MOUI KO E TAU KERISIANO

Vala Foou he Feleveiaaga he Vahā Tapu

Kamata ia Ianuari 2018, ko e feleveiaaga he vahā tapu to putoia e study notes mo e media mai he fufuta fakaako he New World Translation of the Holy Scriptures (nwtsty) i loto he initanete, pete kua nakaila moua e study edition ke he vagahau ha mutolu. To fakahokulo he tau vala tala nei e tauteuteaga ha mutolu ma e feleveiaaga. Mua atu, kia fakatata lahi atu a mutolu ke he ha tautolu a Matua fakahele ko Iehova!

STUDY NOTES

Haia he study notes e fakamaamaaga he tau aga fakamotu, tau matakavi, mo e tau vagahau hagaao ke he loga e tau kupu Tohi Tapu.

Mataio 12:20

Vavae ne puho tote: Ko e lamepa he lupo tote kua puke he lolo olive ne fakaaoga lahi he tau kaina. Mimiti hake he vavae e puke lolo ke puho ai. Ko e talahauaga Heleni ke he “vavae ne puho tote” ne liga hagaao ke he vavae ne ahua he kakā agaia, ka e nakai puho po ke nakai mate e mulamula afi. Ko e perofetaaga he Isaia 42:3 ne talahau tuai e fakaalofa hofihofi ha Iesu; to nakai tamate e ia e kakā fakahiku he amaamanakiaga he tau tagata fakatokolalo mo e matematekelea.

Mataio 26:13

Ko e moli: He faka-Heleni a·menʹ, ko e fakaliliuaga he kupu Heperu ʼa·menʹ, ne kakano “kia pihia ni,” po ke “moolioli.” Fakaaoga tumau e Iesu e tau kupu nei ke hafagi aki e talahauaga, maveheaga, po ke perofetaaga, ke peehi e fakamooliaga mo e mauokafua katoatoa. Fakaaoga e Iesu e tau kupu “ko e moli,” po ke amene he puhala nei ne kehe pauaki he tau tohiaga tapu. Ka fatiaki tumau (a·menʹ a·menʹ), tuga i loto he Evagelia ha Ioane, ko e talahauaga ha Iesu ne fakaliliu “ko e moli, ko e moli.”—Ioa 1:51.

MEDIA

Ko e tau ata, tau fakatino vali, mo e tau vitiō nakai fai leo mo e tau fakatino fakataitai ne fakakite e tau vala tala matafeiga ne fakamau he Tohi Tapu.

Petefake, ke he Mouga ko Olive, mo Ierusalema

Ko e vitiō kū nei ne fakakite e puhala ti hoko atu ki Ierusalema mai he faahi uta, he vahā nei ko e maaga et-Tur—ne liga tatai ki a Petefake he Tohi Tapu—ko e taha he tau tapunu tokoluga ke he Mouga ko Olive. Ko Petania ne haia he faahi uta ha Petefake he katofia he faahi uta he Mouga ko Olive. He ha ha a Iesu mo e tau tutaki haana i Ierusalema ne fa mahani a lautolu ke taha e pō he nonofo i Petania, ne tū ai he vahā nei e taone ha el-ʽAzariyeh (El ʽEizariya), ko e higoa Arapi ne kakano “Ko e Maaga ha Lasalo.” Nofo mooli a Iesu he kaina ha Mareta, Maria, mo Lasalo. (Mat 21:17; Mar 11:11; Luk 21:37; Ioa 11:1) He fenoga mai he kaina ha lautolu ki Ierusalema, liga fano a Iesu he puhala ne tuga e puhala ne fakakite he vitiō. He Nisana 9, 33 V.N., ne heke a Iesu he punua asini he fina atu he hala he Mouga ko Olive ki Ierusalema, liga taute pihia e ia mai i Petefake, he fina atu he puhala ki Ierusalema.

Puhala mai i Petania ki Petefake
Petefake
Mouga ko Olive
Pahua ko Ketarono
Faituga he Mouga

Fao he Huimotua he Muihui

Ko e ata nei ne poki mai he huimotua he muihui he tagata ne pao aki e fao lapatoa ne 11.5 e senetimita (4.5 e inisi) he loa. Ko e fakatino fakamua ne moua he 1968, magaaho ne keli hake ai he faahi tokelau ha Ierusalema, ne moua he magaaho ha Roma. Fakamooli mai he tau keliaga kelekele ko e tau fao kua tuga ne fakaaoga ke pao e tagata ke he pou. Ko e fao nei ne liga tatai mo e tau fao ne fakaaoga he tau kautau Roma ke pao aki a Iesu Keriso ke he akau. Moua e fakatino nei he puha maka puga ne fafao ai e tau huimotua magomago he tagata mate ne kua nakai fai vala kakano. Fakakite he mena nei ko e tagata ne tamate he pao ke he akau kua maeke ke fai tanuaga.—Mat 27:35.