Tau Mena Tutupu Mai he 2011 Yearbook
PAPUA NIU KINI
Lau 124, paratafa 1-2
“Kua lagomatai ai ke iloa ko e Tau Fakamoli,” he talahau he tau misionare ko Adrian mo Andrea Reilly. “He fakatau po ke fakamatala a koe, kua aoga ke uta e tau tohi,” he ui e Adrian. “Pete ia, nakai mavehe mooli he mena nei e puipuiaga haau, ka e liga maeke ai ke lagomatai ha kua fakakite ai ko koe e fekafekau ha Iehova. He taha magaaho, ne malona e motokā haaku he faahi nakai mitaki ha Lae. Kua tokotaha ni au ti nakai leva ne agaagai mai e kege he tau fuata mata vale. Fakaaue ke he fakatutalaaga Tohi Tapu ne nakaila leva ia e taute e mautolu, ne tokoua ia lautolu ne mailoga au. Ti ko e fua, ne vagahau hake a laua ke lata mo au. He nakai kaihā ha mena po ke fakapakia au, ko e matakau katoa—ne ofo mo e totoka a au—ne omoi e motoka haaku ne mate ke he kuata e maila he liuaki ke he kaina misionare.”
He taha tuaga foki, ko e matakainaga fifine ha ha he makete he mogo he matakau raskol ne fai titipi ne fanafana ki a ia, “Mai e katoa haau ki a mautolu.” Ne age agataha ai e ia, ti fehola a lautolu. Fai minuti he mole, ne liliu mai a lautolu, fakamolemole age, ti liuaki e kato ne toka ai e tau mena oti i loto. Ko e ha? He hafagi e lautolu e kato, ne kitia e lautolu e Tohi Tapu mo e tohi Reasoning he matakainaga fifine ti fuafuakelea ke he mena ne taute e lautolu.
Latau Fakamatakau i Bougainville
Lau 150, paratafa 1-6
He 1989 ke he Aelani ko Bougainville, ko e manako kua galo fakahaga he tagata kua leva e fakaoti mai mo e fakatokaaga, ne liu fakatupu e latau fakamatakau lahi. He 12 e tau ne felakutaki ai, kavi ke he 60,000 tagata ne nakai fai kaina ti 15,000 ne mamate. Fakalataha mo lautolu ne nakai fai kaina ko e tau tagata fakailoa tokologa, ne laulahi ne liu nonofo he falu faahi ha Papua Niu Kini.
Nakai leva to toka e ia e aelani, ko Dan Ernest ko e paionia, ne tapaki he tau kautau Bougainville Revolutionary Army (BRA) mo e uta ke he fale lahi ne toka koloa. Ne manatu e Dan: “I loto he BRA ko e takitaki kautau ne tui e taute kautau ne puni he tau pine ti taha e pelu he faahi haana.
“‘Ko koe kia ko Dan Ernest?’ he ui e ia.
“‘E,’ he tali e au.
“‘Ne logona e au a koe ko e tagata toko ma e Defence Force ha Papua Niu Kini,’ he fakailoa e ia.
“Ne kamata au ke fakamaama ko e Tau Fakamoli a Iehova kua nakai fakalataha ke he tau felakutaki he ha motu, ka e fakatauhele e ia mo e pehē: ‘Iloa e mautolu! Hane kitekite a mautolu. Ko e falu lotu kua lalago ha tagata ne liga mua. Ko e lotu ni ha mutolu kua fakatumau e tuuho katoatoa.’ Ti lafi e ia: ‘Ko e tau tagata ha mautolu kua lauia kelea ke he tauaga nei mo e lata ke moua e ogo mafanatia ha mutolu. Manako a mautolu ki a mutolu ke nonofo i Bougainville mo e fakatumau ke fakamatala. Kaeke ke ō a mutolu, to eketaha au, ko e tau koloa oti ha mutolu to hoko atu mo e nakai fai lekua.’ Ua e faahitapu he mole, ko e hoana haaku mo au ne hiki ke he kotofaaga paionia foou he Aelani ko Manus, ne fakamooli e takitaki kautau ke he kupu haana.”