Fēfē e puhala kua fakatoka e koe ma e fanau haau ke mumui ki ai?
MA E TAU MATUA
8 Fakafifitakiaga
KO E KAKANO
Ko e tau matua ne fakatoka e fakafifitakiaga kua momoui fakatatau ke he tau mena ne fakaako e lautolu. Tuga anei, nakai amanaki a koe ke he tama haau ke talahau e mena mooli ka logona e ia a koe ne pehē, “Tala age, ai nofo au i kaina,” ka nakai manako a koe ke tutala ke he tagata he gutuhala.
“Ko e tala fa mahani, ‘Taute e mena ne tala atu e au, ka e nakai tuga he taute e au.’ Kua nakai gahua e puhala ia mo e tau fanau. Tuga e tau omomi e fanau ne mailoga e tau mena oti kua talahau mo e taute e tautolu, ti tala mai ai ka nakai tatai e fakafifitakiaga mo e tau mena ne lali a tautolu ke fakaako ki a lautolu.”—David.
MATAPATU FAKAAKOAGA HE TOHI TAPU: “Ko koe kua fakamatala atu, Ua kaiha, kua kaiha kia a koe?”—Roma 2:21.
KAKANO NE AOGA
Ko e tau fanau mo e tau fuata mui kua lahi mahaki e fakaohooho he tau matua ha lautolu, nakai mai he falu mo e tau kapitiga foki ha lautolu. Ko koe mogoia he tuaga pauaki ke takitaki e tau fanau ke he puhala hako—mua atu e puhala ke fakagahua e mena ne talahau e koe.
“Maeke a tautolu ke fatiaki lagaloga e taha mena ti tuga kua nakai fanogonogo e tama, ka e lagataha ni e nakai taute e tautolu e mena ne talahau e tautolu, to fakakite mai he tama. Kitia he fanau e tau mena oti kua taute e tautolu, pete ka manatu a tautolu kua nakai pihia.”—Nicole.
MATAPATU FAKAAKOAGA HE TOHI TAPU: “Ko e iloilo mai luga, kua . . . nakai fakatupua.”—Iakopo 3:17.
MENA KE TAUTE E KOE
Onoono ke he tau mahani ni haau. Ko e heigoa e tau fakafiafiaaga ne kitekite e koe? Fēfē e mahani haau ke he hoa mo e fanau? Ko hai e tau kapitiga haau? Manamanatu nakai a koe ke he falu? Ke fakakū, manako kia a koe ke he tau fanau haau ke tuga a koe?
“Ko e taane haaku mo au ne nakai fekau e fanau ke mumui he puhala ne nakai muitua a maua ki ai.”—Christine.
Fakamolemole ke he tau hehē haau. Fitā e iloa he fanau haau kua nakai mitaki katoatoa a koe. He pehē, “Fakamolemole lahi au” ka latatonu, ke he hoa mo e fanau haau, to fakakite e koe e fakaakoaga aoga he mahani fakamooli mo e mahani fakatokolalo.
“Lata e fanau ke logona a tautolu he talahau kua hepe a tautolu, ti logona kua fakamolemole a tautolu ke he tau hehē ha tautolu. Ka nakai logona, to fakaako ni a lautolu ke fufū e tau mena hepe ha lautolu.”—Robin.
“Tau matua, kua lahi mahaki e fakaohooho ha tautolu ke he tau fanau, mo e fakafifitakiaga ha tautolu ko e koloa mitaki lahi kua moua e tautolu ha kua kitia tumau e lautolu he tau magaaho oti. Tuga kua fakaako he tau magaaho oti he puhala moui he tau matua.”—Wendell.