Tau Mena Tutupu Mai he 2011 Yearbook

Tau Hoa Paionia Fuata Ikiiki

Ko e tama fifine ko Persis ne nofo i Cameroon, kua eke a ia mo tagata fakailoa nakaila papatiso he magaaho ne ono ai haana tau. Ko e hokotaki fakamua haana ke he gahua he fonua kua fakakite ai hogofulu e fakaako Tohi Tapu. Tuahā e tohikupu he fakapotopotoaga kua fai mena ne hepe. Ko e magaaho ne hūhū ai ki a Persis ne fakamaama e ia ko e mena toko hogofulu haana a tagata fakaako kehekehe. Ti fakalaulahi atu haana hūhū pehē: “Iloa fēfē e koe e lahi he magaaho ke hokotaki, ha ko e mena nakai fai uasi a koe?” Tali e ia na iloa e ia ko e mena taha e tulā he loa he magaaho okioki he aoga haana. Kamata a ia ke fakamatala he kamataaga ti oti ka ta e logo. Ko e malolō he gahua fakamatala haana kua lauia ai haana matua fifine mo e haana kasini, ha kua hoko ke he magaaho fakamui kua eke a laua mo tau tagata fakailoa nakaila papatiso. Ko Persis he magaaho nei kua hogofulu e tau ti papatiso a ia mo e fekafekau ko e paionia fakakū ka e fano agaia he aoga. Ko e kapitiga haana ko Aasy ne valu e tau kua fitā he eke mo tagata fakailoa nakaila papatiso. Ne pehē e tagata fakaako Tohi Tapu hagaao ki a laua: “He tau feleveiaaga, ne fiafia au ke kitia e tau fanau hane fakafeleveia ke he tau matakainaga oti, mua atu ki a lautolu ne momotua, ato o ke nonofo mo e tau mamatua ha lautolu. Nakai kitia e au e mena nei he fale tapu haaku. Iloa e au ko e tau fanau ne feaki hake pihia to eke a lautolu mo tau tagata mitaki he kaufakalatahaaga he vahā i mua.”

Nakai Nokonoko a Ia

Ko Miriam ne nofo i Polivia, ne taha e faahi tapu he liogi ke he Atua. Pehē e liogi haana: “Fakamolemole lagomatai au ke iloa a koe, ka e nakai manako au ke lagomatai mai he Tau Fakamoli a Iehova. Nakai manako au ke nokonoko mai e lautolu haaku gutuhala.”

He matahiku he faahi tapu ia, ne tagi e telefoni. Ko Candy, ko e paionia pauaki, ne ole ke fina atu he kavi ke he taha e tulā ke uta e tau mekasini ha tautolu ki a Miriam. Ne talia e ia. Nakaila katoa e tulā ka kua hoko atu a Candy ke he gutuhala haana. Ne amanaki ni a Miriam ti hafagi e gutuhala ti poaki ki a Candy ke hau ki loto ti nofo hifo. Ti kamata a Miriam ke fano viko he lotofale mo e lue e ulu, maaliali ai kua tupetupe lahi a ia. Ne hūhū a Candy ki a ia ko e heigoa e lekua. “Ofo lahi mahaki au!” he talahau e Miriam. “Kua molea e faahi tapu he liogi au ke he Atua ma e takitakiaga mo e lagomataiaga haana, ka e fakamahino e au he tau liogi haaku kua nakai manako au ke moua mai e lagomataiaga he Tau Fakamoli a Iehova ne fa nokonoko tumau e gutuhala haaku! Ti hea mai a koe he telefoni ka e ai nokonoko! Tali he vilo mai a koe ke he taha e tulā kua mole, ko e feiga au he liogi ke he Atua ke ua hau a koe ke ahiahi mai. Ka e hoko mai na koe! Kua ofogia au! Maaliali ni kua manako a ia ki a mutolu, ko e Tau Fakamoli a Iehova, ke lagomatai au.” Ne kamata agataha e fakaako Tohi Tapu.

Ne Toka e Lautolu a Ia ke Mate

Ko Pasensi ko e takitaki maaga talahaua fakamua, po ke kapiten, i Suriname ti tata lahi a ia ke he granman​—ko e takitaki pule, po ke patuiki​—he matakavi katoa he vailele he lotouho he motu. Ne puipui fakalahi e Pasensi e tau aga fakamotu. Totoko a ia ke he Tau Fakamoli a Iehova ha kua manatu to fakalavelave a lautolu ke he tau aga fakamotu.

Fai magaaho, taha e fuata taane ne pehē na maeke a ia ke kitia e tau tagata taute taulatua he maaga. Tokologa ne mumui atu ki a ia he tau vaka ha lautolu he vailele mo e keli a lautolu ne kua tukumale mo e fofō e tau koloa oti ha lautolu. Ne lahi e tupe ke totogi mo e “fakameā” aki a lautolu ne tukumale ne pehē kua hufia he agaaga kelea. Ko e taha mai he tau tagata tokologa ne keli noa ti toka ke mate, ko Pasensi. Nakai maeke foki e kapitiga haana ko e granman ke lagomatai a ia, he matakutaku neke lauia haana moui mo e tuaga kaeke kua lalago taha ne kua tukumale ki ai e gahua taulatua. Kua fakatapu e tau kapitiga mo e tau magafaoa ke foaki ha lagomatai. Pete ia, ne fakamalolō e figona taane ha Pasensi mo e uta a ia ke he maaga ne nonofo ai tokologa e Tau Fakamoli a Iehova. Ne tutala e tau matakainaga taane ke he matakupu, mo e iloa foki e tuaga hagahaga kelea ki a lautolu, ti fifili ni ke lagomatai. Ne fakatokatoka e lautolu ke uta he vaka a Pasensi ke he maaga tata mai ne gahua ai taha matakainaga taane, ko e takitaki gahua he malē vakalele. Mai i ai, ko e tagata totoko fakamua nei kua uta he vakalele ke he taone ke tului e tau kafokia.

Ko Pasensi kua malolō mai he tau kafokia haana kua omoomoi he fakaalofa ne fakakite age he tau tagata ne totoko lahi e ia fakamua. Kamata a ia ke fakaako e Tohi Tapu ti papatiso ia Tesemo 2009. Ko Pasensi he magaaho nei ko e tagata makutu lahi he fakamatala e tala mitaki, ka e pete ni kua 80 haana tau, ne paionia fakakū a ia ia Aperila 2010.

Manatu na Ia Kua Iloa e Ia e Tohi Tapu

Ko e tagata hafe tupu ne higoa ko Eric ne fina atu ke he feleveiaaga he fakapotopotoaga he Tau Faahi Kaufakalataha mo e taha e Tohi Tapu ne totō. He mogo ne fakafeleveia atu e taha matakainaga taane ki a ia, ne kamata a Eric ke hūhū hagaao ke he tau taofiaga ha tautolu. Ne ai talia e ia e tohi Fakaako he Tohi Tapu, he manako ni ke fakaaoga e Tohi Tapu. Ko e fakaholoaga totou Tohi Tapu haana ko e 20 e lau he aho, kua lagaloga he totou e ia e Tohi Tapu katoa, ka e ai manatu ko e lagafiha. He oti e feleveiaaga, ne matutaki e fakatutalaaga haana mo e matakainaga ke he molea e tolu e tulā. He oti e aahi atu, ne pehē a Eric, “Fia gagao au.” Hūhū e matakainaga ha tautolu ko e ha. Tali a Eric: “Mauokafua au na iloa lahi e au e tau Tohiaga Tapu. Ka e mole e ahiahi nei kua mailoga e au, nakai iloa oti e au.” Ne talia mogoia e ia e tohi Fakaako he Tohi Tapu.

He aho hake, ne kamata e fakaako fakamua ha laua. Ne ala a Eric he po fakamua mo e totou e tau veveheaga hogofulu fakamua he tohi Fakaako he Tohi Tapu. Ko e talahauaga haana? “Kua moua tuai e au e kupu mooli!” Ne fakaako a laua tolu ke he fā e tulā he aho, lima e aho he faahi tapu. Kamata a ia ke tauteute ke lata, mo e fakalataha atu ke he tau feleveiaaga oti mo e magafaoa katoa haana. Nakaila oti e faahi tapu fakamua, ne tohi e ia e tau tohi ke fakaoti mai mo e tolu e lotu kehekehe, hifi e hafe haana, ti fifili a ia ke ua fakamanatu e tau aho okioki. Nakai oti e ua faahi tapu ne matutaki a ia ke he Aoga Fekafekau Fakateokarasi, ti nakai oti e faahi tapu ke fāaki ne eke a ia mo tagata fakailoa nakaila papatiso. Ne papatiso a ia ia Aperila 2010, ono ni e mahina mai he magaaho ne feleveia fakamua a ia mo e Tau Fakamoli a Iehova!

Papatiso he Fitu e Tau

Ko Paola ne nofo he faahi lalo i Mesikō, ne feaki he tau matua tupuna haana. Ne kamata e tupuna fifine haana ke fakaako Tohi Tapu mo e Tau Fakamoli a Iehova he magaaho ne lima e tau ha Paola. Ne fanogonogo a Paola, ti tupu hokohoko e kupu mooli ke he loto mui haana. Pete he nakai holo ki mua e tupuna fifine haana, ne kamata a Paola ke fina atu tokotaha ke he tau feleveiaaga. Ne ole a ia ke he tau mamatua tupuna haana ke lagomatai a ia ke tauteute mo e lagomatai ke fina atu ke he taha faahi he puhalatū ke hoko atu ke he Fale he Kautu.

Ko e magaaho ne iloa a ia ke totou mo e tohi, ne matutaki a Paola ke he Aoga Fekafekau Fakateokarasi ti eke a ia mo tagata fakamatala nakaila papatiso. Ha ko e haana fakaalofa ma Iehova, ne papatiso a ia he fitu e tau. Magaaho ne hūhū ki a ia ko e ha ne fina atu ai ke he tau feleveiaaga mo e makutu he fakamatala, pete he ai fakalataha e magafaoa haana, ne tali e Paola kua hogofulu e tau mogonei: “Manako lahi au ke he tau lauga ha kua fakamalolō mai au ke fakaako tumau e Tohi Tapu mo e kalo kehe mai he tau mena kelea. Ti fakamatala atu au ha kua manako au ke fakaako e tau tagata ke he mena ka taute e Iehova ma lautolu anoiha mo e na maeke he Tohi Tapu ke fakafiafia a lautolu mogonei.”