ko e tagata kua ati e kolo kua lata ke “nofo fakamua ki lalo ke totou e tau tupe ke palepale aki” ke mau e kolo, lata foki e patuiki ke “nofo fakamua ki lalo ke fifili” ke kitia kua maeke nakai he tau kautau haana ke taute e mena kua amanaki ki a lautolu ke taute. (Totou Luka 14:27-33.) Pihia foki, iloa e Iesu ko e tagata kua manako ke eke mo tutaki haana kua lata ke kumikumi fakamitaki e kakano ke mui atu ki a Iesu. Ko e manatu ia ati lata a tautolu ke fakamalolō e tau tagata fakaako ha tautolu ke fakaako mo tautolu he tau faahi tapu takitaha. Taute fēfē e tautolu e mena ia?
6. Ko e heigoa ka lali a tautolu ke taute ke moua e tau fakaakoaga holo ki mua?
6 Kamata he fakaloaloa e tau fakaako ia he gutuhala. Maeke a koe ke fakatutala ke he falu manatu foki he Tohi Tapu he tau magaaho takitaha kua ahiahi atu a koe. Ka mitaki ke he tagata he kaina e loa he ahiahi atu haau, hūhū ki a ia kaeke ke fai mena ke nonofo a mua ke matutaki e tutala. Ko e tali he tagata he kaina ka fakakite e uho lahi he fakaako Tohi Tapu ki a ia. Ke lagomatai a ia ke mafiti e holo ki mua, maeke foki a koe ke hūhū ke he tagata fakaako ko e makai nakai a ia ke fakaako lagaua he faahi tapu. Ka e lahi atu foki e mena kua lata he fakaako lagataha po ke lagaua he tau faahi tapu takitaha.
MAUTAUTEUTE MA E TAU FAKAAKOAGA TAKITAHA
Mautauteute mitaki ma e fakaako Tohi Tapu, ti fakakite ke he tagata fakaako e puhala ke mautauteute (Kikite paratafa 7-9)
7. Mautauteute mitaki fēfē e faiaoga ma e tau magaaho fakaako Tohi Tapu takitaha?
7 Ha ko e faiaoga, lata a koe ke mautauteute fakamitaki ma e tau magaaho fakaako Tohi Tapu takitaha. Maeke a koe ke kamata ke totou e vala tala mo e kumi e tau kupu Tohi Tapu. Iloa mitaki e tau matapatu manatu. Manamanatu ke he mataulu he fakaakoaga, tau vala mataulu, tau hūhū he fakaakoaga, tau kupu tohi ke “totou,” tau fakatino, mo e tau vitiō ka lagomatai ke fakamaama aki e matakupu. He tokaloto e tagata fakaako haau, manamanatu fakahokulo tuai ke he puhala ke fakamaama fakamukamuka mo e fakamaaliali e vala tala ke mafiti e tagata fakaako ke maama mo e fakagahua ai.—Nehe. 8:8; Fakatai 15:28a.
8. Ko e heigoa kua fakaako he tau kupu he aposetolo ko Paulo ia Kolose 1:9, 10 ki a tautolu ke he liogi ma e tau tagata fakaako Tohi Tapu ha tautolu?
8 Ko e taha vala he tauteuteaga haau, liogi ki a Iehova hagaao ke he tagata fakaako mo e haana tau manako. Ole ki a Iehova ke lagomatai a koe ke fakaako mai he Tohi Tapu he puhala ke hokotia ke he loto he tagata. (Totou Kolose 1:9, 10.) Lali ke manamanatu ke he ha mena ne liga uka e tagata fakaako ke maama po ke talia. Tokaloto ko e foliaga haau ke lagomatai a ia ke holo atu ke papatiso.
9. Lagomatai fēfē he faiaoga e tagata fakaako ke mautauteute ma e fakaakoaga haana? Fakamaama.
9 Amanaki a tautolu ko e fakaako Tohi Tapu tumau he tagata fakaako to loto fakaaue a ia ke he mena ne taute e Iehova mo Iesu ti manako ke fakaako atu foki. (Mata. 5:3, 6) Ke aoga katoatoa mai he fakaakoaga, ko e tau manako he tagata fakaako ke hagaaki ke he mena kua fakaako e ia. Ke taute pihia, fakamaama e aoga ke mautauteute a ia ma e tau magaaho fakaako takitaha he totou tuai e matakupu mo e manamanatu ke he puhala ka fakagahua e ia e mena ne iloa e ia. Lagomatai fēfē he faiaoga? Tauteute tokoua e fakaakoaga mo e tagata fakaako ke fakakite ki a ia e puhala ke taute e mena nei.d Fakamaama e puhala ke moua e tau tali ke he tau hūhū he fakaakoaga, ti fakakite e puhala ke fakamailoga ni he tau matapatu kupu po ke tau talahauaga ka lagomatai a ia ke manatu e tali. Ti tala age ki a ia ke tali ni he tau kupu haana. Ka taute pihia e ia, to maeke a koe ke iloa mitaki e lahi he maama haana ke he vala tala. Ka e fai mena foki ka fakamafana e koe ke taute he tagata fakaako haau.
FAKAAKO A IA KE MATUTAKI MO IEHOVA HE TAU AHO TAKITAHA
Fakaako ke he tagata fakaako Tohi Tapu e puhala ke matutaki mo Iehova (Kikite paratafa 10-11)
10. Ko e ha kua aoga ke totou e Tohi Tapu he tau aho takitaha, mo e ko e heigoa kua lata ke moua mai he totouaga Tohi Tapu?
10 Lafi ke he tau fakaako he tau faahi tapu takitaha mo e faiaoga haana, to aoga ke he tagata fakaako he taute ne ia e falu mena he tau aho takitaha. Lata a ia ke matutaki mo Iehova. Fēfē? He fanogonogo mo e tutala ki a Iehova. Fanogonogo a ia ke he Atua he totou e Tohi Tapu he tau aho takitaha. (Iosua 1:8; Sala. 1:1-3) Fakakite ki a ia e puhala ke fakaaoga e “Setulu Totou Tohi Tapu” i loto he jw.org.e Mooli, ke lagomatai a ia ke lahi e mena ke moua mai he totou Tohi Tapu haana, fakamafana a ia ke manamanatu fakahokulo ke he mena kua fakaako he Tohi Tapu a ia hagaao ki a Iehova mo e puhala ke fakagahua e ia e mena kua fakaako ke he moui haana.—Gahua 17:11; Iako. 1:25.
11. Maeke fēfē e tagata fakaako ke liogi fakamitaki, ti ko e ha kua aoga ki a ia ke liogi tumau ki a Iehova?
11 Fakamafana e tagata fakaako haau ke tutala ki a Iehova he liogi he tau aho takitaha. Liogi mai he loto he kamata mo e matahiku he tau magaaho fakaako takitaha, he liogi tokoua mo e ke lata ma e tagata fakaaako haau. He fanogonogo a ia ke he tau liogi haau, to fakaako a ia ke he puhala ke liogi mai he loto haana mo e foaki fakamooli e tau liogi haana ki a Iehova ko e Atua he higoa ha Iesu Keriso. (Mata. 6:9; Ioane 15:16) Manamanatu ke he puhala ke totou e Tohi Tapu he tau aho takitaha (fanogonogo ki a Iehova) mo e liogi (tutala ki a Iehova) to lagomatai e tagata fakaako haau ke fakatata lahi ke he Atua! (Iako. 4:8) He feaki e tau aga nei to lagomatai e tagata fakaako haau ke moua falu mena ka takitaki atu ke he tukulele mo e papatiso.
LAGOMATAI A IA KE FEAKI E FAKAFETUIAGA TATA MO IEHOVA
12. Lagomatai fēfē he faiaoga e tagata fakaako ke feaki e fakafetuiaga mo Iehova?
12 Ko e mena kua iloa he tagata fakaako he fakaakoaga Tohi Tapu kua lata ke hokotia ke he manamanatuaga haana ti pihia foki ke he loto haana. Ko e ha? Ha ko e tau loto ha tautolu ne putoia e tau manako mo e tau logonaaga kua omoomoi a tautolu ke taute taha mena. Fakaaoga e Iesu e fakakakano ne mitaki ke hokotia ke he manamanatuaga. Ka e mumui e tau tagata ki a ia ha kua fakalagalaga foki e ia e tau loto ha lautolu. (Luka 24:15, 27, 32) Lata e tagata fakaako haau ke kitia a Iehova ko e Atua mooli, lata ke feaki e fakafetuiaga tata mo Ia, ti eke a Ia mo Matua, Atua, mo e Kapitiga haana. (Sala. 25:4, 5) He magaaho fakaako Tohi Tapu, hagaaki ke he tau aga mitaki he Atua. (Esoto 34:5, 6; 1 Pete. 5:6, 7) Taute e mena nei he tau matakupu takitaha kua fakatutala ki ai he hagaaki ke he tau mahani ha Iehova. Lagomatai e tagata fakaako ke loto fakaaue ke he tau mahani mitaki ha Iehova—ko e haana fakaalofa, totonu, mo e fakaalofa hofihofi noa. Pehē a Iesu ko e “poaki fakamua hanā mo e lahi” ke “fakaalofa a koe ke he Iki [Iehova] hau a Atua.” (Mata. 22:37, 38) Lali ke fakatupu e fakaalofa hokulo ma e Atua he loto he tagata fakaako haau.
13. Talahau e fakatai ke he puhala ke lagomatai e tagata fakaako ke iloa e aga ha Iehova?
13 He tau fakatutala haau mo e tagata fakaako, fakakite e tau logonaaga hokulo haau ma Iehova. Maeke e mena nei ke lagomatai e tagata fakaako haau ke mailoga kua lata ke feaki ne ia e fakafetuiaga mafanatia haana mo e Atua. (Sala. 73:28) Ma e fakatai, fai talahauaga nakai he tohi fakaako po ke kupu tohi kua fakakite taha mena hagaao ke he fakaalofa, pulotu, fakafili tonu, po ke malolō ha Iehova kua aamotia e loto haau? Tala age e mena ia ke he tagata fakaako, ti fakailoa ki a ia ko e taha anei he tau kakano loga ne fakaalofa a koe ke he Matua ha tautolu he lagi. Fai mena foki e tau tagata fakaako Tohi Tapu takitaha ke taute ke holo atu ke papatiso.
FAKAMAFANA A IA KE FANO HE TAU FELEVEIAAGA
Fakamafana e tagata fakaako ke kamata ke fano fakamafiti ke he tau feleveiaaga! (Kikite paratafa 14-15)
14. Ko e heigoa he Heperu 10:24, 25 kua tala mai ki a tautolu hagaao ke he tau feleveiaaga ka lagomatai e tagata fakaako Tohi Tapu ke holo ki mua?
14 Manako oti a tautolu ke he tau tagata fakaako Tohi Tapu ke holo atu ke papatiso. Taha puhala aoga ka lagomatai e tautolu a lautolu he fakamafana ki a lautolu ke ō ke he tau feleveiaaga. Ko e tau faiaoga lotomatala ne pehē ko e tau tagata fakaako ne o atu ni he mogoia ke he tau feleveiaaga kua mafiti lahi e holo ki mua. (Sala. 111:1) Falu faiaoga ne fakamaama ke he tau tagata fakaako to moua e lautolu hafa e fakaakoaga he Tohi Tapu mai he fakaako mo e hafa mai he tau feleveiaaga. Totou e Heperu 10:24, 25 mo e tagata fakaako haau, ti fakamaama ki a ia e tau fua mitaki ka moua e ia he fano ke he tau feleveiaaga. Tā e vitiō Ko e Heigoa ne Tupu he Fale he Kautu?f Lagomatai e tagata fakaako haau ke eke e fano ke he tau feleveiaaga he tau faahi tapu takitaha mo vala uho he moui haana.
15. Ko e heigoa ka taute e tautolu ke fakamafana e tagata fakaako ke fano tumau he tau feleveiaaga?
15 Ko e heigoa ka taute e koe ka nakaila fano e tagata fakaako he feleveiaaga po ke nakai fano tumau? Tala age fakamakutu e mena kua fakaako e koe he feleveiaaga kua mole. Fakalagalaga lahi e mena ia he nakai ni uiina e tagata fakaako ke fano. Age ki a ia e Kolo Toko po ke Life and Ministry Meeting Workbook kua fakaako e tautolu mogonei he feleveiaaga. Fakakite ki a ia e mena ka fakatutala he feleveiaaga he faahi tapu kahau, ti hūhū ki a ia ko e vala fe kua fiafia lahi a ia ki ai. Ko e mena kua iloa he tagata fakaako he feleveiaaga fakamua haana kua mua atu e mitaki ke he ha mena ne iloa e ia he falu fakalatahaaga fakalotu. (1 Kori. 14:24, 25) To feleveia a ia mo e falu ne mitaki e fakafifitakiaga ka muitua e ia mo e ka lagomatai a ia ke holo atu ke papatiso.
16. Ko e heigoa kua lata ke taute he tau fakaakoaga Tohi Tapu kua takitaki atu ke papatiso, ti ko e heigoa ka fakaako e tautolu he vala tala ka mui mai?
16 Taute fēfē e tautolu e tau fakaako Tohi Tapu kua takitaki atu ke papatiso? Maeke ia tautolu ke lagomatai e tau tagata fakaako Tohi Tapu takitaha ke eke e fakaakoaga mo mena kua mua e aoga he fakamafana a ia ke fakaako tumau he tau faahi tapu takitaha mo e tauteute ke lata mo e tau magaaho fakaako takitaha. Manako foki a tautolu ke fakamafana a ia ke matutaki mo Iehova he tau aho takitaha mo e feaki e fakafetuiaga tata mo Ia. Manako a tautolu ke fakalagalaga e tagata fakaako ke fano ke he tau feleveiaaga. (Kikite puha “Mena kua Lata he Tau Tagata Fakaako ke Taute ke Holo Atu ke Papatiso.”) Ka e to fakamaama he vala tala ka mui mai lima foki e mena ka taute he tau faiaoga Tohi Tapu ka takitaki atu e tau tagata fakaako ke papatiso.
LOLOGO 153 Fēfē e Logonaaga Haau?
a Ke fakaako e taha mena ke he tagata kua kakano ke lagomatai a ia ke “manamanatu, logona hifo, po ke mahani he puhala foou.” Ko e lauga he tau 2020, he Mataio 28:19 kua fakamanatu ki a tautolu e aoga he fakaako e Tohi Tapu mo e tau tagata mo e fakamahani a lautolu ke eke mo tau tutaki papatiso ha Iesu Keriso. He vala tala nei mo e vala tala ka mui mai, to kitia e tautolu e puhala ke holo ki mua he gahua aoga lahi nei.
b FAKAMAAMA E TALAHAUAGA: Ka taute tumau mo e fakapapahi e koe e fakatutalaaga he fakaaoga e Tohi Tapu, kua taute e koe e fakaako Tohi Tapu. Liga fakamau hifo e koe e fakaakoaga ka fakakite e koe e puhala fakaako ke he tagata ti lagaua he taute e fakaakoaga mo e ka talitonu a koe to matutaki e fakaakoaga.
c Ko e tau vala tala nei kua putoia foki e tau manatu mai he Ha Tautolu a Fekafekauaga he Kautu ia Iulai 2004 ki a Me 2005, tau fufuta he “Taute e Tau Fakaakoaga Tohi Tapu Holo ki Mua.”
d Kitekite ke he vitiō ne fā e minuti Teaching Our Students to Prepare. He JW Library®, fano ke he MEDIA > OUR MEETINGS AND MINISTRY > IMPROVING OUR SKILLS.
e Fano ke he BIBLE TEACHINGS > BIBLE STUDY TOOLS.
f He JW Library®, fano ke he MEDIA > OUR MEETINGS AND MINISTRY > TOOLS FOR THE MINISTRY.