Tau Mena Tutupu Mai he 2011 Yearbook
Tau Puhala Kehekehe ke Fakamatala he Magaaho Noa
Ko e tau matakainaga vagahau Rusia ko e tau tagata malolō mo e fakamakutu he fakamatala ti nakai fakauaua ke tutala ke he tau tagata he tau magaaho noa. Ma e fakatai, kamata e lautolu e tau fakatutalaaga mo e tau tagata o evaeva ne ahiahi ke he tau tapu i Tallinn ti fakamatala ki a lautolu. Fa mahani e tau tagata o evaeva ke manatu ko ia ne tutala hagaao ke he Tohi Tapu ko e tagata uta fenoga fakakitekite, ti fanogonogo fakamakutu a lautolu ke he haana tau talahauaga.
Ne fakamatala falu matakainaga fifine he tau leluē. Fakatau e lautolu e tiketi leluē ke o viko he vahaloto a Tartu mo Tallinn. Ko e fenoga valu tulā ne lahi e magaaho kua moua e lautolu ke kamata e tau fakatutalaaga mo e fakailoa e tala mitaki ke he tau pasese.
“Ne liogi au ke moua taha fakaako Tohi Tapu,” he talahau e Maria Pasechnick, ne hiki mai i Kazakhstan ki Estonia. Fai magaaho he manamanatu, ne fifili a ia ke fakamatala ke he tau tagata ne fakatali fakalataha mo ia he tau laini loloa ke fakatau mena kai he tau fale koloa he matakavi.
“Taha aho, he tu he laini,” he matutaki e Maria, “ne kamata au ke tutala mo e fifine ti fakahihiga atu e fakatutalaaga ke he Tohi Tapu. Ne nakai fiafia lahi e fifine nei, ka e uta e ia au ke he tau kapitiga haana, fakafeleveia au ki a lautolu, ti toka au ke matutaki e fakatutalaaga mo lautolu. Ko e fua, ne maeke au ke kamata fā e fakaako Tohi Tapu. Kua papatiso taha he tau fifine mo Fakamoli ti tumau agaia ke fekafekau mo e tua ki a Iehova.”
Ti mooli ke he tau matakavi oti, kua tokologa e tau fekafekau ha Iehova ne kitia maali ko e fakafifitakiaga mitaki he tau gahuaaga ha lautolu. Ma e fakatai, ko e takitaki Matakau Kominisi he fale gahua hila ne fakakite e manatu kua nakai lata a Leonhard Nilsk ke gahua he kamupanī ha ko ia ko e tagata lotu. Ka kua vagahau hake e takitaki he faahi kumikumi he fale hila mo e pehē, “Kua lata lahi kia ia tautolu ke moua e tau tagata Kominisi ne inu kava ti nakai taute fakamooli e tau gahua, ke he tagata lotu kua talahaua ha ko e mahani fakamooli?” Ko e falu kapitiga gahua ha Leonhard ne lalago ki a ia ha ko e tuaga mitaki haana, ti fakaoti noa e mena ia. Kua maali ai ko e takitaki matakau kua lali ke fakakapitiga ke he tau takitaki lalahi he matakau, ka ko e magaaho ne fakaoti ai e pule Kominisi ki Estonia, ko e fifine ne takitaki e matakau kua galo foki haana gahua.
Fakamatala ka e Pā e Gahua
“Magaaho ne fano au he aoga,” he manatu e Lembit Reile, ko e taha ne fekafekau mogonei he La Komiti i Estonia, “ne tutala fakaeneene au ke he tokologa he tau kapitiga aoga haaku. Fa mahani au ke uiina taha he tau tama taane ke he kaina haaku, ti fakamatala mo e iloilo au ki a ia. He mole e oti au mo e aoga, ne ai kitia e au a ia ke he 20 e tau tau. Magaaho kū kua mole, ne lauga au ke he fakapotopotoaga he taone ne tupu hake au, ti tali manatu la ko hai taha he toloaga? Ko e kapitiga aoga haaku! Hane fakaako a ia mo e Tau Fakamoli a Iehova, ti nakai leva e mole he aahi atu haaku, ne papatiso a ia! Ko e fiafia ha ia ki a au!”
Ha kua pā e gahua ha tautolu, ne lata ni e tau matakainaga ke mataala ka fakamatala. Taha e motua ne fakamaama e puhala ha lautolu ne taute aki: “Ne fai magaaho a mautolu ke kitekite ko e tau vahega tagata fēfē kua takatakai ia mautolu mo e ko hai ka hagahaga mitaki a mautolu ke kamata tutala ki ai. Kua lata lahi a mautolu ke fakailoilo ka tutala ke he tau tagata kehe. Fai magaaho he mole, kua maeke ia mautolu ke mailoga e tagata kaeke ko ia ko e tagata fakagalogalo he KGB. Pihia foki, kaeke ko e tagata talatala tumau po ke fakahoha, ne mahalohalo a mautolu. Ke he taha faahi, liga mitaki ke tutala ke he tagata ne nofo fakaeneene. Mahani a mautolu ke kamata e tau fakatutalaaga mo lautolu ne nakai lalago e fakatufono Kominisi—ne fakahigoa ko e matakau vevehe kehe—ne fa tokanoa e tau manatu ha lautolu.”