Fakatolomaki ki Mua e Lotomatala Haau he Fekafekauaga​—Tali ke he Tau Manatu Taofi Tala

Kakano kua Aoga Ai: Manamanatu la kaeke kua iloa e koe, ko e tupu hane fai taha matematekelea. To mamate e tau tagata ka nakai fehola a lautolu ke moua e haohao mitaki. Fano a koe ke he kaina he katofia haau mo e fakailoa age, ka e fakalavelave ne ia a koe mo e pehē kua lavelave lahi a ia. Ka e liga mooli, to nakai mafiti a koe ke tiaki e tau laliaga haau ke lagomatai a ia! Tokologa he fonua ha tautolu ne fuluhi kehe, nakai mailoga e kakano uho he fekau laveaki-moui ha tautolu. Ko e magaaho ne aahi atu ai a tautolu, liga kua lavelave lahi a lautolu. (Mata. 24:37-39) Po kua fakavaia he tau tala nakai mooli a lautolu. (Mata. 11:18, 19) Liga kua tali manatu na lautolu kua nakai fai kehe a tautolu mo e tau lotu ne tupu mai ai e tau fua kelea. (2 Pete. 2:1, 2) Kaeke kua ai fiafia e tagata he kaina he kamataaga, a koe neke mafiti ke tiaki a ia.